ޔާމީނު ވިދާޅުވީ ވެރިކަން ކުރެއްވިއިރު އެއްވެ އުޅުމުގެ މިނިވަންކަން ދެއްވިކަމަށް
މިއީ ހަމައެކަނި ނަމުން ޑިމޮކްރަޓިކް ބައެއްކަމަށް ބުނެވިދާނެ ކަމަށް ވިދާޅުވި
ހުކުރު ދުވަހުގެރޭ އިދިކޮޅުން ބޭއްވި ކޮތަރުކޮށި ޖަލްސާގައި ރައީސް ޔާމީނު ވާހަކަ ދައްކަވަނީ
ވެރިކަން ކުރެއްވިއިރު އެއްވެ އުޅުމުގެ މިނިވަންކަން ދެއްވާފައިވާނެ ކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވީ އިދިކޮޅު ކޯލިޝަނުން ކުރިއަށްގެންދާ "ކޮތަރު ކޮށި" ޖަލްސާގައި ވާހަކަދައްކަވަމުންނެވެ. ރައީސް ޔާމީން ވިދާޅުވީ ހިޔާ ފްލެޓް ސަރަހައްދުގައި "ކޮތަރު ކޮށި" ޖަލްސާ ބާއްވަން މަސައްކަތް ކުރުމުން، އެ ފުރުސަތު ލިބިވަޑައިނުގެންނެވި ކަމަށެވެ. ވީއިރު މިއީ ހަމައެކަނި ނަމުން ޑިމޮކްރަޓިކް ބައެއްކަމަށް ބުނެވިދާނެކަމަށް ރައީސް ޔާމީނު ވިދާޅުވިއެވެ. ރައީސް ޔާމީނު ވިދާޅުވީ، އިދިކޮޅުގައި މި ސަރުކާރުގެ ބޭފުޅުން ތިބިއިރު އެއް ނުވެވޭނެ ސަރަޙައްދެއް ނޯންނާނެ ކަމަށެވެ.
ރައީސް ޔާމީން މިފަދައިން ވިދާޅުވެފައިވަނީ ހުއްދަނެތި، އިދިކޮޅު ޕީޕީއެމް/ޕީއެންސީ ކޯލިޝަނުން ހުޅުމާލޭ ފޭސް ދޭއްގައި "ކޮތަރު ކޮށި" ޖަލްސާ ބޭއްވުމަށް ތައްޔާރުވުމުގެ މަސައްކަތް ފެށުމާއި ގުޅިގެން ފުލުހުން އެ ސަރަހައްދުގައި ފޯރިމަރަން ފެށުމާއި ގުޅިގެންނެވެ. ފުލުހުން ފޯރިމަރަން ފެށުމާއި ގުޅިގެން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ، ކައުންސިލްގެ އިޚްތިސާސްގެ ތެރޭގައި އޮންނަ ސަރަޙައްދެއްގައި ސިޔާސީ ޕާޓީ އަކުން ޖަލްސާއެއް ބާއްވަން އެދުމުން، އެކަމަށް ކައުންސިލުން ދީފައިވާ ހުއްދަ ތަންފީޒުކުރުމަށް ފުލުހުން ހުރަސް އަޅަމުންދާ ކަމަށެވެ.
ރައީސް ޔާމީންގެ ވެރިކަމުގައި އެއްވެ އުޅުމުގެ މިނިވަންކަން ދެއްވާފައިވާކަމަށް އެމަނިކުފާނު ވިދާޅުވެފައިވާއިރު، ސުލުހަވެރިކަމާއި އެކު އެއްވެ އުޅުމުގެ ގާނޫނަށް އިސްލާހު ގެނެސް މާލޭގައި އެއްވުން މަނާކުރީ އޭރު ސަރުކާރު ހިންގާ ޕާޓީ ޕީޕީއެމުން ހުށައެޅި އިސްލާހެއްގެ ދަށުންނެވެ. ޔާމީނުގެ ސަރުކާރުން އެއްވެ އުޅުމުގެ ގާނޫނަށް ގެނައި އިސްލާހުތަކަކީ އެއްވެ އުޅުމުގެ ހައްގު ހަނިވެގެން ދިޔަ އިސްލާހުތަކެއްކަން ގިނަ ބަޔަކު ގަބޫލުކުރެއެވެ. އެގޮތުން 17 އޮގަސްޓު 2016 ވަނަ ދުވަހުގެ ރައްޔިތުންގެ މަޖިލީހުން އެއްވެ އުޅުމުގެ ގާނޫނު ހަނިކުރުމަށްފަހު ބިލު ފާސް ކުރީ އޭރުގެ ސަރުކާރުގައި ތިއްބެވި 37 މެންބަރުންގެ ތާއީދާއެކު އެވެ. އޭރު ބިލާ ދެކޮޅަށް ގިނަ ބަޔަކު އަޑުއުފުލަމުން ދިޔަ ނަމަވެސް، ބިލު ފާސްކޮށް އޭގެ ދަށުން ސިޔާސީ ޕާޓީތަކާއި، އެކި ފަރާތްތަކާމެދު ފިޔަވަޅު އަޅާފައިވެއެވެ.
