ޕެންޑޯރާސް ޕޭޕަރސް ނުވަތަ ޕެންޑޯރާގެ ކަރުދާހޭ ކިޔުނު ކަރުދާސްތަކެއްގެ ވާހަކަ މިދުވަސްވަރު މާގަދައެއްކޮށް އެބަދެކެވެއެވެ. ދުނިޔޭގެ އެކި ކަންކޮޅުތަކުގައި އެކި މީހުން ހިންގާފައިވާ ވައްކަމާއި ޚިޔާނާތާއި ފަސާދައިގެ އެކިއެކި އަމަލުތަކުގެ ވާހަކަ މި ކަރުދާސްތަކުގައި ވަރަށް ރަގަޅަށް ބަޔާންވެގެންވެއެވެ. މިއީ އެކި ގޮތްގޮތަށް ލީކްކޮށްލެވިފައިވާ ބާރަ މިލިޔަން ކަރުދާސް ބަލައި ހާވައި ދިރާސާކޮށް ދުނިޔޭގެ އެކި ގައުމުތަކަށް ނިސްބަތްވާ އެތައް ހާސް ނޫސްވެރިން އެތަކެއް އަހަރު ބުރަ މަސައްކަތްތަކެއް ކޮށްގެން ތަހުގީގުކޮށް ތައްޔާރުކޮށްފައިވާ މަހާ ކަރުދާހެކެވެ. ޝާއިއު ކުރެވިފައިވަނީ މިއަހަރުގެ އޮކްޓޫބަރު މަހުގެ ތިންވަނަ ދުވަހުއެވެ.

މީގެ ބާރުގައި ދުނިޔޭގެ އެކި ގައުމުތަކުގައި ކުރިން ވެރިކަން ކުރެއްވި ބޭފުޅުންނާއި މިހާރު ކުރައްވަމުން ގެންދަވާ ބޭފުޅުންގެ ތެރެއިން 35 ލީޑަރަކު ވަނީ ބަރަހަނާ ވެފައެވެ. ރައީސުންނާއި ބޮޑުވަޒީރުންނާއި ވަޒީރުންނާއި މަހުޖަނުންނާއި ފަންނާނުންވެސް ހިމެނޭ ގޮތަށް މިއީ ދިގު ލިސްޓެކެވެ. ދިވެހިރާއްޖޭގައި 2013ން 2018ށް ރައީސްކަން ކުރެއްވި އަބްދުﷲ ޔާމީނޭ ކިޔުނު ބޭފުޅެއްގެ ނަންވެސް މި ކަރުދާސްތަކުގައި އާދެއެވެ. ތަހުގީގުކުރާ ނޫސްވެރިންގެ ގުޅިފައިވާ ބައިނަލްއަގުވާމީ ޖަމާއަތް ނުވަތަ އައިސީއައިޖޭގެ ފަރާތުން ބުނާ ގޮތުގައި މިއީ އެ ޖަމާއަތަށް މިހާތަނަށް ކުރެވުނު އެންމެ އަގުބޮޑު އެންމެ ބުރަ މަސައްކަތެވެ.

އައިސީއައިޖޭގެ ފަރާތުން 2016 ވަނަ އަހަރު ލީކުކޮށްލި ނުވަތަ ޝާއިއު ކުރި ޕެނަމާގެ ކަރުދާސްތަކަށްވުރެ ޕެންޑޯރާގެ ކަރުދާހުގައި ހިމެނޭ ތަފްސީލުތައް ގިނަވެފައި ލިސްޓުވެސް ދިގެވެ. ޔޫރަޕާއި އެފްރިކާޔާއި އޭޝިޔާއާއި ދެކުނު އެމެރިކާޔާއި މިހެންގޮސް ހަމަ ހުރިހާ ބައްރެއްގައި ވައްކަމާއި ފަސާދަ ގިރައިގެން ބޮއެގެން އަމިއްލަ ޖީބުތައް ބަރުކޮށްގެން ތިބި މަޝްހޫރު މީސްމީހުން ކޮށްފައިވާ ވައްކަމުގެ ވާހަކަ މީގައި ބަޔާންވެގެންވެއެވެ. އެގޮތުން ފުށްކޮޅެއް ގިރައިގެން ދިރުވައިލާ ބީދައިން ފުއްގިރީގެ މުއާމަލާތުގައި ޔާމީނު ހިންގެވި އަމަލުވެސް އޮތީ ހިމެނިފައެވެ. އައިސީއައިޖޭގެ ފަރާތުން ޝާއިއުކުރާ ކަރުދާހަށް އެކި ފަހަރު ކިޔަނީ އެކި ނަމެވެ. އެގޮތުން އެންމެ ފުރަތަމަ ޕެނަމާ ކަރުދާހެވެ. މިފަހަރު ޕެންޑޯރާ ކަރުދާހެވެ.

