އޮމިކްރޯން ވޭރިއަންޓާއި ގުޅިގެން ތައިލޭންޑުންވެސް އެފްރިކާގެ ގައުމުތަކަށް ހަރުކަށި ފިޔަވަޅު
ގިނަ ގައުމުތަކުން ދަނީ އެފްރިކާއަށް ކުރާ ދަތުރުތައް ހުއްޓާލުމަށް އަންގަމުން
ފަތުރުވެރިން ތައިލެންޑްގައި- ތައިލެންޑުން ވަނީ އެފްރިކާގެ 8 ޤައުމަކުން އެ ޤައުމަށް އެތެރެވުން މަނާކޮށްފައި
އަލަށް ފެނިފައިވާ ކޮވިޑް-19 ގެ ނުރައްކާތެރި އޮމިކްރޯން ވޭރިއަންޓާއި ގުޅިގެން ތައިލޭންޑުންވެސް އެފްރިކާގެ ޤައުމުތަކުން ކުރާ ދަތުރުތައް މަނާކޮށްފިއެވެ.
ތައިލޭންޑުން ވަނީ އެފްރިކާގެ 8 ޤައުމަކުން އެ ޤައުމަށް އެތެރެވުން މަނާކޮށްފައެވެ. އެގޮތުން ޑިސެމްބަރު މަހުން ފެށިގެން ބޮޓްސްވާނާ، އެސްވަޓީނީ، ލެސޯތޯ، މަލާވީ، މޮޒަންބީކް، ނެމީބިއާ، ދެކުނު އެފްރިކާ އަދި ޒިމްބާބުވޭއިން އެ ޤައުމަށް އެތެރެވުން ވަނީ މަނާކޮށްފައެވެ. ތައިލޭންޑުގެ އިތުރުންވެސް ގިނަ ޤައުމުތަކުން ދަނީ އެފްރިކާއިން ކުރާ ދަތުރުތައް ހުއްޓާލުމަށް އަންގަމުންނެވެ.
ޑަބްލިޔުއެޗްއޯގެ މާހިރުން ހިމެނޭ ޓީމަކުން ވަނީ މިވޭރިއަންޓްގެ މިހާރުގެ ހާލަތާއި ގުޅޭގޮތުން ދިރާސާތަކެއްކޮށްފައެވެ. އެއަށްފަހު ޑަބްލިޔުއެޗްއޯއިން ބުނީ މިހާރު ލިބެން ހުރި މައުލޫމާތުތަކަށް ބަލާއިރު މިއީ ކޮވިޑް ޖެހި ރަނގަޅުވެފައި ތިބި މީހުންނަށް އަލުން ކޮވިޑް ޖެހުމުގެ ފުރުސަތު ބޮޑު އަދި ކޮވިޑް-19 ފެތުރެމުން އަންނަ ގޮތަށް ވަރަށް ބޮޑަށް އަސަރުކުރުވާނެ ވޭރިއަންޓެއްކަމަށެވެ.
ފާއިތުވި ހަފްތާތަކުގައި ދެކުނު އެފްރިކާގައި ވަނީ ކޮވިޑްގެ ކޭސްތައް އިތުރުވެފައެވެ. އަދި އެއާއެކު މިވޭރިއަންޓް ވަނީ ފެނިފައެވެ. ޑަބްލިޔުއެޗްއޯއިން މިވޭރިއަންޓަށް ދީފައިވާ ނަމަކީ އޮމިކްރޯންއެވެ. ޑަބްލިޔުއެޗްއޯއިން ވޭރިއަންޓްތަކަށް ނަންތައް ދެމުން އަންނަނީ ގްރީކް އަކުރު ތަކުންނެވެ.
ދެކުނު އެފްރިކާއިން ފެނިފައިވާ އައު ވޭރިއަންޓް އޮމިކްރޯނަށް ވެކްސިނެއް އުފެއްދުމުގެ މަސައްކަތްކުރަމުން އަންނަ ކަމަށާއި ކުރިޔަށް އޮތް ހަފްތާތަކުގައި ޓެސްޓްކުރެވޭ ވަރުވާނެ ކަމަށް ވެކްސިން އުފައްދާ ނޮވޭވެކްސުން ވަނީ ބުނެފައެވެ.
