މިއަހަރުގެ މަސްވެރިންގެ ދުވަސް ގައުމީ ފެންވަރުގައި ކ. ގާފަރުގައި ފާހަގަކުރުމަށްޓަކައި ކުރިއަށްގެންދާ ހަރަކާތްތަކުގެ ތެރެއިން، "ފިޝަރީޒް އެކްސްޕޯ" އެއް އެރަށުގައި ހުޅުވައިފިއެވެ.
ބުރާސްފަތި ދުވަހުގެ ހެނދުނު މި އެކްސްޕޯ ހުޅުއްވައިދެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑޮކްޓަރ ހުސެއިން ރަޝީދު ހަސަން އެވެ.
އެކްސްޕޯ ހުޅުއްވައިދެއްވަމުން އެމަނިކުފާނު ދެއްކެވި ވާހަކަފުޅުގައި، ދިވެހިރާއްޖޭގެ މަސްވެރިކަމުގެ ސިނާއަތަށް އައިސްފައިވާ ކުރިއެރުންތަކާއި، ޒަމާނީ ޓެކްނޮލޮޖީގެ ސަބަބުން މަސްވެރިކަމަށް އައިސްފައިވާ ލުއިފަސޭހަކަމުގެ މައްޗަށް އަލިއަޅުވާލެއްވިއެވެ. އެހެންކަމުން ޒަމާނީ ވަސީލަތްތަކުގެ ސީދާ ބޭނުން މިފަދަ އެކްސްޕޯއެއް މެދުވެރިކޮށް މަސްވެރިންނަށާއި އާއްމު ރައްޔިތުންނަށް ވެސް އޭގެ އެންމެ ފުރިހަމަގޮތުގައި ލިބިގެންދާނެކަމަށް ދެކެވަޑައިގަންނަވާކަމުގައި ވިދާޅުވިއެވެ.
މިނިސްޓަރ ވިދާޅުވީ މަސްވެރިކަމުގެ އުފެއްދުންތަކާއި އެކަމާއި ގުޅުންހުރި މައުލޫމާތުތައްވެސް މި އެކްސްޕޯ މެދުވެރިކޮށް ލިބިގެން ދާނެ ކަމަށެވެ. މި އެކްސްޕޯއަށް ކ. ގާފަރު ކައުންސިލާއި ގާފަރު ރައްޔިތުންގެ ފަރާތުން ލިބިފައިވާ ފުރިހަމަ އެއްބާރުލުން ވެސް މިނިސްޓަރގެ ވާހަކަފުޅުގައި ފާހަގަކުރެއްވިއެވެ.
ބުރާސްފަތި ދުވަހުން ފެށިގެން ދެ ދުވަހުގެ މުއްދަތަށް ކުރިއަށްގެންދާ މި އެކްސްޕޯ ކުރިއަށްދަނީ އާއްމުކޮށް ހުޅުވާލެވިގެން ގާފަރު ބަނދަރު ސަރަހައްދުގައެވެ.
ފިޝަރީޒް މިނިސްޓްރީން ބުނީ މަސްވެރިންގެ ދުވަހުގެ މުނާސަބަތުގައި މިފަދަ އެކްސްޕޯއެއް ބޭއްވުމުގެ މައިގަނޑު މަގުސަދަކީ މަސްވެރިކަމުގެ ދާއިރާގެ ފަރާތްތަކުގެ ތެރެއިން މަސް ޕްރޮސެސްކުރުމުގައި ހަރަކާތްތެރިވާ އިސް ފަރާތްތަކާއި، ދެމެހެއްޓެނިވި މަސްވެރިކަމެއްގެ ގޮތުގައި ރާއްޖޭގެ މަސްވެރިކަމުގެ ސިނާއަތް ބައްޓަންކުރުމަށް އިސްކޮށް އުޅޭ ބައެއް ފަރާތްތަކާއި، މަސްވެރިކަމުގައި ބޭނުންކުރާ ޒަމާނީ އެކިއެކި ވަސީލަތްތަކާއި އެ މަސައްކަތްތައް ކުރަން ބޭނުން ކުރާ ޒަމާނީ އާލާތްތަކާއި އުފެއްދުންތަކާބެހޭ ގޮތުން ފުޅާ ދާއިރާއެއްގައި އާއްމުންނަށް މައުލޫމާތު ދިނުމަށް ކަމުގައެވެ.
