ޕްލާސްޓިކް މަދުކުރުމުގެ ޕްރޮގުރާމުގެ ދަށުން ފޮތިން އަތް ދަބަސް ފަހަން ދަސްކޮށްދިނުމަށް ކުޅުދުއްފުށީ ސިޓީގައި ކުރިއަށްގެންދިޔަ ކޯސް ކާމިޔާބުކަމާއެކު ނިންމާލައިފި އެވެ.

ޔޫތް މިނިސްޓްރީއާއި ކުޅުދުއްފުށީ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީ ގުޅިގެން މިމަހު 25-27އަށް ކުރިއަށްގެންދިޔަ މި ކޯހުގައި 40 ފަރާތަކުން ބައިވެރިވި އެވެ.

ދެ ޖިންސަށް ހުޅުވާލައިގެން ކުރިއަށްގެންދިޔަ މި ކޯސް ނިންމާލައި، ބައިވެރިންނަށް ސެޓްފިކެޓް ހަވާލުކުރުމަށް މިރޭ ބޭއްވި ރަސްމިއްޔާތު ޝަރަފުވެރިކޮށްދެއްވީ ހދ. ފެމެލީ އެންޑް ޗިލްރަން ސަރވިސް ސެންޓަރު ހިންގުމާ ހަވާލުވެހުންނެވި އާސިމާ އަހުމަދެވެ.

އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާ ޚަދީޖާ މޫސާ މި ޖަލްސާގައި ވާހަކަދައްކަވަމުން ވިދާޅުވީ، ތިމާވެއްޓަށް ދިމާވަމުން އަންނަ ނުރައްކާތެރި ކަންކަމަށް ވިސްނައި ފިކުރުކޮށް، ކޮށްދެވޭނީ ކޮންކަމެއްތޯ ބަލައި އެކަންކަން ކުރަން ޖެހޭ ކަމަށެވެ. އަދި މި ކޯހުގެ ސަބަބުން ދުނިޔޭގެ ތިމާވެއްޓަށް ދިމާވެފައިވާ ނުރައްކަލަށް ކޮންމެވެސް ވަރެއްގެ ހައްލެއް ލިބިގެންދާނެކަންވެސް އޭނާ ފާހަގަކުރެއްވި އެވެ.

މި ކޯހަކީ ވަރަށް ކާމިޔާބު އަދި އެހާމެ ބޭނުންތެރި ކޯހެއްކަން ފާހަގަކުރައްވަމުން އޭނާ ވިދާޅުވީ، މި ކޯހުން ލިބުނު ފިލާވަޅުތަކުން، އަމަލީ މައިދާނުގައި ކުލަ ޖެހިގެންދާނެ ފަދަ ޚިދުމަތެއް މި ރޮނގުން ލިބިގެންދިޔުމަކީ ޔޫތު މިނިސްޓްރީއާއި ޑަބުލިއުޑީސީގެ ވަރަށް ބޮޑު އެދުމެއްކަމަށެވެ.

އަންހެނުންގެ ތަރައްގީއަށް މަސައްކަތްކުރާ ކޮމެޓީން ބުނީ، އެންމެންވެސް ޕްލާސްޓިކް ބޭނުންކުރާ މިންވަރު މަދުކޮށް، ފޮތިކޮތަޅު ބޭނުންކުރެވޭ ކަންކަމުގައި އެފަދަ ކޮތަޅު ބޭނުންކުރާތަން ފެނިގެންދިއުމަކީ ވަރަށް ދެކެން ބޭނުންވާ ދުވަހެއްކަމުގައެވެ.

ޕްރޮގުރާމު ކާމިޔާބުކަމާއެކު ނިންމާލުމުގައި އެހީތެރިކަން ފޯރުކޮށްދެއްވީތީ ޔޫތު މިނިސްޓްރީ އަދި ކުޅުދުއްފުށި ސިޓީ ކައުންސިލަށް އޭނާ ޝުކުރު އަދާކުރެއްވި އެވެ.