ވެމްކޯއިން ކުޅުދުއްފުށީ ސިޓީއަށް ޑަސްބިން ހަދިޔާ ކޮށްފި
7 ޑިސެމްބަރު 2021 | އަންގާރަ 17:10ވެމްކޯއިން 10 ޑަސްބިން ކުޅުދުއްފުށީ ސިޓީއަށް ހަދިޔާ ކުރި
ވެމްކޯއިން ކުޅުދުއްފުށީ ސިޓީ ކައުންސިލަށް ޑަސްބިން ހަދިޔާކުރުން
ވޭސްޓް މެނޭޖްމަންޓް ކޯޕަރޭޝަން، (ވެމްކޯ)އިން ކުޅުދުއްފުށި ސިޓީއަށް ޑަސްބިން ހަދިޔާކޮށްފިއެވެ.
މި ޑަސްބިންތައް ހަދިޔާ ކޮށްފަައިވަނީ އަންގާރަދުވަހުގެ ވަގުތެއްގައެވެ. ވެމްކޯއިން މައުލޫމާތު ދެއްވިގޮތުގައި މިއީ އެކުންފުނީގެ އިޖުތިމާއީ ޒިންމާގެ ދަށުން ހަދިޔާ ކުރި ޑަސްބިންތަކެކެވެ.
އެ ކުންފުނީގެ ފަރާތުން މިޑަސްބިންތައް ހަވާލުކޮށްދެއްވީ އެކުންފުނީގެ މެނޭޖިން ޑިރެކްޓަރު އާދަމް މުހައްމަދެވެ. ޑަސްބިންތަކާ ހަވާލުވެވަޑައިގަތީ ރައްޔިތުން މަޖިލީހުގެ ކުޅުދުއްފުށި ސިޓީ އުތުރު ދާއިރާގެ މެންބަރު ޔާސިރު އަބުދުއްލަތީފެވެ.
ވެމްކޯއިން ބުނި 10 ޑަސްބިން ކުޅުދުއްފުށީ ސިޓީއަށް ހަދިޔާ ކުރެވުނުކަމަށާއި، މި ޑަސްބިންތައް ބޭނުން ކުރާނީ އެރަށުގެ ސްކޫލްތަކުގައި ކަމަށެވެ.
ވެމްކޯއިން އަންނަނީ އެކި ރަށްތަކުގައި ގިނަދުވަސްވެ ޖަމާވެފައި ހުރި ކުނިތައް ހުސްކުރުމުގެ މަސައްކަތް ކުރަމުންނެވެ. އެގޮތުން ކުޅުދުއްފުށީ ސިޓީގެ ކުނިކޮށި ހުސްކުރުމުގެ މަސައްކަތްވެސް ވެމްކޯއިން ދަނީ ކުރަމުންނެވެ. އަދި އަންނަ އަހަރު ކުޅުދުއްފުށީ ސިޓީގެ ކުނިކޮށި މެނޭޖްކޮށް ބެލެހެއްޓުމަށް ވެމްކޯއަށް ހަވާލުކުރުމަށް ކުޅުދުއްފުށީ ސިޓީ ކައުންސިލުންވަނީ ނިންމާފައެވެ.
