އަތޮޅުތެރޭގެ ރަށްރަށުގައި ފިޔަވަޅު އަޅަނީ އެވަގުތެއްގެ ހާލަތަށް ބެލުމަށްފަހު: އެޗްއީއޯސީ
ރަށެއް މޮނީޓަރިންނަށް ލަނީ އެ ރަށެއްގެ ޓާސްކް ފޯހާއި މަޝްވަރާ ކުރުމަށްފަހު
ޅ. ނައިފަރު
އަތޮޅުތެރޭގެ ރަށްރަށުގައި ފިޔަވަޅުތައް އަޅަނީ އެވަގުތުގެ ހާލަތަށް ބެލުމަށްފަހު ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ހާމަކޮށްފިއެވެ.
އެ ސެންޓަރުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެޓޯލްސް ކްލަސްޓަރ އަބްދުﷲ މައުރޫފް ވިދާޅުވީ އެ ރަށްރަށުގައި ފިޔަވަޅު އަޅަނީ އެ ހާލަތަކަށް ބެލުމަށްފަހުގައެވެ. އާންމު އުސޫލެއްގެ ތެރެއިން ރަށެއް މޮނީޓަރިންނަށް ލާ ހިސާބުން އެ ރަށެއްގެ ސްކޫލުތައް ވެސް ބަންދުވެގެންދާ ކަމަށެވެ. އެހެންނަމަވެސް ދިގު މުއްދަތަކަށް މޮނީޓަރިންނަށް ލާނަމަ ވަކި ޚާއްސަ އުމުރުފުރާތަކުގެ ކުދިންނަށް ސްކޫލަށް ދިޔުމުގެ ހުއްދަ ދެވޭ ކަމަށެވެ.
މިހާރު ވެސް ބައެއް ރަށްރަށުގައި އެގޮތަށް އަމަލު ކުރަމުންދާ ކަމަށް ޑރ މައުރޫފް ވިދާޅުވިއެވެ. ރަށެއް މޮނީޓަރިންގެ ހާލަތަށް ލުމަށްފަހު ކައުންސިލްތަކަށް އަންގާ ކަމަށާއި އެ ރަށެއް މޮނީޓަރިންނަށް ލަނީ އެ ރަށެއްގެ ޓާސްކް ފޯހާއި މަޝްވަރާ ކުރުމަށްފަހު ކަމަށްވެސް ވިދާޅުވިއެވެ.
މާލެ ސަރަހައްދުން ފެންނަ ކޭސްތަކާއި އަޅާބަލާއިރު ރަށްރަށުން ފެންނަ ކޭސްތަކުގެ އަދަދު އިތުރުވުމުން އެކަމާއި އެޗްއީއޯސީން ފިޔަވަޅު ނާޅާތީ އާންމު ރައްޔިތުން ވަނީ އެކަމުގެ ކަންބޮޑުވުން ފާޅުކޮށްފައެވެ. ރާއްޖޭގައި ފަހަކަށް އައިސް، ކޮވިޑް-19 ޖެހޭ މީހުންގެ އަދަދު ވަކި މިންވަރެއްގައި ހިފެހެއްޓިފައި ހުރިނަމަވެސް އަތޮޅުތަކުގައި ކޮވިޑް ޖެހޭ މީހުންގެ އަދަދު އަންނަނީ އިތުރުވަމުންނެވެ. ކޮވިޑްގެ ކޭސްތައް މަދުވެފައިވީނަމަވެސް ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.
ކޮވިޑް-19ގެ އަލާމާތްތައް ހުންނަ މީހުން މިހާރަކަށް އައިސް ސާމްޕަލް ދިނުމަށް ދެކޮޅުހަދާކަމަށް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެޕިޑިއަމޮލަޖިސްޓް ޑރ. އިބްރާހީމް އަފްޒަލް ވަނީ ވިދާޅުވެފައެވެ. ޑރ. އަފްޒަލް ވިދާޅުވީ، ބައެއް މީހުން ސާމްޕަލް ދިނުމަށް ދެކޮޅު ހަދާއިރު، މި ބައްޔަކީ އެހާ ބޮޑުކަމެއް ނޫންކަމަށް ހީވެފައިވާ ކަމަށެވެ. އަދި ކޮންޓެކްޓް ޓްރޭސިން ހެދުމަށް ދެކޮޅު ހަދާ މައްސަލަތައްވެސް ފާހަގަވާކަމަށް ޑރ އަފްޒަލް ވިދާޅުވިއެވެ.
ޑރ އަފްޒަލް ވިދާޅުވީ، ކޮންޓެކްޓް ޓްރޭސިން ހެދުމަށް ދެކޮޅު ހަދާނަމަ އަތޮޅު ތެރެއަށްވެސް އެކަމުގެ ނުރައްކާ އޮންނާނެ ކަމަށާއި، ބަލި ކޮންޓްރޯލް ކުރުމަށް ނުހަނު ދަތިވާ ކަމަށެވެ. އަދި ރެންޑަމް ސާމްޕަލް ނެގުމަށް ދިމާވާ ދަތިތައް އަތޮޅު ތެރެއިންވެސް ފާހަގަވާކަމަށް އެޗްއީއޯސީން މައުލޫމާތު ދެއެވެ.
