ކުޅުދުއްފުށީ ރީޖަނަލް ހޮސްޕިޓަލްގައި ތެލެސީމިއާ ޑީއެންއޭ ޓެސްޓްގެ ޚިދުމަތް ފަށައިފިއެވެ

ކުޅުދުއްފުށީ ރީޖަނަލް ހޮސްޕިޓަލުން މައުލޫމާތު ދެއްވިގޮތުގައި ބުރާސްފަތި ދުވަހު ފެށި މި ޚިދުމަތަކީ ސެންޓަރ ފޯރ ހެލްތް އެޑިއުކޭޝަން (ޝީ) އާ ގުޅިގެން ދޭންފެށި ޚިދުމަތެކެވެ.

އެ ހޮސްޕިޓަލްގެ ވެބްސައިޓް މެދުވެރިކޮށް އެޕޮއިންޓްމަންޓް ހެއްދުމުގެ އިންތިޒާމް ހަމަޖެހިފައިވާއިރު، މި ޚިދުމަތަކީ އަގެއް ނަގައިގެން ދޭ ޚިދުމަތެއްކަމަށް އެ ހޮސްޕިޓަލުން މައުލޫމާތު ދެއްވައެވެ.

ކުޅުދުއްފުށީ ރީޖަނަލް ހޮސްޕިޓަލްގެ ލެބޯޓްރީން ނެހެދޭ ޓެސްޓްތައް، އެ ޓެސްޓްތައް ހެދޭ އެހެން ލެބޯޓްރީއަކާ ގުޅިގެން ކުޅުދުއްފުށީ ރީޖަނަލް ހޮސްޕިޓަލް މެދުވެރިވެގެން ކުރެވޭނެ އިންތިޒާމެއް ހަމަޖެއްސުމަށް މަސައްކަތް ކުރަމުންދާކަމަށް އެ ހޮސްޕިޓަލުން ވިދާޅުވެއެވެ.

ކުލުދުއްފުށީ ރީޖަނަލް ހޮސްޕިޓަލަކީ މާލެއިން އުތުރުގައި އެންމެ ގިނަބަޔަކު ޚިދުމަތް ހޯދާ ހޮސްޕިޓަލެވެ. އެ ހޮސްޕިޓަލަކީ ސަރުކާރުން ޓާޝަރީ ފެންވަރަށް ތަރައްގީ ކުރަމުން ގެންދާ ހޮސްޕިޓަލެކެވެ.