ހުޅުމާލޭގެ ފުރަތަމަ ފިޔަވަހީގެ ގޭބީސީތަކުން ކުނި ނަގާ ވަގުތަށް ބަދަލު ގެންނަން ވެމްކޯއިން ނިންމައިފިއެވެ.

ވެމްކޯއިން ބުނީ މި ނިންމުން ނިންމާފައިވަނީ މި ދަނޑިވަޅަކީ ހުޅުމާލެއަށް ގިނަ ބަޔަކު ޖަމާވަމުންދާ ދަނޑިވަޅަކަށްވެފައި، އެ ކޯޕަރޭޝަންގެ ޚިދުމަތްތައް އިތުރަށް ބައްޓަންކުރުމަށާއި، މަސައްކަތްތައް ރުކުރުވާލުމަށްޓަކައި ކަމަށެވެ.

އަންނަ ޑިސެމްބަރު މަހުގެ 1 ވަނަ ދުވަހުން ފެށިގެން ހުޅުމާލޭ ފޭސް 1 ގެ ގޭބީސީތަކުން ކުނި ނަގަމުންދާނީ ކޮންމެ ދުވަހެއްގެ އިރުއޮއްސި 18:00 އިން 23:00 އަށް ކަމަށް ވެމްކޯއިން ބުނެފައިވެއެވެ. އަދި ހަވީރު 17:00 އިން ފެށިގެން، ތައްޔާރުކޮށްފައިވާ ކުނިކޮތަޅު ނެގޭނެ އިންތިޒާމެއް ހަމަޖެއްސުމަށް ވެމްކޯއިން ވަނީ ހުޅުމާލޭގައި ދިރިއުޅޭ ރައްޔިތުންގެ ކިބައިން އެދިފައެވެ.

ވެމްކޯއިން ވަނީ މިދިޔަ ސެޕްޓެމްބަރު 15 ވަނަ ދުވަހުން ފެށިގެން މާލެ ސަރަހައްދުގެ ގޭބީސީތަކުން ކުނި ނަގާ ގޮތަށް ބަދަލު ގެނެސްފައެވެ. މިގޮތުން ހުޅުމާލެ، މާލެ، ވިލިމާލެ ހިމެނޭހެން އިމާރާތްތަކުގެ އެތެރެއިން ވަކި ފަންގިފިލާތަކުން ކުނި ނެގުމުގެ ޚިދުމަތް ދޭން ވަނީ ފަށާފައެވެ. އަދި ރަޖިސްޓްރީނުކުރާ ގޭބީސީތަކުން ކުނި ނެގުން ވަނީ ހުއްޓާލާފައެވެ.

ވެމްކޯގެ ޚިދުމަތަށް ރަޖިސްޓްރީ ނުކުރާ ކަސްޓަމަރުން ވިހާވެސް އަވަހަކަށް އެ ޚިދުމަތަށް ރަޖިސްޓްރީކުރުމަށް ވެމްކޯއިން ވަނީ އެދިފައެވެ. ޚިދުމަތަށް ރަޖިސްޓްރީކުރުމަށް އެދޭ ފޯމު އެ ކޯޕަރޭޝަންގެ ވެބްސައިޓުން ލިބެން ހުންނާނެ ކަމަށް ވެމްކޯއިން ބުނެފައިވެއެވެ.