ޖަލުގައި ތިބި ބަންގްލަދޭޝް ކުށްވެރިން ފޮނުވާލުމަށް ދެ ޤައުމުގެ މެދުގައި އެއްބަސްވުމެއް ހަދަނީ
7 ޑިސެމްބަރު 2021 | އަންގާރަ 07:49ރާއްޖޭގެ ޖަލުތަކުގައި ބަންގްލަދޭޝްގެ 100 އެއްހާ މީހުން އެބަތިބި
ޖަލުގައިތިބި ބަންގްލަދޭޝް ކުށްވެރިން ފޮނުވާލުމަށް ދެ ޤައުމުގެ ދެމެދުގައި އެއްބަސްވުމެއް ހެދުމުގެ މަސައްކަތް ދަނީ ކުރަމުން
ޖަލުގައިތިބި ބަންގްލަދޭޝް ކުށްވެރިން ފޮނުވާލުމަށް ދެ ޤައުމުގެ މެދުގައި އެއްބަސްވުމެއް ހެދުމުގެ މަސައްކަތް ކުރަމުން ގެންދާކަމަށް މިނިސްޓްރީ އޮފް ހޯމް އެފެއާޒުން ބުނެފިއެވެ.
ރާއްޖެއެމްވީއާ ވާހަކަ ދައްކަވަމުން ހޯމް މިނިސްޓްރީގެ ޑިރެކްޓަރ ކޮމިއުނިކޭޝަން ހަފްސީ އަބްދުﷲ ވިދާޅުވީ، ޖަލުގައި ޙުކުމް ތަންފީޒު ކުރަމުންދާ ބަންގްލަދޭޝް ކުށްވެރިން އަނބުރާ އެ ޤައުމަށް ފޮނުވާލުމަށްޓަކައި ދެ ޤައުމުން އެކުލަވާލާ އެއްބަސްވުން ޑްރާފްޓް ކުރުމުގެ މަސައްކަތް މިހާރު ސަރުކާރުން ކުރަމުންދާ ކަމަށެވެ. އެހެންނަމަވެސް، އެގޮތަށް ފޮނުވާލެވޭނީ ވަކި ޝަރުތުތަކެއްގެ ދަށުންކަން ފާހަގަކުރައްވައި ހަފްސީ ވިދާޅުވީ، އެއްބަސްވުން ފައިނަލްވެގެން އަންނައިރު އެ ޝަރުތުތައް ތަފްސީލުވެގެންދާނެ ކަމަށެވެ. އެގޮތުން ކޯޓުގެ މަރުޙަލާތައް ފުރިހަމަކޮށްފައިވުމާއި، ޙުކުމުގެ ބައެއް ތަންފީޒު ކުރުން ފަދަ ޝަރުތުތައް ޑްރާފްޓް ކުރުމުގެ މަރުޙަލާގައި މަޝްވަރާ ކުރެވެމުންދާކަން އޭނާ ފާހަގަ ކުރެއްވިއެވެ.
ހަފްސީ އެހެން ވިދާޅުވެފައިވާއިރު، ރާއްޖޭގެ ޖަލުތަކުގައި ބަންގްލަދޭޝްގެ 100 އެއްހާ މީހުން އެބަތިބި ކަމަށާއި، އޭގެ ތެރެއިން ބައެއް މީހުން އެ ގައުމަށް އަނބުރާ ފޮނުވާލުމުގެ މަސައްކަތް ކުރަމުން އަންނަ ކަމަށް ރާއްޖޭގައި ހުންނަވާ ބަންގްލަދޭޝްގެ ސަފީރު މުހައްމަދު ނަޒުމުލް ހަސަންވެސް ދާދި ފަހުން ވަނީ ވިދާޅުވެފައެވެ.
މިހާ ހިސާބަށް ހޯދުނު ހޯދުންތަކުން ރާއްޖޭގައި 281،000 ބިދޭސީން އެބަތިބި ކަމަށް ތަފާސްހިސާބުތަކުން ދައްކައެވެ. އޭގެ ތެރެއިންވެސް ގިނައީ ބަންގްލަދޭޝްއަށް ނިސްބަތްވާ ރައްޔިތުންނެވެ. ވަކިން ޚާއްސަކޮށް ޤަވާއިދާ ޚިލާފަށް ރާއްޖޭގައި އުޅެމުންދާ ބަންގްލަދޭޝް ރައްޔިތުން އޭގެ ތެރޭގައި ގިނަކަން ފާހަގަކުރެވެއެވެ.
ރާއްޖޭގެ، ޖަލުތަކުގެ ޙާލަތުވެސް މިހާރަށްވުރެ ރަނގަޅު ކުރަން ޖެހިފައިވާއިރު، ޖާގައަށް ވުރެ އިތުރަށް 33 އިންސައްތަ ގައިދީން މާލޭ ޖަލުގައި އެބަތިބިކަމަށް ކަރެކްޝަންސުން މީގެ ކުރިން ވަނީ ބުނެފައެވެ. ކަރެކްޝަންސުން މައުލޫމާތު ދޭ ގޮތުގައި ޖަލުގެ ޖާގައަށްވުރެ މީހުން އިތުރުވެފައިވަނީ ޝަރީއަތް ނިމެންދެން ބަންދުގައި ތިބި މީހުންގެ އަދަދު އިތުރުވެ، ޝަރީއަތްތައް ނުނިމި ލަސްވަމުންދާތީއެވެ. އޭގެ ތެރޭގައި ރިމާންޑް ޖަލުތަކުގެ ޖާގައިގެ ދަތިކަމާހެދި ރިމާންޑްޖަލަކަށް ބަދަލު ނުކުރެވި ތިބި މީހުން ވެސް ހިމެނޭއިރު، ބިދޭސީންވެސް އޭގެ ތެރޭގައި ހިމެނެއެވެ.
ކަރެކްޝަންސުން ބަލަހައްޓަމުންދާ ޖަލުތަކުގައި ތިބި ޤައިދީންގެ 70 އިންސައްތަ އަކީ މަސްތުވާތަކެއްޗާ ގުޅުންހުރި މައްސަލަތަކުގައި ބަންދުކޮށްފައި ތިބި މީހުންނަށްވާއިރު، މިފަހުންވެސް މަސްތުވާތަކެތީގެ ބޮޑެތި އެކި މައްސަލަތަކުގައި ބަންގްލަދޭޝް ރައްޔިތުންވެސް ހައްޔަރުކޮށްފައިވެއެވެ.
