އެކުދިންނަކީވެސް ހަމަ އިންސާނުންނެވެ.
26 ނޮވެމްބަރު 2021 | ހުކުރު 12:55ދައުލަތުން ބަލާ ކުދިން އަތޮޅުތެރެއަށް ބަދަލުކުރުމުގެ މަސައްކަތް ކުރިއަށްދޭ
ފިޔަވަތީގެ ފުރާޅުމައްޗަށް ކުޑަކުދިންތަކެއް އަރައި ތިބި މަންޒަރު
އާއިލާތަކުގެ އިހުމާލެއްގެ ސަބަބުން ނުވަތަ އެނޫން އެހެން ސަބަބަކާ ހުރެވެސް، ދައުލަތުގެ ބެލުމުގެ ދަށަށް ކުދިން ނަގައި، ދައުލަތުން އެކުދިން ބެލުމުގެ ކަންކަަމާ ހަވާލުވެއެވެ. އަދި އެ ކުދިންނަކީ ރަނގަޅަށް ތަރުބިއްޔަތު ލިބިފައި ތިބި ބައެއްގެ ގޮތުގައި މުޖުތަމައަށް ނެރެއެވެ. އެހެންނަމަވެސް މުޖުތަމައުން އެކުދިން ބަލައިގަންނަން ދެކޮޅު ހަދާ ވާހަކައަކީ އަބަދުވެސް ދެކެވޭ ވާހަކައެކެވެ. މިހާރުވެސް ދޭތެރެ ދޭތެރެއިން މިފަދަ ވާހަކަތައް ދެކެވެއެވެ.
މީގެ ކުރިން ދައުލަތުގެ ބެލުމުގެ ދަށުގައި ގިނަ ކުދިން ތިބީ ހުޅުމާލޭގައި ހުންނަ ފިޔަވަތި އަދި ވިލިނގިލީ ކުޑަކުދިންގެ ހިޔާގައެވެ. އެހެންނަމަވެސް އެކުދިންނަކީވެސް އެހެން ކުދިންނެކޭ އެއްފަދައިން މުޖުތަމައުގެ ތެރޭގައި އެހެން ކުދިންނާ އެއްކޮށް އުޅެ ބޮޑުވާ ކުދިން ކަމުގައި ހެދުމަށް ސަރުކާރުން ވަނީ، އަތޮޅުތެރޭގެ އެކި ރަށްތަކުގައި އަމާންވެށިތައް ގާއިމްކޮށް އެކުދިން އެތަންތަނަށް ބަދަލުކުރުމުގެ މަސައްކަތް ފަށާފައެވެ.
މިހާތަނަށް އައިއިރު އެތައް ކުދިންނެއް ވަނީ އަމާންވެށިތަކަށް ބަދަލުކޮށްފައެވެ. މިހާތަނަށް ޖުމްލަ 106 ކުދިން އަމާންވެށިތަކަށް ބަދަލުކޮށްފައިވާއިރު، މިގޮތަށް އަމާންވެށިތަކަށް ބަދަލުކުރާ ކުދިން އުޅެމުންދަނީ އެހެން ކުދިންވެސް އުޅޭފަދަ އާދައިގެ ދިރިއުޅުމެކެވެ. އެހެންކުދިންނެކޭ އެއްގޮތަށް އެކުދިންވެސް ހާޒިރުވަމުންދަނީ އެ ރަށްރަށުގެ ސްކޫލްތަކަށެވެ. އެހެންނަމަވެސް އެ ކުދިން އެންމެ ފުރަތަމަ ރަށްރަށަށް ބަދަލުކުރިއިރު، ދިމާވި އެންމެ ބޮޑު އެއް މައްސަލައަކީ އެ ރަށްރަށުގެ މީހުން އެކުދިން ބަލައިނުގަތުމެވެ. ކަންކަން ކުރުމުގައި އެ ކުދިންނާ އެހެން ކުދިންނާ ވަކިކޮށްފައިވެއެވެ. އެ ކުދިންނަކީ "ބަސްނާހާ" ކުދިންގެ ގޮތުގައި ސިފަކޮށްފައިވެއެވެ.
