ޕްރޮޖެކްޓް ހިންގޭ ވަރަށް ފައިސާ ހަމަޖެހުމުން މިނީ ބަހުގެ ޚިދުމަތް ފަށާނަން: ޓްރާންސްޕޯޓް މިނިސްޓަރ
29 ނޮވެމްބަރު 2021 | ހޯމަ 04:58އެ ފައިސާއިން ޕްރޮޖެކްޓެއް ނުހިންގޭނެ
ޓްރާންސްޕޯޓް މިނިސްޓަރ އައިޝަތު ނަހުލާ
މާލޭގައި މިނީ ބަހުގެ ޚިދުމަތް ދިނުމަށްޓަކައި ބެޓެރީން ދުއްވާ ބަސްތަކެއް ގެންނަން ސަރުކާރުން ނިންމާފައިވާއިރު ޕްރޮޖެކްޓް ހިންގޭ ވަރަށް ފައިސާ ހަމަޖެހުމުން އެމަސައްކަތް ފަށާނެ ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހަށް ހާޒިރުވެ، މެމްބަރުންގެ ސުވާލުތަކަށް ޖަވާބުދެއްވަމުން ނަހުލާ ވިދާޅުވީ މިނީ ބަހުގެ ޚިދުމަތް ދިނުމަށް ބަޖެޓް ހަމަޖެހިފައި ނެތް ކަަމަށެވެ. އަދި ބޭރުގެ ޖަމިއްޔާތަކުން ހިލޭ އެހީ ލިބޭތޯ ފޮރިން މިނިސްޓްރީގައި ވެސް ދަންނަވާފައިވާނެ ކަމަށެވެ. އެހީ އަދި ލިބިފައިނުވާއިރު އަންނަ އަހަރުގެ ބަޖެޓުގައި ކަނޑައަޅާފައިވަނީ 16.9 މިލިއަން ރުފިޔާ ކަމަށާއި އެ ފައިސާއިން ޕްރޮޖެކްޓް ނުހިންގޭނެ ކަމަށް ނަހުލާ ވިދާޅުވިއެވެ.
މި މަސައްކަތް ކުރިއަށް ގެންދިޔުމަށް އިތުރަށް ބަޖެޓެއް ބޭނުންވާކަން ފާހަގަކުރައްވާ ނަހުލާ ވިދާޅުވީ އަންނަ އަހަރަށް ހަމަޖެހިފައި އޮތް ބަޖެޓުން 4 ބަސް ގަނެވިދާނެ ކަމަށެވެ. އެހެންނަމަވެސް އެވަރުން އެ ޕްރޮޖެކްޓް ނުފެށޭނެ ކަމަށް ނަހުލާ ވިދާޅުވިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ވަނީ މި މަސައްކަތުގެ ޕްރޮޕޯސަލް ޓްރާންސްޕޯޓް މިނިސްޓްރީއަށް ފޮނުވާފައެވެ. މާލޭގައި މިނީ ބަހުގެ ޚިދުމަތް ދިނުމަށް ޓްރާންސްޕޯޓް މިނިސްޓްރީން އެމްޓީސީސީއާ ހަވާލުކޮށްފައި ވަނީ މާލެއަށް ދިމާވެފައިވާ ޓްރެފިކް މައްސަލައަށް ހައްލު ހޯދުމުގެ ގޮތުންނެވެ. މި ޕްރޮޖެކްޓް އެމްޓީސީސީއާ ހަވާލުކޮށްފައި ވަނީ 2019 ވަނަ އަހަރުގެ ފެބްރުއަރީ މަހުގައެވެ.
މީގެ ކުރިން ޓްރާންސްޕޯޓް މިނިސްޓްރީން ބުނީ އިލެކްޓްރިކް ބަސް ގެންނަން ނިންމާފައިވަނީ ތިމާވެއްޓާ ރައްޓެހި ބަސްތަކެއް މާލޭގައި ދުއްވުމުގެ މަޤްޞަދުގައި ކަމަށެވެ. މާލޭގެ މަގުތައް ހުންނަ ގޮތުގެ ސަބަބުން، ބަހުގެ ދިގުމިނުގައި ހުންނާނީ 20 ފޫޓު ކަމަށާއި ބަހެއްގައި ދަތުރުކުރެވޭނީ 16 ފަސިންޖަރުންނަށް ކަމަށް ވެސް އޭރު ވަނީ ބުނެފައެވެ.
މާލެސިޓީއަށް ގެންނަ ބަސްތަކަކީ މާލޭގެ މަގުތަކަށް އެކަށޭނެ ގޮތަކަށް ކަސްޓަމައިޒް ކޮށްގެން ގެންނަ ބަސްތަކެއް ކަމަށް ވެސް މިނިސްޓްރީން ވަނީ ބުނެފައެވެ. މި މަސައްކަތަށް މިހާ ގިނަދުވަސް ނަގާތީ އާންމުންގެ ކަންބޮޑުވުންތަކާ ގުޅިގެން އޭރު ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވީ މިނީބަސް ތައާރަފު ކުރުން ލަސްވެފައިވަނީ ތިމާވެއްޓާ ގުޅޭ އަދި ވަކި ސައިޒަކަށް ފެތޭ ބަސްތަކެއް ގެންނަން ބޭނުންވާތީ ކަމަށެވެ. އެގޮތުން، އެފަދަ ބަސްތަކެއް ހަދަން ބަޔަކަށް އޯޑަރު ދީގެން އެ އެއްޗެހި ތައްޔާރު ކުރުމަށް ވަގުތު ނަގާނެ ކަމަށް މިނިސްޓަރ ނަހުލާ ވިދާޅުވިއެވެ.
މާލެއަށް މިނީ ބަސް ތައާރަފު ކުރުމަކީ މި ސަރުކާރުގެ 100 ދުވަހުގެ ވައުދުގެ ތެރޭގައި ހިމެނޭ ކަމެކެވެ. މިނިސްޓަރ ނަހުލާ ވިދާޅުވީ 100 ދުވަހުގެ ވައުދުގެ ތެރެއިން އެ މިނިސްޓްރީއަށް ނުފުއްދި އޮތީ ހަމައެކަނި މިނީ ބަސް ގެނައުމުގެ ވައުދު ކަމަށެވެ.
