ޑެލްޓާ ވޭރިއަންޓަށްވުރެ އޮމިކްރޯންގެ ނުރައްކާ ކުޑަ - ޓެޑްރޮސް
9 ޑިސެމްބަރު 2021 | ބުރާސްފަތި 04:58ފުރިހަމަ ނަތީޖާއަކާ ހަމައަށް ދިޔުމަށް އަދި އިތުރު ޑޭޓާ އެނަލައިޒް ކުރަން ބޭނުންވާނެ
ޓެޑްރޮސް އަދަނޮމް - ޑަބްލިއެޗްއޯ ޗީފް
ޑެލްޓާ ވޭރިއަންޓަށްވުރެ އޮމިކްރޯންގެ ނުރައްކާ ކުޑަ ކަމަށް ޑަބްލިއުއެޗްއޯއިން ބުނެފިއެވެ.
ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޮސް އަދަނޮމް ވިދާޅުވީ، ޑެލްޓާ ވޭރިއަށްޓަށްވުރެ ބާރަށް އޮމިކްރޯން ވޭރިއަންޓް ފެތުރުނު ނަމަވެސް އެ ވޭރިއަންޓް ޖެހޭ މީހުންގެ ހާލު ގޯސް ނުވާކަމަށް މިހާތަނަށް ބެލި ބެލުމުން އެނގިފައިވާ ކަމަށެވެ.
ސައުތު އެފްރިކާއިން ފެނުނު ކަމަށްބުނާ އޮމިކްރޯން ވޭރިއަންޓް ދުނިޔޭގެ އެކި ގައުމުތަކުން ފެންނަމުންދާ ކަމަށް ރިޕޯޓްކުރި ނަމަވެސް މި ވޭރިއަންޓް ޖެހިގެން ހާލު ގޯސްވާ ކަމަށް މިހާތަނަށް ރިޕޯޓް ކޮށްފައި ނުވެއެވެ.
ޓެޑްރޮސް ވިދާޅުވީ، ފުރިހަމަ ނަތީޖާއަކާ ހަމައަށް ދިޔުމަށް އަދި އިތުރު ޑޭޓާ އެނަލައިޒް ކުރަން ބޭނުންވާނެ ކަމަށާއި، ގައުމުތަކުން ރައްކާތެރިކަމުގެ ފިޔަވަޅު އަޅައިގެން ތިބުން މުހިއްމު ކަމަށެވެ. އައު ވޭރިއަންޓް ފެނުމާއެކު ގައުމުތަކުން ވަނީ ރައްކާތެރިކަމުގެ ފިޔަވަޅުތައް އަޅައި، މި ވޭރިއަންޓް ފެންނަ ގައުމުތަކުން ދަތުރުކުރުން މަނާ ކޮށް ޓްރެވަލް އެލަރޓްތައްވެސް ނެރެފައެވެ.
އައު ވޭރިއަންޓް ހަލުވި ކަމާއެކު ފެތުރުނު ނަމަވެސް މިއީ ނުހުއްޓުވޭނެ ކަމެއް ނޫން ކަމަށް ޓެޑްރޮސް ވިދާޅުވިއެވެ.
