މަސްވެރިކަމުން ނަފާ ހޯދޭނެ ދޮރުތައް މިހާރު ވަނީ ވަރަށް ބޮޑަށް ހުޅުވާލާފައިކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ މަސްވެރިންގެ ދުވަހުގެ މުނާސަބަތުގައި ކ. ގާފަރުގައި ބޭއްވި ޚާއްސަ ޖަލްސާގައި ވާހަކަފުޅުދައްކަވަމުންނެވެ. މިނިސްޓަރ ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރު ވުޖޫދުވީއިރު މަސްވެރިކަމުގެ ސިނާއަތަކީ ވަރަށް ބޮޑަށް ބަންދުކުރެވިފައިވާ ސިނާއަތެއް ކަމަށެވެ.
މީގެ ކުރިން މަސް ގަނެ އެކްސްޕޯޓް ކުރުމުގެ ފުރުސަތު އޮތީ އޭގައި ތިބި ބަޔަކަށް އެކަނި ކަމަށެވެ. އެކަން އޮތީ މޮނޮޕޮލިސްޓިކް ހާލަތެއްގައި ކަމަށް މިނިސްޓަރ ވިދާޅުވިއެވެ. އެހެންނަމަވެސް މި ސަރުކާރުން ކުރި މަސައްކަތުން އެކަން ނިމުމަކަށް ގެނެސްފައިވާކަމަށް މިނިސްޓަރ ޑރ. ހުސައިން ވިދާޅުވިއެވެ.
މިހާރު ރާއްޖޭގެ މަސްވެރިކަމުގެ އުފެއްދުންތައް އުފައްދައިގެން އެ އުފެއްދުންތަކުން މަތީ އަގު ހޯދުމުގެ ފުރުސަތު އެކަން ކުރެވިދާނެކަމަށް ދެކޭ ގާބިލު ކޮންމެ މީހަކަށްވެސް އެބައޮތް ކަމަށް މިނިސްޓަރ ވިދާޅުވިއެވެ. މިގޮތަށް ޕޮލިސީތައް ބަދަލުކޮށްފައިވާކަމަށް މިނިސްޓަރ ޑރ. ހުސައިން ވިދާޅުވިއެވެ.
ރާއްޖެ މިއޮތީ މަސްވެރިކަމަށް ހުޅުވާލާފައި، އެހެންވީމަ ޕްރޮސެސިން ސެކްޓަރގައި އެ ފުރުސަތު އެބައޮތް ވަރަށް ބޮޑަށް. އެކަން ކުރަން ބޭނުންވާ މީހުންނަށް އެކަން ކުރެވޭނެ.މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން
މިނިސްޓަރ ވިދާޅުވީ މަސްވެރިންނަށް ރަނގަޅު ގޮތްތައް ހޯދައިދިނުމަށް މި ސަރުކާރުން ޕޮލިސީތައް ބަދަލުކޮށް، ގެންނަންޖެހޭ އިންވެސްޓްމެންޓުތައް ގެންނަމުންދާކަމަށެވެ. މަސްވެރިންގެ ހުރި ޝަކުވާތައް މި ސަރުކާރުން އަޑުއަހާ ކަމަށާއި، ސީދާ ރައީސުލްޖުމްހޫރިއްޔާވެސް އެމީހުންގެ އަޑު އައްސަވާ ކަމަށް މިނިސްޓަރ ވިދާޅުވިއެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ ހުކުރު ދުވަހުގެ މެންދުރުފަހު ބޮޑު ކަންނެލި މަސްވެރިން ކުރިއަށްގެންދިޔަ ޝުއޫރުފާޅުކުރުމުގައި ބައިވެރިވެވަޑައިގެންފައެވެ.
