ރާއްޖޭގެ ޖަލުތަކުގެ ހާލަތު ހުރީ ގަބޫލުކުރެވޭ ފެންވަރަކަށް ނޫން ކަމަށް އދ. އިން ބުނެފި
ޖަލުތަކުގެ ޖާގައިގެ ދަތިކަން ހައްދުފަހަނައަޅާފައި
އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން ބޭއްވި ނޫސްވެރިންގެ ބައްދަލުވުން
ރާއްޖޭގެ ޖަލުތަކުގެ ހާލަތު މިހާރު ހުރީ ބައިނަލްއަގުއާމީ ގޮތުން ބަލައިގަނެވޭ ފެންވަރަކަށް ނޫންކަމަށް އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން ބުނެފިއެވެ.
ސަރުކާރުގެ ދައުވަތަށް ރާއްޖެ އައިސް 10 ދުވަހުގެ ތަހުގީގަކަށްފަހު ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި، ގާނޫނާ ޚިލާފު ބަންދުގެ މައްސަލަތައް ބެލުމަށް ހާއްސަ އދ. ގެ އެ ކޮމެޓީން ބުނީ، ދިވެހިރާއްޖޭގެ ޖަލުތަކުގެ ޖާގައިގެ ދަތިކަން ހައްދުފަހަނައަޅާފައިވާ ކަމަށާއި ބޭސް ފަރުވާ ހޯދުމާއި ކަސްރަތު ކުރުން ފަދަ އިންސާނީ ހައްގުތަކުން ގިނަ ގައިދީން މަހްރޫމްކޮށްފައިވާ ކަމަށެވެ. ބަންދުކޮށްފައި ތިބޭ ގިނަ ގައިދީން ގޮޅިން ބޭރަށް ނުނެރެ އެއް މަސްވެސް ވެފައިވާކަމަށް އެ ކޮމެޓީގެ ޗެއަރ ޑރ. އެލީނާ ސްޓެއިނާޓް ވިދާޅުވިއެވެ. މިފަދަ މޫސުމެއްގައި މިއީ އިންސާފެއް ނޫން ކަމަށާއި، އެއީ އެކަން ހިންގަންވާނެ ގޮތް ނޫންކަމަށް އޭނާ ވިދާޅުވިއެވެ.
ޖަލުތަކުގެ ތެރެއިންވެސް މާލޭ ޖަލުގެ ޖާގައިގެ ދަތިކަން ހުރިކަން އެ ކޮމިޓީން ފާހަކުރިއެވެ. މާލޭ ޖަލުގައި ގައިދީން ބޭރަަށް ނެރެނީ ބޮޑު ކޮއްޓަކަށް ލައިގެން ކަމަށާއި، ޖަލުގެ ގޮޅިތަކުގައި ގިނަ ގައިދީން ނިދާނެ ގޮދަޑިއެއްހާ ހިސާބުވެސް ނެތް ކަމަށް އެ ޓީމުގެ މެމްބަރު ޕްރިޔާ ވިދާޅުވިއެވެ. ގައިދީންގެ އަދަދު ގިނަކަމުން ނިދަންޖެހެނީ ވަރަށް ކައިރިކައިރީގައި ކަމަށާއި، ފައި ދަމާލާނެހާ ޖާގަ ވެސް ނޯންނަކަމަށް ވިދާޅުވިއެވެ. އެތައް އަހަރެއް ޖަލުގައި ތިބޭ މީހުންނަށްވެސް ސައިކޯ ސޯޝަލް ސަޕޯރޓްވެސް ނުލިބޭކަމަށް ވިދާޅުވިއެވެ.
ކުށުގެ ތުހުމަތުގައި ބަންދު ކުރާ މީހުންނާއި، ހުކުމްކޮށްފައިވާ ތިބޭ މީހުންނާ އެއް ދަރަޖައެއްގައި ގެންގުޅޭ މައްސަލަވެސް އެ ޓީމުން ވަނީ ފާހަގަކޮށްފައެވެ. ހަމަ މިއާއެކު ޓެރަރިޒަމްގެ މައްސަލަތަކުގައި ހައްޔަރު ކުރާ މީހުންނާއި ބޮޑެތި ޖިނާއީ ކުށްތަކުގައި ހައްޔަރުކުރާ މީހުންގެ ހައްގުތައް ގާނޫނުން ހަނިކުރާ ކަމަށްވެސް އެ ޓީމުން ބުންޏެވެެ. އަދި ގާނޫނީ ފްރޭމްވޯކް އޮންނަ ގޮތުން ބަންދުގައި ތިބެގެން ގާނޫނީ އެހީތެރިކަން ހޯދުމަށް ގައިދީންނަށް ދަތިވާ ކަމަށެވެ.
ޚާއްސަކޮށް ބިދޭސީންނަށް ގާނޫނީ އެހީތެރިކަން ފޯރުކޮށްދިނުމުގައި އިހުމާލު އޮތްކަމަށް އެ ގްރޫޕުންވަނީ ފާހަގަކޮށްފައެވެ. ބިދޭސީން ގެންގުޅެނީ ވަރަށް އަސާސީ ހައްގުތަކުން ވެސް އެކަހެރިކޮށްގެން ކަމަށާއި ނުރަސްމީ ބަންދު ސެންޓަރެއްގައި ސަރުކާރުގެ ކުންފުންޏަކުންވެސް ގިނަ އަދަދެއްގެ ބިދޭސީން ބަންދުކޮށްގެން ގެންގުޅުނު ކަމަށް އެ ޓީމުން ބުންޏެވެ. އެހެންނަމަވެސް އެއީ ކޮން ކުންފުންޏެއްކަން ހާމައެއް ނުކުރެއެވެ. އެ މީހުން ފަނޑިޔާރެއްގެ ކުރިމައްޗަކަށް ނުގެންދާ ކަމަށާއި، ގާނޫނީ އެހީތެރިކަމެއް ނުލިބޭ ކަމަށްވެސް ޕްރިޔާ ވިދާޅުވިއެވެ. ބިދޭސީން ބަންދުކުރާއިރު އެއް ހަމައަކުން އަމަލު ކުރުމުގެ ބަދަލުގައި ކޮންމެ ކޭހެއްވެސް ވަކިވަކިން ބެލުމަށް އެ ޓީމުންވަނީ އެދިފައެވެ.
މަސްތުވާތަކެތި ބޭނުން ކުރާ މީހުންނާމެދު ދެކޭ ގޮތް ބަދަލުކޮށް، މަސްތުވާތަކެތީގެ މައްސަލައަކީ ސިއްހީ ކަމެއްގެ ގޮތުގައި ބަލައިގަންނަންޖެހޭ ކަމަށާއި، ޑްރަގް ރިހެބިލިޓޭޝަންގެ ޕްރޮގްރާމްތައް ޖަލުގައި އެކަށީގެންވާ ގޮތަށް ކުރިއަށްނުދާކަން ފާހަގަކުރިއެެވެ.
ރަސްމީ ރިޕޯޓް އެކުލަވާލައި ރިޕޯޓް އަންނަ އަހަރު އދ. ގެ ހިއުމަން ރައިޓްސް ކައުންސިލަށް ހުށަހަޅާނެއެވެ. އަދި، މި ކަމުގައި ސަރުކާރުގެ ކަމާ ގުޅުންހުރި އިދާރަތަކުން ރަނގަޅު ކުރަން ޖެހޭ ކަންކަން ފާހަގަކޮށް މުހިއްމު މަޝްވަރާތަކެއް ކުރިއަށްދާނެ ކަމަށްވެސް އެ ޓީމުން ފާހަގކުރިއެވެ.
