ރިއަލްއެސްޓޭޓް ޓުއަރިޒަމް ހިންގުމަށް ހަންކެޑެ އަދި ގާފަރުފަޅު ހަމަޖައްސައިފި
"ހަންކެޑެ" އަކީ ސަރުކާރުގެ ޓޫރިޒަމް ރިއަލް އެސްޓޭޓް ޑިވަލަޕްމަންޓް ޕްރޮޖެކްޓްތަކާއި، އިންޓަގްރޭޓަޑް ޓޫރިސްޓް ރިސޯޓް ތަރައްގީކުރާ ސަރަހައްދެއްގެ ކަމުގައި ކަނޑައަޅާފައިވޭ
ގާފަރު ފަޅު (ކ) އަދި ހަންކެޑެ (ވ)
ހަންކެޑެ އަދި ގާފަރުފަޅު ސަރުކާރުގެ ޓުއަރިޒަމް ރިއަލްއެސްޓޭޓް ޑިވެލޮޕްމަންޓް ޕްރޮޖެކްޓް ހިންގާ ސަރަހައްދުތަކެއްގެ ގޮތުގައި ކަނޑައަޅައިފިއެވެ.
މި ދެ ސަރަހައްދު ސަރުކާރުގެ ޓުއަރިޒަމް ރިއަލްއެސްޓޭޓް ޑިވަލޮޕްމަންޓް ޕްރޮޖެކްޓް ހިންގާ ސަރަހައްދުގެ ގޮތުގައި ކަނޑައަޅާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ގަރާރަކުން ބުރާސްފަތި ދުވަހުއެވެ.
ދިވެހިރާއްޖޭގެ ޓުއަރިޒަމާއި ބެހޭ ގާނޫނުގެ 4 ވަނަ މާއްދާގެ (ހ) ގައި ބުނަނީ ދިވެހިރާއްޖޭގެ ޓޫރިސްޓް ރިސޯޓް ހެދުމަށާއި، އިންޓަގްރޭޓެޑް ޓޫރިޒަމް ތަރައްގީކުރުމަށާއި، ސަރުކާރުގެ ޓޫރިޒަމް ރިއަލްއެސްޓޭޓް ޑިވަލޮޕްމަންޓް ޕްރޮޖެކްޓްތައް ތަރައްގީކުރުމަށާއި، ޕްރައިވެޓް އައިލެންޑް ތަރައްގީކުރުމަށް ކުއްޔަށް ދޫކުރާނެ ރަށްރަށާއި، ބިންބިމާއި ފަޅުފަޅާއި، އަދި ޓޫރިސްޓް ހޮޓަލާއި ޓޫރިސްޓް ގެސްޓްހައުސްއާއި ޔޮޓް ބަނދަރު ހަދާނެ ތަންތަނާއި، ޓޫރިޒަމްގެ ބޭނުމަށް ތަރައްގީކުރެވޭ އެނޫންވެސް ތަންތަނާއި ސަރަހައްދުތައް ކަނޑައަޅާނީ ރައީސުލްޖުމްހޫރިއްޔާ ކަމަށެވެ.
ރައީސުލްޖުމްހޫރިއްޔާގެ ގަރާރުގައި ވަނީ ދިވެހިރާއްޖޭގެ ޓޫރިޒަމާއިބެހޭ ގާނޫނުގެ 16-5 ވަނަ މާއްދާގެ (ހ) ގެ (2) ވަނަ ނަންބަރުން، އިންޓްގްރޭޓެޑް ޓޫރިސްޓް ރިސޯޓް ތަރައްގީކޮށް ހިންގާ ރަށް ނުވަތަ ފަޅު ނުވަތަ ބިން ހިމެނޭ ސަރަހައްދަކީ ސަރުކާރުގެ ޓޫރިޒަމް ރިއަލް އެސްޓޭޓް ޑިވަލޮޕްމަންޓް ޕްރޮޖެކްޓެއް ހިންގަުމަށް ކަނޑައަޅާފައިވާ ސަރަހައްދެއް ކަމުގައިވުން ލާޒިމްކޮށްފައިވާ ކަމަށެވެ.
