ހިޔާފްލެޓު ސަރަޙައްދުގައި ބާއްވާ "ކޮތަރުކޮށި" ޖަލްސާގައި ރައީސް ޔާމީނު ބައިވެރިވެވަޑައިގަންނަވަނީ
ރައީސް ޔާމީނު ގެންދަވަނީ ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވަމުން
އަންގާރަ ދުވަހު ޕްރޮގްރެސިވް ކޯލިޝަނުން ބޭއްވި ޖަލްސާގެ ތެރެއިން
ޕްރޮގްރެސިވް ކޮންގްރެސް ކޯލިޝަނުން ހުޅުމާލޭ ފޭސް 2 ގެ ހިޔާފްލެޓު ސަރަޙައްދުގައި ބާއްވާ "ކޮތަރުކޮށި" ޖަލްސާގައި ކުރީގެ ރައީސް އަބްދުﷲ ޔާމީނު ބައިވެރިވެވަޑައިގަންނަވާނެ ކަމަށް އެ ކޯލިޝަނުން ބުނެފިއެވެ.
އަންގާރަ ދުވަހު ޕްރޮގްރެސިވް ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން ޕީއެންސީގެ ނާއިބްރައީސް އިބްރާހިމް ޝުޖާއު ވިދާޅުވީ، ޑިސެމްބަރު 10 ވާ ހުކުރު ދުވަހުގެރޭ 08:30 ގައި ހިޔާފްލްޓުގެ "ހިޔާ ޕާކް" ސަރަޙައްދުގައި މި ޖަލްސާ އޮންނާނެ ކަމަށެވެ. އެގޮތުން މިއީ ހިޔާފްލެޓު މަޝްރޫއުގެ ބިންގާ ރައީސް ޔާމީނު އެންމެ ފުރަތަމަ އެޅުއްވި ސަރަޙައްދުކަމަށް ޝުޖާއު ވިދާޅުވިއެވެ. މި ޖަލްސާގައި ރައީސް ޔާމީނު ހުޅުމާލޭ ރައްޔިތުންނާ ބައްދަލު ކުރެއްވުމަށް ހަމަޖެހިފައިވާއިރު، ޝުޖާއު ވަނީ އިދިކޮޅު ކޯލިޝަނަށް ތާއީދު ކުރާ ހުރިހާ ފަރާތްތަކުން ޖަލްސާގައި ބައިވެރިވުމަށް އެދިފައެވެ.
އޭގެ އިތުރުން، އިންޑިއާ ސިފައިން ރާއްޖޭގައި ތިބުމާއި ދެކޮޅު ހުރިހާ ފަރާތްތަކުންވެސް މި ޖަލްސާގައި ބައިވެރިވުމަށް ޝުޖާއު އެދިފައިވެއެވެ. މިއީ މުހިއްމު ޖަލްސާއެއް ކަމަށާއި، ދުރާލާ ތައްޔާރުވެގެން ޖަލްސާއަށް އައުމަށް އެދޭކަމަށް އެ ޕާޓީން ބުނެއެވެ.
އޭގެ އިތުރުން، ރާއްޖޭގައި ތިބޭ އިންޑިއާގެ ސިފައިން ރާއްޖެ އިން ބޭރުކުރަން ގޮވާލައި އެކުލަވާލާފައިވާ "އިންޑިއާ އައުޓް" ޕެޓިޝަނަށް ސޮއި ހޯދުމަށް ރައީސް ޔާމީނު އަތޮޅުތެރޭގެ ރަށްރަށަށް ދަތުރު ކުރެއްވުމަށް ހަމަޖެހިފައިވާކަމަށްވެސް ޝުޖާއު މީގެ ކުރިން ވިދާޅުވެފައިވެއެވެ. އެގޮތުން އެމަނިކުފާނާ ރަށްރަށަށް ދަތުރުކުރައްވާނެ ކަމަށެވެ. މި ދަތުރުތަކުގައި އިދިކޮޅުގެ އިސްވެރިން ވެސް ބައިވެރިވާނެކަމަށް ޝުޖާއު ވަނީ ވިދާޅުވެފައެވެ.
މި ޕެޓިޝަނަށް ސޮއި ހޯދުމުގެ މަސައްކަތް އިދިކޮޅުން ފުޅާކޮށްފައިވާއިރު، ކޮލަމްބޯ އިންފޮރމޭޝަން އޭޖެންސީން 30 އޮކްޓޯބަރުގައި އާންމުކޮށްފައިވާ ރިޕޯޓަކާ ހަވާލާދީ ލަންކާގެ ޓޭލް ސިލޯން ނޫހުން ރިޕޯޓު ކޮށްފައިވާ ގޮތުގައި، 2019 ވަނަ އަހަރުން ފެށިގެން ސޯޝަލް މީޑިއާގައި ފަތުރަމުން އަންނަ އިންޑިއާ އައުޓް ހޭޝްޓެގް ފަތުރަމުންދާ އައިޑީތަކުގެ ތެރެއިން ގިނައީ ފޭކް (ބޮޓް) އައިޑީތަކެވެ. އެގޮތުން ގާތްގަނޑަކަށް 60،000 އެއްހާ ފަހަރު މި ހޭޝްޓެގް ޓްވިޓަރ ގައި ދައުރުކޮށްފައިވާއިރު، އެއީ 2000އެއްހާ އައިޑީން ކޮށްފައިވާ ޕޯސްޓުތައްކަން މި ރިޕޯޓުގައި ބަޔާންކޮށްފައިވެއެވެ.
ރިޕޯޓުގައި ބަޔާން ކޮށްފައިވާ ގޮތުން މިއީ އިންޑިއާއާމެދު ނަފްރަތު އުފެއްދުމުގެ މަގުސަދުގައި, މަދު ބަޔަކު އަޑީގައި ތިބެގެން ހިންގަމުންދާ ހޭޝްޓެގެކެވެ.
ކުރީގެ ރައީސް އަބްދުﷲ ޔާމީނުގެ މައްޗަށް އިއްވާފައިވާ ޖަލު ޙުކުމް ސުޕްރީމް ކޯޓުން ބާތިލު ކޮށްފައިވަނީ މިދިޔަ ނޮވެމްބަރު މަހުގެ 30 ވަނަ ދުވަހުއެވެ. އެހެންނަމަވެސް، ރ ފުއްގިރި ޚިޔާނާތުގެ މައްސަލައާއި، ވ އާރަށުގެ މައްސަލައިގައި ރައީސް ޔާމީނުގެ މައްޗަށް ވަނީ ރިޝްވަތާއި މަނީ ލޯންޑަރިންގ ގެ އިތުރު ދައުވާތަކެއް އުފުލާފައެވެ.
ޖަލު ޙުކުމުން މިނިވަންވެވަޑައިގެން ސިޔާސީ ޙަރަކާތްތަކުގައި ބައިވެރިވެވަޑައިގަންނަވަމުން ގެންދަވާއިރު، ރައީސް ޔާމީނު ގެންދަވަނީ ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވަމުންނެވެ. އަދި 2023 ގެ ރިޔާސީ އިންތިޚާބާއި ގުޅޭ ގިނަ ވާހަކަތަކެއްވެސް ގެންދަނީ ދައްކަވަމުންނެވެ.
