ސައުދީ އަރަބިއްޔާއިން ޕާކިސްތާނަށް 3 ބިލިއަން ޑޮލަރުގެ ލޯނެއް ދީފި
ދެކުނު އޭޝިޔާގެ ގައުމުތަކަށް ވަނީ އިގްތިޞާދީ ގޮތުން ބޮޑެތި ގޮންޖެހުންތަކާއި ކުރިމަތިވެފައި
2019 ވަނަ އަހަރު ޕާކިސްތާނުގެ ބޮޑުވަޒީރު އިމްރާން ޚާނާއި ސައުދީ ވަލީއަހުދު ބައްދަލުކުރައްވަނީ
ސައުދީ އަރަބިއްޔާއިން ޕާކިސްތާނަށް 3 ބިލިއަން އެމެރިކާ ޑޮލަރުގެ ލޯނެއް ދީފިއެވެ.
އެކަން ހާމަކުރަމުން ޕާކިސްތާނުގެ ބޮޑުވަޒީރުގެ ފައިނޭންސް އެޑްވައިޒަރ ވިދާޅުވީ ހޮނިހިރު ދުވަހު ސައުދީ އަރަބިއްޔާއިން ޕާކިސްތާނަށް ދޫކުރި ލޯނު އެގައުމަށް ލިބިފައިވާކަމަށެވެ. އަދި މިއީ އެގައުމުގެ އެކޮނޮމިކް ސަޕޯޓް ޕެކޭޖަށް ލިބުނު ފައިސާކަމަށް އެޑްވައިޒަރ ވިދާޅުވިއެވެ.
ދެކުނު އޭޝިޔާގެ ގައުމުތަކަށް ވަނީ އިގްތިޞާދީ ގޮތުން ބޮޑެތި ގޮންޖެހުންތަކާއި ކުރިމަތިވެފައެވެ. ވަކިން ޚާއްސަކޮށް ތަކެތީގެ އަގު ބޮޑުވުމާއި، ލިބޭ އާމްދަނީ އާ ނުބައްދަލު ވާވަރަށް ޚަރަދުކުރަންޖެހި ޑިފެސިޓް ބޮޑުވުމާއި އަމިއްލަ ގައުމުގެ ފައިސާގެ އަގު ދަށަށްދިޔުން ފަދަ މައްސަލަތައް އަންނަނީ ދިމާވަމުންނެވެ.
ޕާކިސްތާނުގެ ސެންޓްރަލް ބޭންކުގެ ޑާޓާތަކަށް ބަލާއިރު އެގައުމުގެ ފޮރިން ރިޒަރވްގައި ހުރީ 22،498 ބިލިއަން ޑޮލަރެވެ.
ޕާކިސްތާނުގެ ބޮޑުވަޒިރު އިމްރާން ޚާންގެ ފައިނޭންސް އެޑްވައިޒަރ ޝައުކަތު ތާރިން ކުރެއްވި ޓްވީޓެއްގައި ވަނީ ސައުދީން މިދަނޑިވަޅުގައި ޕާކިސްތާނަށް ފޯރުކޮށްދިން އެހީތެރިކަމަށް ސައުދީގެ ވަލީއަހުދު މުހައްމަދު ބިން ސަލްމާން އާއި ސައުދީގެ ރަސްކަމުގެ ދަރުބާރަށް ޝުކުރު އަދާކުރައްވާފައެވެ.
މިދިޔަ މަހު ދެގައުމުގެ މެދުގައި ވި އެއްބަސްވުމުގެ ދަށުން ސައުދީ އަރަބިއްޔާއިން ޕާކިސްތާނަށް ދިން މިލޯނަކީ 4 އިންސައްތަ އިންޓަރެސްޓް ރޭޓުގައި ދީފައިވާ ލޯނެކެވެ.
ޕާކިސްތާނުގައި ނޮވެމްބަރ މަހު އިންފްލޭޝަން ރޭޓް ހުރީ 11.5 އިންސައްތައިގައެވެ. އެއީ އޭގެކުރީ އޮކްޓޯބަރ މަހާއި އަޅާބަލާއިރު 9.2 އިންސައްތަ އިތުރުވުމެކެވެ.
