ބަނޑުހައިހޫނުކަމުގެ ހަޅުތާލާއެކު މިނިވަންވި ޒުވާނެއްގެ ވާހަކަ!

އަނިޔާވެރި ޔަހޫދީންގެ ހަމަލާތަކުން ކޮންމެ ދުވަހަކު ވެސް ފަލަސްތީނުގެ އެތައް ރައްޔިތުންނެއް ބިކަކުރަމުންދެއެވެ. ހައްދެއް ނެތި ލާއިންސާނީ ހަމަލާތައް ފަލަސްތީން ރައްޔިތުންނަށް ކޮންމެ ދުވަހަކުވެސް އަމާޒު ކުރަމުން ދަނީ އެކިއެކި ސިފަސިފައިގައެވެ. ބޮން އަޅައި ގެތައް ލޫޓުވާލައެވެ. ތުއްތު އެތައް ކުއްޖެއްގެ ބައްޕައިން ވަގަށް ނަގައެވެ. އާއިލާތައް ވިއްސިވިހާލި ކޮށްލައެވެ. މި ހަމަލާތަކުގައި މައިން ބަފައިންނާ ވަކިވާންޖެހޭ ކުދިން ގިނައެވެ. ބައެއް އާއިލާތަކުގެ ފިރިހެނުން އިސްރާއީލްގެ ޖަލުތަކަށް ގެންގޮސް ޖިސްމާނީ ނަފްސާނީ އެތައް އަނިޔާއެއް ދެއެވެ. ނަމަވެސް އެއަނިޔާތަކަށް އެމީހުން ކުޑަކަކޫ ނުޖަހައެވެ. މުޅި ދުނިޔެއަށް އެމީހުންގެ ހިތްވަރާއި، ސާބިތުކަން ދައްކުވައިދެއެވެ. އެގޮތުން ދާދިފަހުން އެކަން ސާބިތުކޮށްދީފައިވަނީ 32 އަހަރުގެ ކާއިދު ފަސްފޫސްއެވެ.

ކާއިދަކީ ހިބްރޮންގައި އާއިލާއާއެކު ވަރަށް އުފާވެރިކޮށް ދިރިއުޅެމުން އައި ޒުވާނެކެވެ. ނަމަވެސް އޭނާގެ ދިރިއުޅުމަށް ވެސް އިސްރާއީލްގެ އަނިޔާވެރި ހިޔަނި އެޅުނީއެވެ. ސިއްރު މައުލޫމާތު ހޯދާ ކަމަށް ބުނެ، ކާއިދު ހައްޔަރުކޮށްގެން ގެންދިޔައީ 2020 އަހަރުގެ އޮކްޓޫބަރު މަހުގެ ތެރޭގައެވެ. ބޮލަށް ފޮތިގަނޑެއް ލައްވައި ހައްޔަރުކުރީ އޭނާގެ އަންހެން ދަރިފުޅާއި، އަންހެނުންގެ ކުރިމަތީގައި ވަރަށް އަނިޔާވެރިކޮށެވެ. އެދުވަހު ވެސް ކާއިދުގެ އަންހެން ދަރިފުޅުގާތުގައި އޭނާ ބުންޏެވެ. ބައްޕަ އެއްވެސް ކުށެއް ނުކުރާ ކަމަށާއި، އެކަން މުޅި ދުނިޔެއަށް ސާބިތުކޮށް ދިނުމަށްފަހު އެބުރި އަންނާނެ ކަމަށެވެ. އެހާލަތު ސިފަކޮށް ދެމުން ކާއިދު ބުނެފައިވަނީ ހައްޔަރު ކުރި ވަގުތު ބިރުވެރި ނަމަވެސް އަންހެނުންނާއި އަންހެން ދަރިފުޅުގެ ފަރާތުން ހިތްވަރާއި، ކެތްތެރިކަން ފެނިގެން ދިޔަ ކަމަށެވެ.

ދުވަސްތައް ގިނަވަމުން ދިޔައެވެ. އޭނާގެ ކުށެއް ނެތްކަން މުޅި ދުނިޔެއަށް ސާބިތުކޮށްދިނުމަށް ކާއިދު ޖަލުގައި ބަނޑުހައިހޫނުކަމުގެ ހަޅުތާލެއް ފެށިއެވެ. 2021 ވަނަ އަަހަރުގެ ޖުލައި މަހު ފެށި ހަޅުލާތުގައި 131 ދުވަސް ހޭދަ ކުރިއެވެ. މިހަޅުތާލުގައި އޭނާގެ ހާލު ސީރިއަސްވެ ރާމަﷲގެ ހޮސްޕިޓަލެއްގައި މިމަހުގެ 5 ވަނަ ދުވަހު އެޑްމިޓް ކުރިއެވެ. އެހިސާބުން ކާއިދަށް ގިނަ ބައެއްގެ ސަމާލުކަން ލިބިގެން ދިޔައެވެ. އެއީ ގިނަ ދުވަސްތަކަކަށް މި ހަޅުތާލު ދިގުދެމިގެން ދިއުމާއެކުއެވެ. އަދި ކުރި ކުށެއް ނޭނގޭ ހާލު އޭނާއަށް ދައުވާއެއް ކުރުމެއް ނެތި ހައްޔަރުކޮށްފައި ބެހެއްޓުމަކީ ވަރަށް ބޭއިންސާފުން ކޮށްފައިވާ ކަމެއް ކަމަށް އާއްމުން ބުނެ، އިސްރާއީލްގެ ސިފައިންނާއި ދެކޮޅަށް ގިނަ ބަޔަކު އަޑު އުފުލިއެވެ. ނަތީޖާއެއް ގޮތުން މިއަދު ކާއިދު ވަނީ މިނިވަން ކޮށްފައެވެ.

