ބުރާސްފަތި ދުވަހު ފްރާންސުން އޮމިކްރޯން ވޭރިއަންޓް ފުރަތަމަ ފަހަރަށް ފެނިގެން ރިޕޯޓްކޮށްފިއެވެ.
މިއާއެކު ފްރާންސް ސަރުކާރަށް ލަފާދޭ އެންމެ އިސް ސައިންސްޓިސްޓް ބުނެފައިވަނީ, ޖެނުއަރީ މަސް ނިމޭ ހިސާބުގައި ފްރާންސްގައި އެންމެ ގިނައިން ފެންނަމުންދާނީ އޮމިކްރޯން ވޭރިއަންޓްކަމަށެވެ. ފްރާންސުގެ ސިއްހަތާ ބެހޭ ވުޒާރާއިން ބުނެފައިވަނީ އޮމިކްރޯން ވޭރިއަންޓްގެ ފުރަތަމަ ކޭސް ފެނިފައިވަނީ ނައިޖީރިއާއިން އައި މީހެއްގެ ގައިންކަމަށެވެ. އަދި ދެވަނަ ކޭސް ފެނިފައިވަނީ ދެކުނު އެފްރިކާއިން އައި މީހެއްގެ ގައިންކަމަށް އެވުޒާރާއިން ބުނެއެވެ.
ފްރާންސް ސަރުކާރަށް ލަފާދޭ އެންމެ އިސް ސައިންޓިސްޓްކަމުގައިވާ ޖޭން ފްރާންކޮއިސް ވިދާޅުވީ، މުޖުތަމައުގައި ދިރިއުޅޭ މީހުންނާއި ސިޔާސަތު ބައްޓަންކުރާ މީހުން މިވޭރިއަންޓާ މެދު ސަމާލުވެއްޖެނަމަ ކްރިމަސްއަކީ އަދި ވައިރަސް ފެތުރުމަށް ދިމާވާ ސަބަބަކަށް ނުވާނެކަމަށެވެ. އެގޮތުން އިޖުތިމާއީ ގައިދުރުކަން ގެންގުޅުމާއި ބޫސްޓަރ ޑޯޒް ޖެހުމަކީ މިކަމަށް އޮތް އެންމެ ބޮޑު ހައްލުކަމަށް ޖޭން ވިދާޅުވިއެވެ.
ފްރާންސުން ފާއިތުވި 24 ގަޑިއިރު ވަނީ 50،000 ކޮވިޑްގެ އައު ކޭސް ރިކޯޑް ކޮށްފައެވެ. މިހާރުވެސް ފްރާންސްގެ އެކި ހޮސްޕިޓަލްތަކުގެ އައިސީޔޫތަކުގައި 1886 މީހުންނަށް އަންނަނީ ފަރުވާދެމުންނެވެ.
