ތިންވަނަ ކުއާޓާގައި މަސް އެކްސްޕޯޓުކުރި މިންވަރު 87 އިންސައްތަ އިތުރުވެއްޖެ

މިއަހަރުގެ ތިންވަނަ ކުއާޓާގައި މަސް އެކްސްޕޯޓުކުރި މިންވަރު 87 އިންސައްތަ އިތުރުވެފައިވާ ކަމަށް އެމްއެމްއޭ އިން ބުނެފިއެވެ.

އެމްއެމްއޭގެ ތިންވަނަ ކުއާޓާ ރިޕޯޓުގައި ބުނެފައިވާ ގޮތުން މިއަހަރުގެ ތިންވަނަ ކުއާޓާގައި 19،222 މެޓްރިކް ޓަނުގެ މަސް ރާއްޖެއިން ވަނީ އެކްސްޕޯޓު ކޮށްފައެވެ. މިދިޔަ އަހަރުގެ ތިންވަނަ ކުއާޓާގައި ރާއްޖެއިން ބޭރު ގައުމުތަކަށް ވިއްކާފައިވަނީ 10,303.3 މެޓްރިކް ޓަނުގެ މަހެވެ. މިއީ 8,918.7 ޓަނުގެ އިތުރުވުމެކެވެ.

ރާއްޖެއިން އެކްސްޕޯޓުކުރާ މަހުގެ އަދަދު އިތުރުވި މައިގަނޑު އެއް ސަބަބަކީ މިޔަރެން މަސް ވިއްކުމުގެ ބާޒާރަށް އައި ހެޔޮ ބަދަލުތަކެވެ. ތިންވަނަ ކުއާޓާގައި ގަނޑުކޮށްފައިވާ މިޔަރެންމަސް އެކްސްޕޯޓުކުރި މިންވަރު ވަނީ 123 އިންސައްތައަށް އަރާފައެވެ. މީގެ އިތުރުން މިދިޔަ އަހަރުގެ ތިންވަނަ ކުއާޓާއާ އަޅާބަލާއިރު ގަނޑުކުރި ކަންނެލި އެކްސްޕޯޓުކުރި މިންވަރު 296 އިންސައްތައަށް އިތުރުވެފައި ވާއިރު ތާޒާ ކަންނެލި އެކްސްޕޯޓުކުރި މިންވަރު ވަނީ 55 އިންސައްތަ އިތުރުވެފައެވެ.

ރާއްޖެއިން ބޭރު ގައުމުތަކަށް ވިއްކާ މަހުގެ އަދަދު ބޮޑުތަނުން އިތުރުވެފައިވީ ނަމަވެސް، ރާއްޖޭގައި މަހުގެ އުފެއްދުންތައް ތައްޔާރުކުރާ ކުންފުނިތަކުން މަސް ގަނެފައިވާ އަދަދު ވަނީ މަދުވެފައެވެ. އެގޮތުން މަސް އެކްސްޕޯޓުކުރާ މިންވަރު 87 އިންސައްތަ އިތުރުވި ނަމަވެސް ރާއްޖޭގެ ކުންފުނިތަކުން މަސް ގަންނަ މިންވަރު ވަނީ 34 އިންސައްތަ ދަށްވެފައެވެ.

މިއަހަރުގެ ތިންވަނަ ކުޓާގައި ރާއްޖޭގެ ކުންފުނިތަކުން ގަނެފައިވަނީ ޖުމްލަ 14,186.3 މެޓްރިކް ޓަނުގެ މަހެވެ. މީގެ މައިގަނޑު ސަބަބަކީ މިޔަރެންމަސް ގަންނަ މިންވަރު 35 އިންސައްތައިން ދަށަށް ދިއުމުގެ އިތުރުން، ކަންނެލި ގަންނަ މިންވަރު 31 އިންސައްތަ ދަށަށް ގޮސްފައިވުމެވެ.

މީގެ އިތުރުން މިފްކޯއިން މަސް ގަންނަ ވަކި އަގެއް ކަނޑައަޅާފައިވީ ނަމަވެސް، ސެޕްޓެމްބަރު މަހުގެ ތެރޭގައި މަހުގެ އަގު ވަނީ ވެއްޓިފައެވެ. އެގޮތުން މިދިޔަ އަހަރުގެ ތިންވަނަ ކުއާޓާއިން ފެށިގެން މިއަހަރުގެ ދެވަނަ ކުއާޓާގެ ނިޔަލަށް ކިލޯއެއް 18 ރުފިޔާއަށް ލިބެންހުރި މިޔަރެންމަހުގެ އަގު 14 ރުފިޔާއަށް ވަނީ ވެއްޓިފައެވެ. އަދި މިދިޔަ އަހަރުގެ ތިންވަނަ ކުއާޓާއިން ފެށިގެން މިއަހަރުގެ ދެވަނަ ކުއާޓާގެ ނިޔަލަށް 20 ރުފިޔާއަށް ކިލޯއެއް ލިބެންހުރި މިޔަރެންމަހުގެ އަގު ވަނީ 16 ރުފިޔާއަށް ވެއްޓިފައެވެ.

ނަމަވެސް ކަންނެލީގެ އަގުތަކަށް ތިންވަނަ ކުއާޓާގައި ރަނގަޅު ބަދަލުތަކެއް އައިސްފައިވެއެވެ. މިދިޔަ އަހަރުގެ ތިންވަނަ ކުއާޓާގައި އެވްރެޖްކޮށް 51.6 ރުފިޔާއަށް ކިލޯއެއްގެ ރޭޓުން ރާއްޖެ ކުންފުނިތަކުން ކަންނެލި ގަތް ނަމަވެސް، މިއަހަރުގެ ތިންވަނަ ކުއާޓާގައި ކަންނެލީގެ އަގު ވަނީ ކިލޯއެއް 88.8 ރުފިޔާއަށް އަރާފައެވެ.