އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ޖެނޯއާ ބަލިކޮށް ތާވަލުގެ ފަސްވަނައަށް ޔުވެންޓަސް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ ޖެނޯއާ އަތުން 2-0 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ޔުވެންޓަސްއިން ވަނީ ލީޑު ނަގާފައެވެ. މެޗު ފަށައިގެން ނުވަވަނަ މިނެޓުގައި ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ހުއާން ކުއަޑްރާޑޯއެވެ. އޭގެ ފަހުން ފުރަތަމަ ހާފުގައި ޔުވެންޓަސްގެ ފެޑެރީކޯ ބެނަޑެސްކީ އާއި، މަތިއަސް ޑި ލީޓް އަދި އަލްވާރޯ މޮރާޓާ ފޮނުވާލި ނުރައްކާތެރި ހަމަލާތައް ޖެނޯއާގެ ގޯލްކީޕަރު ސަލްވަޓޯ ސިރިގޫ ވަނީ ދިފާއުކޮށްފައެވެ.

މި މެޗުގެ ދެވަނަ ހާފުގެ ކުރީކޮޅު ޔުވެންޓަސްގެ ޕައުލޯ ޑިބާލާ ފޮނުވާލި ހަމަލާއެއް ގޯލުގެ ހުރަސް ދަނޑި ކައިރިން ބޭރަށް ދިޔައިރު، އޭރިއާ ތެރެއިން އެ ޓީމުގެ މޮރާޓާ ފޮނުވާލި ހަމަލާއެއް ޖެނޯއާގެ ގޯލްކީޕަރު ސިރިގޫ ވަނީ ހުއްޓުވާފައެވެ. އަދި އޭގެ ފަހުން ކައުންޓަ އެޓޭކެއްގައި ޑިބާލާއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާގެ ހުރަހަކަށްވެސްވީ މެޗުގައި މޮޅު ކުޅުމެއް ދެއްކި ޖެނޯއާގެ ގޯލްކީޕަރު ސިރިގޫއެވެ.

އެކަމަކު މެޗުގެ 82 ވަނަ މިނެޓުގައި ޔުވެންޓަސްއިން ވަނީ ލީޑު ފުޅާކޮށްފައެވެ. ބެނަޑެސްކީ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑިބާލާއެވެ.

މި މޮޅާއެކު ތާވަލުގެ ފަސްވަނައަށް ޔުވެންޓަސް ޖެހިލިއިރު، އެ ޓީމަށް ވަނީ ކުޅުނު 16 މެޗުން 27 ޕޮއިންޓް ލިބިފައެވެ. ތާވަލުގެ ހަވަނައިގައި އޮތް ފިއޮރެންޓީނާއަށްވެސް 16 މެޗުން 27 ޕޮއިންޓް ލިބިފައިވީ ނަމަވެސް، ޔުވެންޓަސްއަށް ކުރި ލިބެނީ ލަނޑުގެ ތަފާތުންނެވެ. މީގެ އިތުރުން ޔުވެންޓަސް އަތުން ބަލިވި ޖެނޯއާ އޮތީ ތާވަލުގެ ފުލުން ތިންވަނައިގައި 16 މެޗުން 10 ޕޮއިންޓާއެކުއެވެ.