ނޮވެމްބަރު މަހުގެ 23 ވަނަ ދުވަހުގެ ވަގުތެއްގައި ކާއިދު ބަނޑުހައިހޫނުކަމުގެ ހަޅުތާލު ނިންމާލާފައިވާއިރު، އޭނާގެ ހަށިގަނޑު ވަނީ ވަރަށް ބޮޑަށް އަނަރޫފަވެފައެވެ. އޭނާގެ ހަނދާނަށް ވެސް ގެއްލުންވެ، ހަށިގަނޑުން 45 ކިލޯ ލުއިވެފައިވެއެވެ.

ކާއިދު މިނިވަންވުމާއި ގުޅިގެން އަލްޖަޒީރާއަށް ދީފައިވާ އިންޓަވިޔުގައި ބުނެފައިވަނީ އަދިވެސް ހައްޔަރު ނުކުރާނެ ކަމުގެ ޔަގީންކަން ނެތް ކަމަށާއި، މީގެ ކުރިން ވެސް ހަމަސް ދުވަހަށް ވުރެ ގިނަ ދުވަސް ޖަލުގައި ހޭދަ ކުރި ކަމަށެވެ. ނަމަވެސް ގެޔަށް އެނބުރި ދާން ބޭނުންވާ ކަމަށާއި، އާއިލާއާއެކު ދިިރިއުޅުން އާރާސްތު ކުރަން ބޭނުންވާކަން ފާހަގަކުރިއެވެ. އަދި ފަލަސްތީނަކީ އޭނާގެ ވެސް ބިން ކަމަށާއި، މިނިވަންކަމާއެކު ދިރިއުޅުމުގެ ހައްގު ލިބެންޖެހޭކަ ކަމަށް ބުންޏެވެ.

ޖަލުގައި ހޭދުކުރި ދުވަސްތަކަށް އިޝާރާތްކޮށް ކާއިދު ބުނެފައިވަނީ ކޮންމެ ދުވަހަކީ ޔާހޫދީ ސިފައިންގެ އަނިޔާވެރިކަން ތަހައްމަލް ކުރަން ޖެހޭ ދުވަހެއް ކަމަށާއި، ނަފްސާނީ ގޮތުން ވެސް ބަލި ކޮށްލުމަށް އެކި ގޮތްގޮތުން އެމީހުން މަސައްކަތް ކުރާ ކަމަށެވެ. އަދި ބަނޑުހައިހޫނު ކަމުގެ ހަޅުތާލާ ގުޅިގެން ހޮސްޕިޓަލްގައި އެޑްމިޓް ކުރުމުން ވެސް ހޮސްޕިޓަލްގެ ސްޓާފުން ވެސް އަޅާނުލާ ފަރުވާނުދޭނެ ކަމުގެ އިންޒާރު ދިން ކަމަށް ކާއިދު ބުނެފައިވެއެވެ. ކާއިދަކީ ކުރިން ބޮޑީބިލްޑަރެއް ނަމަވެސް މިކަމުގެ ސަބަބުން އޭނާގެ މުޅި ހަށިގަނޑު ވަނީ ބަދަލުވެފައެވެ. މީހާގެ ސިފަގެއްލިފައެވެ. ނަމަވެސް އޭނާގެ ސިފައާ އަދި ސިއްހީ ހާލަތާއި މެދު ކަންބޮޑެއް ނުވެއެވެ.

މިއަދު ކާއިދު ކަންބޮޑުވަނީ ފަލަސްތީނުގެ އެތައް ޒުވާނުންނާއި ކުޑަ ކުދިން ޖަލުތަކުގައި ހައްޔަރުކޮށްފައިވާތީއެވެ. ނުހައްގުން ކޮންމެ ދުވަހަކު އެތައް އަނިޔާއެއް ދެމުންދާތީއެވެ. ފަލަސްތީނުގެ ބިން އެހީއެދި ގޮވަމުންދާއިރު، ދުނިޔެ ނިދާފައިވާ ކަމަށް ކާއިދު ބުނެއެވެ. އަދި މިއަދު މުސްލިމް އުންމަތަށް ވެފައިވާ ގޮތާއިމެދު ސުވާލު އުފައްދާ އޭނާ ވާހަކަދެއްކިއެވެ. ނުހައްގުން އަނިޔާ ލިބޭ އަޚުންނާއި އުޚުތުންގެ ހައްގުގައި ތެދުވުމަށް ގޮވާލިއެވެ. ކާއިދު ކުރި ބަނޑުހައިހޫނުކަމުގެ ހަޅުތާލުން އެތައް އާއިލާއަކަށް ހިތްވަރު ލިބިގެންދާނެ ކަމަށް އުންމީދުކުރާ ހާލުގައެވެ.