ތައިލެންޑް ރަސްގެފާނުގެ ފޮޓޯފުޅެއް ފޭސްބުކްގައި ޝެއަރކޮށްގެން ދަރިވަރަކު ޖަލަށްލައިފި

އެކްޓިވިސްޓެއްގެ ގޮތުގައި އުޅެމުންދާ ތައިލެންޑްގެ ދަރިވަރަކު އެ ގައުމުގެ ރަސްގެފާނު މަހާ ވަޖިރަލޮންކޯންގެ ޕްރޮފައިލް ފޮޓޯއެއް ފޭސްބުކްގައި ޝެއަރކުރުމުން ދެ އަހަރާ ބައިގެ ޖަލު ހުކުމެއް އިއްވައިފިއެވެ.

ޖަޓޫޕަޓް ބޫންޕައްޓަރަކްސަގެ މައްޗަށް ސާބިތުވެފައިވަނީ ރަސްގެފާނުގެ އަބުރުފުޅަށް އަރައިގަތްކަމަށެވެ.

އޭނާ ހައްޔަރު ކުރީ 2016 ވަނަ އަހަރު ރަސްގެފާނު ތަޚުތައް އިސްވެ ވަޑައިގެންނެވިތާ ދެވަނައަށްވީ ދުވަހު ބީބީސީ ތައިލެންޑުން ޕަބްލިޝްކުރި ފޮޓޯއެއް ޝެއަރ ކުރުމުންނެވެ.

ތައިލެންޑްގައި ގަދަރު ކުޑަކުރުމަކީ ގާނޫނުގައި ހަރުކަށި އަދަބު ކަނޑައެޅިފައިވާކަމަކަށް ވާއިރު ރަސްގެފާނަށް އެއްވެސް ބާވަތެއްގެ ފާޑެއް ކިޔުމަކީ މަނާކަމެކެވެ.

އަސްކަރިއްޔާގެ މަދަދާއެކު ހިންގާ ސަރުކާރާ ދެކޮޅު ޖަޓުޕަޓް މީގެ ކުރިން އެތައް މުޒާހަރާތަކެއްގައި ބައިވެރިވެފައިވާއިރު ގާނޫނުގެ އެ މާއްދާއިން އަދަބު ކަނޑައެޅުނު ފުރަތަމަ މީހަކީ އޭނާއެވެ.

އޭނާއަކީ އުމުރުފުޅުން 64 އަހަރުފުޅުގެ ވަޖިރަލޮންގކޯންގެ ޕްރޮފައިލް އޮންލައިންގައި ޝެއަރކުރި 2،600 އަށްވުރެ ގިނަ މީހުންގެ ތެރެއިން އެކަކެވެ.

ޖަޓުޕަޓްގެ މައްޗަށް ރަސްގެފާނުގެ އަބުރާ ބެހުނުކަމަށް ބުނެ ދައުވާ އުފުލައި ޑިސެމްބަރު މަހުން ފެށިގެން އޭނާ ހުރީ ތައިލެންޑްގެ އިރުއުތުރުގައި ބަންދުކޮށްފައެވެ.

ކަފާލާތުގެ ދަށުން އޭނާ ދޫކޮށްލުމަށް 10 ފަހަރެއްގެ މަތިން ހުށަހެޅި ހުށަހެޅުމަށް ކޯޓުންވަނީ ދެކޮޅުހަދާފައެވެ.