އަންގްސަން ސޫކީ 4 އަހަރަށް ޖަލަށް

މަގާމުން ދުރުކޮށްފައިވާ މިޔަންމާގެ ލީޑަރު އަންގްސަން ސޫކީގެ މައްޗަށް 4 އަހަރުގެ ޖަލު ޙުކުމެއް މިޔަންމާ ކޯޓަކުން އިއްވައިފިއެވެ.

ސޫކީގެ މައްޗަށް ގިނަ ދައުވާތަކެއް އުފުލައި ޝަރީއަތް ހިންގަމުންގެންދާއިރު، މިއީ އަދި އޭނާގެ މައްޗަށް އުފުލާފައިވާ ދައުވާތަކަށް ބަލާއިރު ކުޑަ މިންވަރެއްކަމަށް ބޭރުގެ މީޑިއާތަކުން ރިޕޯޓު ކޮށްފައިވެއެވެ. އެގޮތުން ކޮވިޑުގެ ތެރޭގައި އަޅާފައިވާ ފިޔަވަޅުތަކާ ޚިލާފުވިކަމުގެ ކުށް ސާބިތުވެ، އޭނާގެ މައްޗަށް ޖުމްލަ 11 ދަޢުވާއެއް އުފުލާފައިވެއެވެ. ސޫކީ ވަނީ އެ ހުރިހާ ދައުވާތަަކަށްވެސް އިންކާރު ކޮށްފައެވެ.

ނިމިދިޔަ އިންތިޚާބު ސޫކީ ކާމިޔާބު ކުރެއްވީ އޮޅުވާލައިގެން ކަމަށްވެސް އޭނާގެ މައްޗަށް ތުހުމަތުކޮށް ދަޢުވާ އުފުލާފައިވެއެވެ. އެހެންނަމަވެސް، އިންތިޚާބުގެ ކަންކަން މޮނިޓަރ ކުރެއްވި މިނިވަން އޮބްޒާވަރުން ވަނީ އިންތިޚާބުގެ ކަންކަން ދިޔައީ އެންމެ ފުރިހަމައަށްކަން ފާހަގަ ކުރައްވައި އެ ދަޢުވާތަކަކީ ސިޔާސީ ދަޢުވާތަކެއްގެ ގޮތުގައި ސިފަ ކުރައްވާފައެވެ.

އަދި އޭނާގެ މައްޗަށް ވަނީ، ގާނޫނާ ޚިލާފަށް ވޯކީ ޓޯކީ ރޭޑިއޯ މިޔަންމާއަށް އެތެރެކޮށް ގެންގުޅުމުގެ ދަޢުވާވެސް އުފުލާފައެވެ. ޢަދި މިޔަންމާގެ އޮފިޝަލް ސީކްރެޓް ގާނޫނާ ޚިލާފުވުމުގެ ދަޢުވާވެސް ކޮށްފައިވާއިރު، މި ދަޢުވާތައް އޭނާގެ މައްޗަށް ސާބިތު ވެއްޖެނަމަ 14 އަހަރު ދުވަހުގެ ޖަލު ހުކުމެއް އަންނާނެއެވެ.

ސޫކީގެ އިތުރުންވެސް އެ ޤައުމުގެ 15 މީހެއްގެ މައްޗަށް ދަޢުވާ އުފުލާފައިވެއެވެ.

ސޫކީގެ ދަރިންނާއި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔިތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދަކުރުމުގެ ފުރުސަތުވަނީ ގެއްލިފައެވެ. ބަޣާވާތަކުން ވެރިކަން ބަދަލުކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.