މިއަހަރު މަސްވެރިންގެ ދުވަހުގެ ކުލަގަދަ ހަރަކާތްތައް ގާފަރުގައި
ފަރުމަސްވެރިކަމުގެ މުބާރާތް ތާވަލް ކުރެވިފައި ވަނީ ޑިސެމްބަރު ނުވަވަނަ ދުވަހަށް
މަސް ދޯނިތަކެއް.
ދިވެހި ރާއްޖޭގައި ކޮންމެ އަހަރެއްގެ ޑިސެމްބަރު 10 ވަނަ ދުވަހު މަސްވެރިންގެ ދުވަސް ފާހަގަކުރާއިރު، މިއަހަރުގެ މަސްވެރިންގެ ދުވަސް ފާހަގަކުރުމަށް ހަމަޖެހިފައި ވަނީ ކ. ގާފަރުގައެވެ.
ފިޝެރީޒް މިނިސްޓްރީ އާއި ގާފަރު ކައުންސިލުން ގުޅިގެން މިއަހަރު މަސްވެރިންގެ ދުވަސް ފާހަގަކުރާއިރު، ޑިސެމްބަރު އަށްވަނަ ދުވަހު ފިޝަރީޒް މިނިސްޓްރީން ގާފަރުގައި މަސްވެރިންގެ ފޯރަމް ހުޅުއްވައިދެއްވުމަށް ވަނީ ހަމަޖެހިފައެވެ. އަދި ޑިސެމްބަރު ނުވަވަނަ ދުވަހު ފިޝަރީޒް މިނިސްޓްރީން ގާފަރުގައި އެކްސްޕޯ ހުޅުއްވައިދެއްވާއިރު، ކ އަތޮޅަށް ހުޅުވައިލައިގެން ފަރުމަސްވެރިކަމުގެ މުބާރާތެއްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މީގެ އިތުރުންވެސް ޑިސެމްބަރ ދިހަވަނަ ދުވަހު ރައީސުލްޖުމްހޫރިއްޔާ ޝަރަފުވެރި ކޮށްދެއްވާ، ގާފަރު ރައްޔިތުންނަށް ޚާއްސަ މަސްކެނޑުމުގެ މުބާރާތެއް ބޭއްވުމަށް ވަނީ ހަމަޖެހިފައެވެ. މި މުބާރާތުގައި ހޮވަން ހަމަޖެހިފައިވާ ވަނަތަކަކީ ފިރިހެނުންގެ ބައިން މުބާރާތުގައި ކަނޑަން ހަވާލުކުރާ ދެ މަސް ފުރިހަމައަށް އެންމެ އަވަހަށް ކަނޑާ ނިންމާ ފަރާތްތަކުގެ ތެރެއިން އެއްވަނަ، ދެވަނަ އަދި ތިންވަނަ އާއި އަންހެނުންގެ ބައިން މުބާރާތުގައި ކަނޑަން ހަވާލުކުރާ ދެ މަސް ފުރިހަމައަށް އެންމެ އަވަހަށް ކަނޑާ ނިންމާ ފަރާތްތަކުގެ ތެރެއިން އެއްވަނަ، ދެވަނަ އަދި ތިންވަނައެވެ. މި މުބާރާތުން ވަނަތަކަށް ދާ ފަރާތްތަކަށް އިނާމެއްގެ ގޮތުން ބީއެމްއެލް އިން ވައުޗަރ ކާޑު ވަނީ ހުށައަޅާފައެވެ.
ކ އަތޮޅަށް ޚާއްސަކޮށް ބާއްވަން ހަމަޖެހިފައިވާ ފަރުމަސްވެރިކަމުގެ މުބާރާތުގައި ބައިވެރިވާ ގްރޫޕުތަކުގައި މަދުވެގެން ހަތަރު ބައިވެރިން އަދި ގިނަވެގެން ދިހަ ބައިވެރިންނަށް ބައިވެރިވެވެއެވެ. އަދި ކޮންމެ ގުރޫޕެއްގައިވެސް އެއް ކަނބަލަކު ހިމަނަންޖެހޭކަމަށް ގަވާއިދުގައިވެެއެވެ. މުބާރާތުގައި ބައިވެރިވާ ހުރިހާ އަންހެން ބައިވެރިންނަށް ހަދިޔާއެއް ދޭ ގޮތަށް މިނިސްޓްރީން ވަނީ ނިންމާފައެވެ. މުބާރާތުން އެއްވަނައަށް ދާ ގުރޫޕަކަށް ދިހަހާސް ރުފިޔާގެ ގިފްޓް ކާޑެއް ހުށައަޅައިފައި ވާއިރު ދެވައަށް ދާ ގުރޫޕަކަށް ހަތަރުހާސް ރުފިޔާ އަދި ތިންވަނައަށް ދާ ގުރޫޕަކަށް ދެހާސްރުފިޔާގެ ގިފްޓް ކާޑެއްވަނީ ހުށައަޅާފައެވެ.
ކޮވިޑް 19 ގެ ސަބަބުން 2020 ވަނަ އަހަރު މަސްވެރިންގެ ދުވަސް ފާހަގަކޮށްފައިވަނީ ވާޗުއަލްކޮށެވެ.
