ގާނޫނު އަސާސީއަށް ގެންނަ ބަދަލުތަކަކީ އެއްފަހަރާ ގެންނަ ބަދަލުތަކަށް ވުމަކީ ބޭނުންތެރިކަމެއް: ރައީސް ނަޝީދު

ގާނޫނު އަސާސީއަށްގެންނަ ބަދަލުތަކަކީ އެއް ފަހަރާ ގެންނަ ބަދަލުތަކަށް ވުމަކީ ބޭނުންތެރިކަމެއްކަމަށް, ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

އާސްކް ސްޕީކަރގެ ހަތަރު ވަނަ ޕްރޮގްރާމްގައި ޖުޑީޝަލް ސަރވިސް ކޮމިޝަން(ޖޭއެސްސީ)ގެ އޮނިގަނޑަށް ބަދަލު ގެނައުމީ މިސަރުކާރުގެ ވައުދަކަށް ވާއިރު އެވައުދު ފުއްދަނީ ކޮންއިރަކުތޯ އާންމުންގެ މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ، ޖުޑީޝަރީ އިސްލާހުކުރުމުގެ ވައުދަކީ އެމްޑީޕީގެ ވައުދެއްކަމަށެވެ. އަދި އެމަސައްކަތުގެ ދަށުން މިހާތަަނަށް ކުރެވުނު މަސައްކަތްތަކަށް ބަލާއިރު، ޝަރުއީ ނިޒާމު އިސްލާހުކުރެވިފައިވާ މިންވަރަކީ ވާދަވެރިންވެސް ފާހަގަކުރާކަމެއް ކަމަށް ރައީސް ނަޝީދު ވިދާޅުވިއެވެ. ސުޕްރީމް ކޯޓުން ރައީސް ޔާމީނަށް އިއްވި ހުކުމަށް އިޝާރާތްކުރައްވައި ރައީސް ނަޝީދު ވިދާޅުވީ، އެގަޒިއްޔާ ނިމިގެންދިޔަ ގޮތުން ގިނަ ބަޔަކު ރާއްޖޭގެ ޝަރުއީ ނިޒާމު އިސްލާހުވެފައިވާ މިންވަރު ފާހަގަކުރާކަމަށެވެ.

އަދި ޖޭއެސްސީއަށްވެސް ހަރުދަނާ މަސައްކަތްތަކެއް ކުރެވެމުންދާކަން ފާހަގަކުރާކަމަށް ރައީސް ނަޝީދު ވިދާޅުވިއެވެ. ދެން އުފެދޭ ސުވާލަކީ ޖޭއެސްސީ އެކުލެވޭ ގޮތް ބަދަލުކޮށް ގާނޫނު އަސާސީއަށް ބަދަލު ގެންނާނީ ކޮންއިރަކުންތޯ ކުރެވޭ ސުވާލުކަމަށް ރައީސް ނަޝީދު ވިދާޅުވިއެވެ. ގާނޫނު އަސާސީއަށް ބަދަލު ގެންނަން ބޭނުންވާ ބައިވަރު ސަބަބުތައް އެބަހުރިކަމަށް ރައީސް ނަޝީދު ވިދާޅުވިއެވެ.

ގާނޫނު އަސާސީއަށް އެބަދަލުތައް ގެންނައިރު ޖޭއެސްސީއަށްވެސް އެބަދަލު ގެނައުމީ ބޭނުންތެރިކަމެއް ކަމަށް ދެކެވަޑައިގަންނަވާކަމަށް ރައީސް ނަޝީދު ވިދާޅުވިއެވެ.

ވައުދާ އެއްގޮތަށް ދައުރު ނިމުމުގެ ކުރިން ޖުޑީޝަލް ސަރވިސް ކޮމިޝަނަށް ގެންނަންޖެހޭ ބަދަލުތައް ގެންނާނެ ކަމަށް ސެޕްޓެމްބަރ މަހުގެ 2 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒު ވަނީ ވިދާޅުވެފައެވެ. އޭނާ ވިދާޅުވީ ޖޭއެސްސީ އެކުލަވާލާފައިވާ ގޮތަށް ގެންނަންޖެހޭ ބަދަލުތައް ގެނައުމުގައި ލަސްތަކެއް އެބަހުރި ކަމަށެވެ. އެހެން ނަމަވެސް މި ދައުރު ނިމުމުގެ ކުރިން އެ ބަދަލުތައް ގެންނާނެ ކަމަށާއި، ގެންނަ ބަދަލުތަކަކީ ރައްޔިތުންގެ އިތުބާރު އެ މުއައްސަސާއަށް ލިބޭނެ ފަދަ ބަދަލުތަކަކަށް ވާނެ ކަމަށް މަބްރޫކް ވިދާޅުވިއެވެ. މި މަސައްކަތް ނިމޭނެ މުއްދަތެއް ނުދެވުނު ނަމަވެސް މި ދައުރުގެ ތެރޭގައި މި މަސައްކަތް ނިންމާނެ ކަމުގެ ޔަގީންކަން މަބްރޫކް ވަނީ ދެއްވާފައެވެ.

މަބްރޫކް ވިދާޅުވީ ޖޭއެސްސީއަށް ގެންނަންޖެހޭ ބަދަލުތައް ގެނައުމަށް ރައީސުލްޖުމްހޫރިއްޔާ ވަނީ ގާނޫނީ މާހިރުންގެ ލަފާ ހޯއްދެއްވުމަށް އެދިވަޑައިގެންފައި ކަމަށެވެ. މިކަން ކުރާނީ މިކަންކަމާ ގުޅުންހުރި މާހިރުންގެ ލަފާއާއެކުކަން މަބްރޫކް ފާހަގަކުރެއްވިއެވެ.