ޕެންޑޯރާއަކީ ކާކުބާވައެވެ. ޕެންޑޯރާ ކަރުދާހޭ ކިޔައި ނަންދިނީ ކީއްވެބާވައެވެ. ޕެންޑޯރާޔަކީ އެންމެ އިހުޒަމާނުގައި ޔޫނާނުގައި އުޅުނު އަންހެނެކެވެ. އެމީހާގެ ފިރިމީހާ މާވަރުގަދަ ފޮށްޓެއް ގެންގުޅުނެވެ. ދުނިޔޭގައި އެހާތަނަށް އުޅުނު މީހުންނާއި އަންނާންތިބި މީހުންގެ ސިއްރުތައްވެސް ފޮރުވިފައި ވަނީ އެފޮށީގައެވެ. އަދި އިންސާނުންނަށް އަންނާންއޮތް ކުދި ބޮޑު އެންމެހައި މުސީބާތްތަކާއި ވަބާތަކުގެ ސިއްރުވެސް ފޮރުވިފައި އޮތީ އެ ފޮށީގައެވެ. ފިރިމީހާ މަރުވީމާ ފޮށިތެރޭގައި ހުރީ ކޮން އެއްޗެއްކަން ދެނެގަތުމުގެ ޝައުގުވެރިކަމުގައި ޕެންޑޯރާ އެންމެ ފަހުން ފޮށި ހުޅުވައި އޭގެ ފިޔަންގަނޑު ހިއްލައިލީއެވެ. އެތެރޭގައި ހުރީ ކޮން އެއްޗެއްކަން އެނގުމަކާ ނުލައެވެ.

ކޮންމެއަކަސް ހުޅުވި ފިޔަންގަނޑާއެކު މީސްތަކުންގެ ސިއްރުތަކާއި ނަސީބާއި ބަދުނަސީބާއި މިހެންގޮސް ހުރިހާ އެއްޗެއް ބޭރުވެ ފެތުރިގެން ހިނގާއްޖެއެވެ. ޕެންޑޯރާގެ ބޮޑުފޮށި މަޝްހޫރުވެގެން ހިނގާއްޖެއެވެ. ގަދީމީ ޔޫނާނުގެ ފޯކްލޯރުތަކުގައި މިވާހަކަ ކިޔައި އުޅެނީ މިހެންނެވެ. އެހެންވީމާ އައިސީއައިޖޭގެ ކަރުދާހަކީ މީސްތަކުންގެ ވައްކަމާއި ފަސާދަޔާއި ރިޝްވަތާ ގުޅޭ ސިއްރު ހިމެނޭ ކަރުދާހެއް ކަމުގައިވާތީ މިއަށްވެސް ޕެންޑޯރާގެ ކަރުދާހޭ ކިޔައި ނަންދިނީއެވެ. ވަރަށް ގުޅޭ ވަރަށް މުނާސަބު ނަމެއް ކަމަށް ފެނެއެވެ. ވެރީންނޭ ކިޔައިގެން ގައުމުތަކުގެ ވެރިކަމަށް އެރި ބައެއް މީހުންނަކީ ވެރިން ނޫންކަމާއި އެއީ ވަގުންކަން އެނގެނީ މި ކަރުދާސްތަކުންނެވެ. މިއީ ވަކި ގައުމެއްގެ ވަކި މީހަކަށް އަމާޒުކޮށްގެން ވަކި ގައުމެއްގެ ވަކި ބަޔަކު ހިންގާފައިވާ ތަހުގީގެއް ނޫނެވެ. މިއީ މުޅި ދުނިޔޭގައި އަތްފުނާ އަޅައިގެން ކުރެވިފައިވާ ވަރަށް ބުރަ މަސައްކަތެކެވެ.