އެއިސްލާހާ ގުޅިގެން އޭރު ރައީސް ޔާމީންގެ ސަރުކާރާ ދެކޮޅު، އެމްޑީޕީއާއި ޖުމްހޫރީ ޕާޓީއާއި އަދާލަތު ޕާޓީގެ އިތުރުން އާންމު ގިނަ ބަޔަކު ނުރުހުން ފާޅު ކުރަމުން ގެންދިޔަ އެވެ. އަދި އޭރުގެ އިދިކޮޅު ފަރާތްތަކަށް އެއްވެވޭނެ ނުވަތަ ޖަލްސާއެއް ބާއްވާލާނެ ތަނެއް ނުލިބިގެން އުޅެންޖެހިފައި ވެއެވެ.
އެހެންނަމަވެސް މި ސަރުކާރުން ވަނީ މި ގާނޫނަށް ބޮޑެތި އިސްލާހުތަކެއް ގެނެސްފައެވެ. އެއްވެ އުޅުމުގެ މިނިވަންކަން ހަނިކުރަން ފާސްކުރި އެ އިސްލާހު، އުވާލަން މަޖިލީހަށް ހުށަހެޅުވީ ކާށިދޫ ދާއިރާގެ މެމްބަރު އަދި ޑީއާރުޕީގެ ލީޑަރު އަބްދުﷲ ޖާބިރެވެ. ގާނޫނަށް ހުށައަޅާފައިވާ އިސްލާހުތަކުގެ ތެރެއިން ކޮމިޓީން ފާސްކުރި އެއްކަމަކީ ޓޫރިސްޓް ރިސޯޓުތަކުގައި މުވައްޒަފުންނަށް ޓޫރިޒަމް މިނިސްޓްރީން ކަނޑައަޅާފައިވާ ސަރަހައްދު ފިޔަވައި އެހެން ތަންތަނުގައި އެއްވެ އުޅުން މަނާ ކުރުމެވެ. އެއާއެކު، މުވައްޒަފުންނަށް ޚާއްސަކޮށްފައިވާ ސަރަޙައްދުގައި ސުލްޙަވެރިކަމާއެކު އެއްވެ އުޅުމުގެ ހުއްދަ ލިބިގެންދެއެވެ.
އޭގެ އިތުރުން، އެއްވެ އުޅުމުގެ ގާނޫނަށް ނިމިދިޔަ ސަރުކާރުން ގެނެސްފައިވާ އިސްލާހުގައިވާ ގޮތުން އެއްވުންތައް ބޭއްވުމުގެ ކުރިން ފުލުހުންގެ ހުއްދަ ނެގުން ލާޒިމުވި ނަމަވެސް، މިހާރު އެ މާއްދާ އެއްކޮށް އުނި ކުރުމަށް ވަނީ ފާސްކޮށްފައެވެ. އެއާއެކު، އެއްވެ އުޅެވޭނީ ފުލުހުންގެ ހުއްދަ ލިބޭ ތަންތަނަށް ކަމަށް ބަޔާންކޮށް އެ ގާނޫނުގެ 24 ވަނަ މާއްދާގެ (ޅ) ގައި ބަޔާންކޮށްފައިވާ މާއްދާ އުވާލުމަށް ވަނީ ފާސްކޮށްފައެވެ.
މި އިސްލާހުތަކާއެކު ގައުމުގެ ސަލާމަތަށްޓަކައި އެއްވެ އުޅުން މަނާ ސަރަހައްދުތަކެއްވެސް ކަނޑައަޅާފައިވެއެވެ. އޭގެ ތެރޭގައި ދައުލަތުން ޚިދުމަތް ފޯރުކޮށްދޭ އިމާރަތްތައް ހުންނަ ސަރަޙައްދުތަކާއި، ޖަލު ފަދަ ތަންތަން ހިމެނެއެވެ.
