ދިރިއުޅުމުގެ ތަފާތު ދާއިރާތަކުގައި ނުކުޅެދުންތެރިކަން ހުންނަ މީހުން ބަސްބުނެ ހަރަކާތްތެރިވަމުންދާ މިންވަރު ވަނީ އިތުރުވެފައި ކަމަށް، މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ ވިދާޅުވެއްޖެއެވެ.

ބައިނަލްއަޤުވާމީ ނުކުޅެދުންތެރިކަން ހުންނަ މީހުންގެ ދުވަހާއި ގުޅިގެން މިނިސްޓަރ ދެއްވި މެސެޖްގައި އިތުރަށް ވިދާޅުވީ ޤައުމީ އަދި ބައިނަލްއަޤުވާމީ ޕްލެޓްފޯމުތަކުގައި ދިވެހިރާއްޖޭގެ ނުކުޅެދުންތެރިކަން ހުންނަ މީހުން މިޤައުމު ތަމްސީލު ކުރަމުންދާތަން މިވަނީ ފެންނަން ފަށާފައި ކަމަށެވެ. ނަމަވެސް މިފަދަ ފަރާތްތައް ބާރުވެރިކުރުމަށް 20 ވަނަ ޤަރުނުގެ ވިސްނުންތަކާއި އުކުޅުތައް ބޭނުން ކުރުމަށް ބޭނުންވާކަން މިނިސްޓަރ ފާހަގަކުރެއްވިއެވެ. ދިވެހިރާއްޖޭގައި ދިރިއުޅޭ ނުކުޅެދުންތެރިކަން ހުންނަ މީހުންނަށް މިހާރަށް ވުރެ ހަމަހަމަ ފުރުޞަތުތަކާއި އަސާސީ ޚިދުމަތްތައް އެންމެ އެކަށީގެންވާ އަދި އެންމެ ފުރިހަމަ ގޮތުގައި ފޯރުކޮށް ދިނުމަށްޓަކައި ވަކިވަކި ފަރުދުންގެ ފެންވަރުގައްޔާއި، ޖަމްޢިއްޔާ ޖަމާޢަތްތަކުގެ ފެންވަރުގައްޔާއި، ސަރުކާރުގެ ހުރިހާ މުއައްސަސާ ތަކަކުން ގުޅިގެން އެއް އަމާޒަކަށް މަސައްކަތް ކުރުމަކީ ވަރަށް މުހިއްމު އަދި އެހާމެ ބޭނުންތެރި ކަމެއްކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ނުކުޅެދުންތެރިކަން ހުންނަ މީހުންނަށް ރާއްޖޭގެ މުޖުތަމަޢުން ދެވޭ ސަމާލުކަން އިތުރުވެފައިވީ ނަމަވެސް މުޖުތަމަޢުގައި ހަވާސާ ވެފައިވާ މިފަދަ ފަރާތްތަކަށް އަދިވެސް އެންމެ އެކަށީގެންވާ ގޮތުގައި ޝާމިލްވެ އުޅުމުގައި ތަފާތު ގޮންޖެހުންތަކެއް އެބަހުއްޓެވެ. އެހެންކަމުން މިކަންކަމަށް މިހާރަށް ވުރެ ބޮޑަށް ސަމާލުކަންދީ ހައްލެއް ހޯދުމުގެ ބުރަ މަސައްކަތް ކުރަންޖެހިފައިވާކަމީ އެއްވެސް ޝައްކެތް ނެތް ކަމެއްކަމުގައި ދެކެވަޑައިގަންނަވާކަމަށް މިނިސްޓަރ ވިދާޅުވިއެވެ.

މީގެއިތުރުން މިނިސްޓަރ ވިދާޅުވީ ޤައުމީ ފެންވަރުގައި މިފަދަ ދުވަހެއް ފާހަގަ ކުރުމުގެ މަޤުޞަދަކީ ނުކުޅެދުންތެރިކަން ހުންނަ މީހުންނަކީ ވެސް މުޖުތަމަޢުގެ އެހެން ފަރުދުންނެކޭ އެއްފަދައިން ދިރިއުޅުމުގެ އެންމެހައި ދާއިރާތަކުގައި ފުރިހަމައަށް ޝާމިލްވެވޭނެ ބަޔަކު ކަމުގައި ހެދުމެވެ. ހަމައެހެންމެ މިފަރާތްތަކަށް ފަހި މާޙައުލެއް އޮތް މުޖުތަމައަކަށް ހަދަން ކުރަން ބޭނުންވާ މަސައްކަތްތަކާއި ގުޅޭގޮތުން މިފަރާތްތަކުގެ ޙައްޤުގައި ވަކާލާތުކޮށް މަސައްކަތްކުރުމެވެ. ކޮވިޑު-19 އާއި ގުޅިގެން ނުކުޅެދުންތެރިކަން ހުންނަ ފަރާތްތަކުގެ ޢާއިލާތަކަށް ވަރަށް ގިނަ ދަތިތަކާއި ކުރިމަތިލާން ޖެހިފައިވާކަން ވަނީ ފާހަގަކުރެވިފައި ކަމަށް މިނިސްޓަރ ވިދާޅުވިއެވެ. މިގޮތުން މިފަރާތްތަކަށް އެހީތެރިކަން ފޯރުކޮށްދިނުމަށް އެ މިނިސްޓްރީ ން ކުރަމުންދާ މަސައްކަތްތައް މިހާރަށް ވުރެ ހަރުދާނާކޮށް ވަކި އިންތިޒާމެއްގެ ތެރެއިން ކުރުމަށް ބޭނުންވާކަން ފާހަގަކުރެވިފައިވާކަމަށް މިނިސްޓަރ ވިދާޅުވިއެވެ.

ނުކުޅެދުންތެރިކަން ހުންނަ މީހުންގެ އަދުގެ ޙާލަތަށް ހެޔޮ ބަދަލުތަކެއް އަންނަން ފަށައިފާވާކަމީ އެންމެން ކުރަމުން މިދާ މަސައްކަތްތަކަށް ކޮންމެވެސް ކުރިއެރުން ތަކެއް ލިބެމުންދާ ކަމުގެ ފެހި ސިގްނަލެއްކަމަށް މިނިސްޓަރ ވިދާޅުވިއެވެ.