މުއިއްޒު ވިދާޅުވީ އޭސީސީއަށް ހާޒިވާން އެންގީ ބިރު ދެއްކުމުގެ ގޮތުން ކަމަށް
9 ޑިސެމްބަރު 2021 | ބުރާސްފަތި 09:12ނިއު ޕޯޓްގެ މައްސަލައިގައި މުއިއްޒަށް ދައުވާ ކުރަން އޭސީސީން ޕީޖީ އޮފީހަށް ފޮނުވި މައްސަލަ ވަނީ މިދިޔަ ހަފުތާގައި އަނބުރާ ފޮނުވާލާފައި
ޑރ.މުހައްމަދު މުއިއްޒު - މާލެ ސިޓީ މޭޔަރ
އޭސީސީއަށް ހާޒިވާން އެންގީ ބިރު ދެއްކުމުގެ ގޮތުން ކަމަށް މާލެ ސިޓީގެ މޭޔަރ ޑރ.މުހައްމަދު މުއިއްޒު ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ، މެންދުރު 2:00ގައި އޭސީސީ އަށް ހާޒިރުވާން އަންގާފައިވާ ކަމަށާއި އެއީ ބިރު ދެއްކުމުގެ ގޮތުން އެންގި އެންގުމެއް ކަަމަށެވެ. ސަބަބެއް ކަމުގައި މުއިއްޒު ވިދާޅުވީ، އެއީ މި ދުވަސްކޮޅު ސިޓީ ކައުންސިލްގެ މަސައްކަތްތައް ބާރު ސްޕީޑުގައި ކުރިއަށް ގެންދާތީ ކަމަށެވެ. އެކަމާ ޖެހިލުވެވަޑައިގުންނަވާ ކަމަށްވެސް ވިދާޅުވިއެވެ.
މާލޭގެ ޕާރކިންގ ސްލޮޓްތައް ދޫކުރުމުގައި މާލެ ސިޓީ ކައުންސިލުން އަމަލު ކޮށްފައިވާ ގޮތުން އެ މައްސަލަވެސް މިހާރުވަނީ އޭސީސީއަށް ހުށަހަޅާފައެވެ. ޕާކިން ސްލޮޓްތަކުގެ ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަޖެހުންތަކެއް ވަނީ އުފެދިފައެވެ. އެގޮތުން 211 ސްލޮޓަށް 969 މީހަކު ކުރިމަތިލާފައިވާއިރު މި ސްލޮޓްތަކަށް ކުރިމަތިލި ކޮންމެ ފަރާތަކަށްވެސް ސްލިޕެއް ހަވާލުކުރި ކަމަށް މާލެ ސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުންކޮށްފައިވަނީ ސްލިޕް ނަންބަރު ކަމަށް ވެސް އެ ކައުންސިލުން ވަނީ ބުނެފައެވެ. މި މައްސަލަ އޭސީސީން އަންނަނީ ދިރާސާ ކުރަމުންނެވެ.
ނިއު ޕޯޓްގެ މައްސަލައިގައި މުއިއްޒަށް ދައުވާ ކުރަން އޭސީސީން ޕީޖީ އޮފީހަށް ފޮނުވި މައްސަލަ ވަނީ މިދިޔަ ހަފުތާގައި އަނބުރާ ފޮނުވާލާފައެވެ.
ޕީޖީ އޮފީހުން ބުނީ މި މައްސަލަ އަނބުރާ އޭސީސީއަށް ފޮނުވާފައިވާ ކަމަށާއި، އެދިފައިވަނީ ޕީޖީ އޮފީހުން ބޭނުންވާ އިތުރު މައުލޫމާތުތަކެއް ހިމަނައިގެން އަލުން މައްސަލަ ފޮނުވުމަށް ކަމުގައެވެ. މި މައްސަލައިގެ މަރުހަލާގެ ގޮތުން ޕީޖީ އޮފީހުން އިތުރު މައުލޫމާތު ހާމައެއް ނުކުރެއެވެ.
