ރާއްޖޭގައި ޕްލާސްޓިކް ބިސް ވިއްކާ ކަމަށް ބުނާ މައްސަލަ ބަލަން ފަށައިފި
އެފަދަ ބިސް ވިއްކާކަމުގެ އެއްވެސް މައުލޫމާތެއް އަދި ނުލިބޭ
ޕްލާސްޓިކް ބިސްތަކެއް: ރާއްޖޭގައި ވެސް ވިއްކަން ހުރި ކަމަށް ވަނީ އަޑު ފެތުރިފައި
ރާއްޖޭގައި ވެސް ޕްލާސްޓިކް ބިސް ވިއްކާ ކަމަށް ބުނާ މައްސަލަ ބަލަމުންދާ ކަމަށް ހެލްތު މިނިސްޓްރީން ބުނެފިއެވެ.
ހެލްތު މިނިސްޓްރީން ބުދަދުވަހު ކުރި ޓްވީޓެއްގައި ބުނެފައި ވަނީ އެ މައްސަލަ މޯލްޑިވްސް ފުޑް އެންޑް ޑްރަގް އޮތޯރިޓިން ބަލަމުންދާ ކަމަށް ބުނެފައިވާ އިރު އެފަދަ މައްސަލައެއް މިހާތަނަށް ސަމާލު ކަމަށް އައިސްފައި ނުވާ ކަމަށެވެ. އަދި ހެލްތުން ބުނެފައިވާ ގޮތުގައި އެފަދަ މައުލޫމާތެއް ރާއްޖެ ބައިވެރިވާ ބޭރުގެ ފަރާތްތަކުން ވެސް ލިބިފައެއް ނުވެއެވެ. އަދި އިންޓަރނޭޝަނަލް ފުޑް ސޭފްޓީ އޮތޯރިޓީސް ނެޓްވޯކް (އެންއެފްއޯއެސްއޭއެން) އިންވެސް އެފަދަ މައުލޫމާތެއް ލިބިފައި ނުވާ ކަމަށް ހެލްތުން ވަނީ ބުނެފައެވެ.
މިފަދަ މައްސަލައެއް މޯލްޑިވްސް ފުޑް އެންޑް ޑްރަގް އޮތޯރިޓީން ބަލަން ފަށާފައި މިވަނީ އެފަދަ ބިސް ރާއްޖޭގައި ވެސް ވިއްކަން ހުރި ކަމުގެ ވާހަކަތަކެއް ދެކެވެން ފަށާފައިވަނިކޮށެވެ. އެގޮތުން ބައެއް ދިވެހިން ދަނީ ފޮޓޯއާ އެކު ޕްލާސްޓިކް ބިސް ރާއްޖޭގައި ވިއްކަމުންދާ ކަމަށް ބުނެ ސޯޝަލް މީޑިއާގައި ކަންބޮޑުވުން ފާޅު ކުރަމުންނެވެ.
ޕްލާސްޓިކް ބިހުގެ އިތުރުން ޕްލާސްޓިކްގެ މާއްދާތައް ބޭނުންކޮށްގެން އުފައްދާފައިވާ ހަނޑުލުގެ ބާވަތްތަކެއް ވެސް ބާޒާރުގައި އުޅޭކަމުގެ ޚަބަރުތަކެއް ފެތުރިފައި ވެއެވެ. ނަމަވެސް ސޯޝަލް މީޑިއާގައި ފެތުރެމުންދާ މި ވާހަކަތަކާ ގުޅިގެން މިހާތަނާ ޖެހެންދެން ރާއްޖޭގެ ކަމާ ބެހޭ އެއްވެސް އިދާރާއަކުން އެއްވެސް އެއްޗެއް ހާމަކޮށްފައެއް ނުވެއެވެ.