ރައީސް ޔާމީނުގެ ޚިޔާނާތާއި ގުޅޭ އެކިއެކި ފައިލްތައް އޭސީސީ އާއި ވައްކަމާއިބެހޭ ކޮމިޝަނާއި ފުލުހުންނާއި މިހެންގޮސް ދައުލަތުގެ ކަމާ ގުޅޭ މުއައްސަސާތަކުން ހާމަކޮށް ކޯޓަށް ފޮނުވީމާ ޔާމީނުގެ އައުވާނުންނާއި ހެޔޮއެދޭ މީހުން ބުނެއެވެ. ތިޔައީ އެމަނިކުފާނުގެ އަގު ވައްޓައިލުމަށް މިސަރުކާރުން ހިންގާ ޖަރީމާއެކެވެ. އެއީ ތިޔަފަދަ ކަންކަމާ އަރަފޯދިގެންވާވަރަށް ވުރެ ބަނިޔާދަންކަން ބޮޑު މާތް އަބުރުވެރި ބޭފުޅެކެވެ. މިފަހަރުގެ ޕެންޑޯރާ ކަރުދާސްތަކަކީ ދިވެއްސަކު ޝާމިލްވި މަސައްކަތެއް ނޫނެވެ. އެހެންވީމާ ސަރުކާރަށް އަމާޒު ކުރެވޭނޭ އިނގިއްޔެއް ނެތެވެ. އެހެންވެ އެވެރިން މިފަހަރު އައު ދިމާލަކަށް އިނގިލި އަމާޒުކޮށްފިއެވެ. އެބަބުނެއެވެ. ތިޔައީ އިންޑިޔާގެ ރޭވުމެކެވެ. އިންޑިޔާގެ ކަމެކެވެ.

މީހަކު އަޖައިބެެއް ނުވާނޭ ބާވައެވެ. މި ކަރުދާސްތަކާ ހެދި އިންޑިޔާވެސް އޮތީ ހާސްކަމެއްގެ ތެރޭގައެވެ. އެގައުމުގެ އެތައް ބަޔަކުވެސް މިކަރުދާހުގެ ސަބަބުން އެތިބީ ބަރަހަނާ ވެފައެވެ. ވެރިކަންކުރާ ބީޖޭޕީގެ ތެރެއިންވެސް މެއެވެ. އެމެރިކާޔަކާއި ކެންޔާއަކާއި ޗެކްރިޕަބްލިކަކާއި ޖޯޑަންއަކާއި ޕާކިސްތާނެއްވެސް އޮތީ މި ހާސްކަމުގައެވެ. އެވަރުންވެސް މިވެރީން މިއުޅެނީ ޔާމީނުގެ ބަނިޔާދަންކަމަށް އީމާންވެގެންނެވެ. ކޮންމެ ބަޔަކު ބުންޏަސް، ކޮންމެ ކަހަލަ ހެއްކެއް ފެނުނަސް، ދިމާކުރިމަތިން ހެކި ފެނުނަސް އަދި ޔާމީނުގެ އަމިއްލަ އަނގައިން އިއުތިރާފުވިޔަސް މި ޔަގީންކަމަށް ގުޑުމެއް ނާރައެވެ. އަމިއްލަ އެދުމާއި އަމިއްލަ މަސްލަހަތުގައި ބަޔެއްގެ ހިތްތައް ގައުވާނީ ދެން މިހައިވަރަށެވެ.