ނިއުޕޯޓް މައްސަލައިގައި މުއިއްޒަށް ދައުވާ ކުރަން ފޮނުވީ މި އަހަރުގެ އޮކްޓޯބަރ މަހުގެ 6 ވަނަ ދުވަހުއެވެ. އޭސީސީން އެއިރު ބުނެފައިވަނީ މުއިއްޒުގެ މައްޗަށް އުފުލުމަށް އެދިފައިވަނީ ރައްޔިތުންނަށް ނުވަތަ ދައުލަތަށް ފައިދާއެއް ލިބެން އޮތްކަމެއްގެ ފައިދާ ރައްޔިތުންނަށް ނުވަތަ ދައުލަތަށް ނުލިބޭ ގޮތަށް ނުވަތަ ލިބެން އޮތް ފައިދާއަށް އުނިކަން ލިބޭ ގޮތަށް އަމަލުކުރުމުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާއެވެ.
މި މައްސަލާގައި މުއިއްޒުގެ އިތުރުން ދެން ދައުވާ ކުރަން ފޮނުވާފައިވަނީ ހައުސިން މިނިސްޓްރީގެ އޭރުގެ ސްޓޭޓް މިނިސްޓަރު އަހުމަދު ހަބީބުގެ މައްޗަށެވެ. އޭނާގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާއެވެ.
އޭސީސީން ބުނެފައި ވަނީ ސްޓްރާޑާއާއެކު ހެދި އެއްބަސްވުމާ އެއްގޮތަށް އެ ކުންފުނިން ދައުލަތަށް ދައްކަން ޖެހޭ ކުލީގެ ފައިސާ ދައްކާފައި ނުވާ ކަމަށާއި އެ އެއްބަސްވުން ބާތިލު ކުރުމުގެ އިޚުތިޔާރު އޮތް ނަމަވެސް އެކަން ނުކޮށް، އެ ކުންފުންޏަށް އިތުރަށް މަންފާވާ ގޮތަށް އެ އެއްބަސްވުމަށް އިތުރު އިސްލާހުތަކެއް ގެނެސްފައިވާ ކަމަށެވެ. އެ ބިމުގައި އިތުރު ވިޔަފާރި ކުރުމަށާއި ބިން ކުއްޔަށް ދީފައިވާ މުއްދަތު ފަސް އަހަރަށް ބަދަލު ކުރުމާއި ޒަމާނީ ފުޓްސަލް ދަނޑެއް ތަރައްގީ ކުރުމުގެ ފުރުސަތު ދިނުން ވެސް ހިމެނެ އެވެ.
މި މައްސަލައިގައި ދައުވާ ކުރަން އެދިފައިވާއިރު، މުއިއްޒުގެ މައްޗަށް ދައުވާ ކޮށްފައިވާ މައްސަލައެއްވެސް އެބައޮތެވެ. އެއީ އޭނާ ހައުސިން މިނިސްޓަރަކަށް ހުންނެވިއިރު، ނޫމަޑި ކުންފުންޏާއެކު، ސަރުކާރުން ހެދި އެއްބަސްވުން ބާތިލް ކުރުމުން ނޫމަޑިން 155 މިލިއަން ޑޮލަރު ހޯދަން ސަރުކާރާ ދެކޮޅަށް އާބިޓްރޭޝަނަށް ހުށަހެޅި މައްސަލައިގައި ނެދަލޭންޑްސްގައިި ހުންނަ ދަ ހޭގްގެ ޕާމަނަންޓް ކޯޓް އޮފް އާބިޓްރޭޝަންގައި ނޫމަޑީގެ ހެކިވެރިއެއްގެ ގޮތުގައި ދޮޮގު ބަޔާނެއް ދެއްވި ކަމަށް ބުނެއެވެ.
