ކަނޑުގައި އުޅަނދުތައް ދުއްވުމާއި ބެހޭ ގާނޫނުގެ ދަށުން މިނިސްޓްރީން ފޯރުކޮށްދޭންޖެހޭ ޚިދުމަތްތަކުގެ ތެރެއިން މިނިސްޓްރީން ކަނޑައަޅާ ޚިދުމަތްތައް އަތޮޅު ފެންވަރުގައި ނުވަތަ ރަށު ފެންވަރުގައި ނުވަތަ ސިޓީ ފެންވަރުގައި ފޯރުކޮށްދޭނީ މިގާނޫނުގެ ދަށުން ހަދާ ގަވާއިދުގައިވާ ގޮތުގެ މަތިން އެއަތޮޅެއް ނުވަތަ އެރަށެއް ނުވަތަ އެސިޓީއެއް ނިސްބަތްވާ ކައުންސިލަކުން ކަމަށް އެ ގާނޫނަށް އިސްލާހު ގެނެސްފިއެވެ.
ކަނޑުގައި ދުއްވާ އުޅަނދުތައް ދުއްވުމާއި ބެހޭ ގާނޫނަށް އިސްލާހު ގެނައުމަށް ސަރުކާރުގެ ފަރާތުން މަޖިލީހަށް ހުށަހެޅުއްވީ މަކުނުދޫ ދާއިރާގެ މެމްބަރ މުހައްމަދު ރާއީއެވެ. މިބިލް ދިރާސާކޮށްފައިވަނީ ލާމަރުކަޒީ ކޮމިޓީންނެވެ.
ކޮމިޓީން ގެނައި އިސްލާހުގެ ބިލް މަޖިލީހުން ފާސްކޮށްފައިވާއިރު ބިލްގައި ބުނަނީ އަތޮޅު ފެންވަރުގައި ނުވަތަ ރަށު ފެންވަރުގައި ނުވަތަ ސިޓީ ފެންވަރުގައި ފޯރުކޮށްދިނުމަށް މިނިސްޓްރީން ކަނޑައަޅާ ޚިދުމަތްތަކާއި އެ ޚިދުމަތްތައް ފޯރުކޮށްދިނުމާއި ގުޅޭ އުސޫލުތައް މިގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެއެވެ.
މީގެއިތުރުން ޚިދުމަތްތަކާއި ގުޅިގެން މިނިސްޓްރީ އާއި ކަމާގުޅޭ އިދާރާތަކުން ކައުންސިލްތަކަށް ބޭނުންވާ ފައިސާ އާއި ވަސީލަތްތަކާއި އެހީތެރިކަން ކައުންސިލްތަކަށް ފޯރުކޮށްދޭންވާނެކަމަށްވެސް މަޖިލީހުން ފާސްކުރި އިސްލާހުގައިވެއެވެ. އަދި ކައުންސިލްތަކަށް ބޭނުންވާ ފައިސާ އާއި ވަސީލަތްތަކާއި އެހީތެރިކަން ފޯރުކޮށްދޭނެގޮތް މިގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެކަމަށްވެސް މިބިލްގައިވެއެވެ.
މީގެއިތުރުން މިގާނޫނަށް ގެނެވޭ އިސްލާހުތަކާ ގުޅިގެން އެކުލަވާލަންޖެހޭ ގަވާއިދުތަކާއި އިސްލާހުކުރަންޖެހޭ ގަވާއިދުތައް މިބިލް ގާނޫނަކަށްވެ އަމަލުކުރަން ފަށާ ތާރީޚުން ފެށިގެން 6 މަސް ދުވަހުގެ ތެރޭގައި ހަދައި ދިވެހި ސަރުކާރުގެ ގެޒެޓްގައި ޝާއިއުކުރަންވާނެއެވެ.
މިއިސްލާހުތަކާއެކު ކޮމިޓީ ރިޕޯޓް ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިގެންނެވި 53 މެމްބަރުންގެ އިއްތިފާގުންނެވެ.