މިކަމާއި ގުޅިގެން ޖެންޑަރ މިނިސްޓްރީގެ ސްޓޭޓް މިނިސްޓަރ މުހައްމަދު ޝިހާބު ވިދާޅުވީ ދައުލަތުން ބަލާ ހުރިހާ ކުދިންނަކީވެސް ވަރަށް ބޮޑު އަނިޔާވެރިކަމެއް ނުވަތަ "ޓްރޯމާ" ތަހައްމަލްކުރަން ޖެހިފައިވާ ކުދިން ކަމަށެވެ. އެއީ ކޮން ކަހަލަ ކަމެއް ކަން އެކަން ތަހައްމަލުކޮށްފައިނުވާ ބަޔަކަށް ނޭނގޭނެ ކަމަށް ޝިހާބު ވިދާޅުވިއެވެ. އެކުދިން އެކަންކަން ތަހައްމަލް ކުރަމުންދާއިރު، ސްކޫލަށް ދާ ތަނުން ފެންނަނީ އެހެން ކުދިންގެ މައިންބަފައިން އެކުދިންގެ އަތުގައި ހިފައިގެން ސްކޫލަށް ދާ ތަން ކަމަށް އޭނާ ވިދާޅުވިއެވެ. އެއީ ވަރަށް ހިތްދަތި ކަމެއް ކަމަށާއި، ޖެންޑަރއިން ކުރަމުންދާ މަސައްކަތަކީ އެކުދިންގެ އެ ހިތްދަތިކަން ކުޑަކުރަން މަސައްކަތްކުރުން ކަމަށް ޝިހާބު ވިދާޅުވިއެވެ. އެކުދިންގެ އެ ހިތްދަތިކަން ބޭރުކުރާ ގޮތް ތަފާތުވެދާނެ ކަމަށާއި، އެހާހިސާބުން އެކުދިންނަކީ ވިޔާނުދާ ކުދިންނަށް ވަނީ ކަމަށް ޝިހާބު ވިދާޅުވިއެވެ.
ޝިހާބު ވިދާޅުވީ އެކުދިން އަމާންވެށިތަކަށް ބަދަލުކުރަން އުޅުނުއިރު އެންމެ ފުރަތަމަ ވަރަށް ގިނަ ގޮންޖެހުންތަކާ ކުރިމަތިލާންޖެހުނު ކަމަށެވެ. އެއީ "ބަސްނާހާ" ކުދިންތަކެއް ގެންދާތީ އެންމެންވެސް ކަންބޮޑުވެ އެކުދިން ބަލައިގަންނަން ބޭނުން ނުވުން ކަމަށެވެ. އެހެންނަމަވެސް މިހާރު ގިނަ ރަށްރަށުގައި އަމާންވެށިތަކުގައި އުޅޭ ކުދިންނަކީ އެ މުޖުތަމައުގެ ބަޔަކަށް ވެފައިވާކަމަށް ޝިހާބު ވިދާޅުވިއެވެ. އެހެންނަމަވެސް އެކުދިން އަމާންވެށިތަކަށް ބަދަލުކުރާ ހިސާބުން އެކުދިންގެ އުޅުމަށް ބޮޑެތި ބަދަލުތަކެއް އަންނަކަން ފާހަގަކުރެވޭކަމަށް ޝިހާބު ވިދާޅުވިއެވެ. އެކުދިންގެ ތެރެއިން "ތަރިން" ފެންނަ ކަމަށާއި، އެކުދިންގެ ތެރޭގައި ގައުމީ ފެންވަރުގައި ފާހަގަކޮށްލެވޭ ކުދިން އެބަތިބި ކަން އޭނާ ފާހަގަކުރެއްވިއެވެ.
އެކި މީހުން އެމީހުންގެ އިހުސާސްތައް ބޭރުކުރާނީ އެކި ގޮތްގޮތަށެވެ. ވަކިން ޚާއްސަކޮށް ރަނގަޅަށް ނުވިސްނޭ ކުޑަކުއްޖަކު ރުޅިއައުމުން އަމަލުކުރާ ގޮތާއި، ބޮޑު މީހަކު އަމަލުކުރާ ގޮތް ތަފާތުވެދާނެއެވެ. އެކުދިންނަކީ ނުވެސް ދަންނަ ބަޔަކާ އެއްކޮށް އުޅެންޖެހޭ ކުދިންނެވެ. އެކުދިން ފޫހިވުމުން ނުވަތަ ރުޅިއައުމުން ވާހަކަ ދައްކާލާ ހަދާނެ މައެއް ނުވަތަ ދައްތައެއް އެކުދިންގެ ނުހުރެއެވެ. އެހެންކަމުން ދެން އެކުދިން ކުރާ ކަމެއްގެ ސަބަބުން އެކުދިންނަކީ "ގޯސް" ކުދިންގެ ގޮތުގައި ލޭބަލް ކުރުމަކީ އެކުދިންނަށް އިތުރަށް ދެވޭ އަނިޔާއަކަށް ވާނެއެވެ.
