ޖިންސީ ގޯނާގެ މައްސަލަތަކުގައި ހަގީގަތް ނުބަލައި މައުލޫމާތު ނުފެތުރުމަށް ފުލުހުން އެދިއްޖެ
29 ނޮވެމްބަރު 2021 | ހޯމަ 08:03ޖިންސީ ގޯނާގެ މައްސަލަތަކުގެ ރިޕޯޓް ލިބުމުން އެ މައްސަލަތައް ބަލާ ތަހުގީގު ކުރަނީ ވަރަށް ޚާއްސަ އަހަންމިއްޔަތުކަމެއް ދީގެން
މޯލްޑިވްސް ޕޮލިސް ސާވިސްގެ ހެޑް ކުއާޓާރ، ޝަހީދު ހުސެއިން އާދަމް ބިލްޑިންގ
ޖިންސީ ގޯނާގެ މައްސަލަތަކުގައި ހަގީގަތް ނުބަލާ މައުލޫމާތު ނުފެތުރުމަށް ފުލުހުން އެދިއްޖެއެވެ.
ފުލުހުން ހޯމަ ދުވަހު ކުރި ޓުވީޓެއްގައި ބުނެފައިވަނީ ޖިންސީ ގޯނާގެ މައްސަލަތަކުގެ ރިޕޯޓް ލިބުމުން އެ މައްސަލަތައް ބަލާ ތަހުގީގު ކުރަނީ ވަރަށް ޚާއްސަ އަހަންމިއްޔަތުކަމެއް ދީގެން ކަމަށެވެ. އަދި ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގައި އެ ކުދިންގެ ސަލާމަތާއި ރައްކާތެރިކަން ކަށަވަރުކޮށް، ނުހަނު އިސްކަމެއްދީގެން އެފަދަ މައްސަަލަތައް ތަހުގީގުކުރަމުންދާ ކަމަށެވެ.
އެހެންކަމުން މިފަދަ މައްސަލަތަކުގެ މައުލޫމާތު ފެތުރުމުގައި އާންމު ރައްޔިތުން އިތުރަށް ޒިންމާދާރުވެ، ޖިންސީ ގޯނާގެ މައްސަލަތަކުގައި ހަގީގަތް ނުބަލާ މައުލޫމާތު ނުފެތެރުމަށް ވަނީ އެދިފައެވެ.
މިފަހަކުން ޖިންސީ ގޯނާގެ މައްސަލަތައް އިތުރުވެފައިވާއިރު މިފަދަ މައްސަލަތަކުގައި މުއައްސަސާތައް ހިމޭނުން ތިބޭތީ އެކަމުގެ ކަންބޮޑުވުން އާންމުން ރައްޔިތުން ދަނީ ފާޅުކުރަމުންނެވެ.