އަދި ދިވެހިރާއްޖޭގެ ޓޫރިޒަމާއިބެހޭ ގާނޫނުގެ 16-5 ވަނަ މާއްދާގެ (ހ) ގެ (3) ވަނަ ނަންބަރުގައި، އިންޓަގްރޭޓެޑް ޓޫރިސްޓް ރިޒޯޓް ތަރައްގީކޮށް ހިންގުމަށްޓަކައި އެރަށް ނުވަތަ ބިން ނުވަތަ ފަޅު، ސަރުކާރުގެ ސައްތައިން ސައްތަ ހިއްސާވާ ކުންފުންޏަކަށް ކުއްޔައް ދިނުމަށް، ރައީސުލްޖުމްހޫރިއްޔާގެ ގަރާރަކުން ކަނޑައަޅާފައި އޮންނަންވާނެކަމަށް ބަޔާންކޮށްފައިވާ ކަމަށެވެ.
އަދި ރައީސުލްޖުމްހޫރިއްޔާއަށް ޓުއަރިޒަމްގެ ގާނޫނުން ބާރުލިބިދޭ ބާރުގެ ދަށުން އައްޑޫސިޓީގެ "ހަންކެޑެ" އަކީ ސަރުކާރުގެ ޓޫރިޒަމް ރިއަލް އެސްޓޭޓް ޑިވަލަޕްމަންޓް ޕްރޮޖެކްޓްތަކާއި، އިންޓަގްރޭޓަޑް ޓޫރިސްޓް ރިސޯޓް ތަރައްގީކުރާ ސައްހައްދެއްގެ ކަމުގައި ކަނޑައަޅައި، އަދި މި ސަރަހައްދު ސަރުކާރުގެ ސައްތައިން ސައްތަ ހިއްސާވާ ކުންފުންޏެއް ކަމުގައިވާ މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑަށް ކުއްޔަށް ދިނުމަށް ކަނޑައަޅާކަމަށް ރައީސުލްޖުމްހޫރިއްޔާގެ ގަރާރުގައި ވެއެވެ.
މީގެ އިތުރުން ދިވެހިރާއްޖޭގެ ޓޫރިޒަމާބެހޭ ޤާނޫނުގެ 16-16 ވަނަ މާއްދާގެ (ނ) ގެ (2) ވަނަ ނަންބަރުން، ޕްރައިވެޓް އައިލެންޑް ތަރައްޤީކޮށް ހިންގާ ފަޅު ހިމެނޭ ސަރަޙައްދަކީ، ސަރުކާރުގެ ޓޫރިޒަމް ރިއަލް އެސްޓޭޓް ޑިވެލޮޕްމަންޓް ޕްރޮޖެކްޓެއް ހިންގުމަށް ކަނޑައަޅައިފައިވާ ސަރަޙައްދެއް ކަމުގައި ވުން ލާޒިމުކޮށްފައިވީ ހިނދު ދިވެހިރާއްޖޭގެ ޓޫރިޒަމާބެހޭ ޤާނޫނުގެ 16-16 ވަނަ މާއްދާގެ (ނ) ގެ (3) ވަނަ ނަންބަރުގައި، ޕްރައިވެޓް އައިލެންޑް ތަރައްޤީކޮށް ހިންގުމަށް ޓަކައި ފަޅުފަޅު، ސަރުކާރުގެ ސައްތައިން ސައްތަ ހިއްސާވާ ކުންފުންޏަކަށް ކުއްޔަށް ދިނުމަށް، ރައީސުލްޖުމްހޫރިއްޔާގެ ޤަރާރަކުން ކަނޑައަޅައިފައި އޮންނަންވާނެކަމަށް ބަޔާންކޮށްފައިވާ ކަމަށެވެ.
އެހެންކަމުން ދިވެހިރާއްޖޭގެ ޓޫރިޒަމާބެހޭ ޤާނޫނުގައިވާ ގޮތުގެ މަތީން، މާލެއަތޮޅު "ގާފަރުފަޅު" ގެ ސަރަޙައްދުގެ ތެރެއިން، 2184 ހެކްޓަރުގެ ސަރަޙައްދަކީ ސަރުކާރުގެ ޓޫރިޒަމް ރިއަލް އެސްޓޭޓް ޑިވެލޮޕްމަންޓް ޕްރޮޖެކްޓަކާއި ޕްރައިވެޓް އައިލެންޑް ތަރައްޤީކުރާ ސަރަޙައްދެއް ކަމުގައި ކަނޑައަޅައި، އަދި މި ސަރަޙައްދު، މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑަށް ކުއްޔަށް ދިނުމަށް ކަނޑައަޅާކަމަށް ރައީސުލްޖުމްހޫރިއްޔާގެ ގަރާރުގައި ވެއެވެ.
