އެކުވެރި ސުވާދީބުގެ ނަމުގައި ޕާޓީ ހަދަން ހުއްދަ ނުދޭން ނިންމައިފި
26 ނޮވެމްބަރު 2021 | ހުކުރު 03:28ހުއްދަ ނުދޭން ނިންމީ ޕާޓީގެ ނަން ރާއްޖޭގެ ވަކި ސަރަހައްދަކަށް ނިސްބަތް ވާތީ
އިންތިޚާބާ ބެހޭ މަރުކަޒު
"އެކުވެރި ސުވަދީބު ޕާޓީ"ގެ ނަމުގައި ސިޔާސީ ޕާޓީއެއް އުފެއްދުމަށް ހުށަހަޅާފައިވާ ހުށަހެޅުން ބަލައިނުގަތުމަށް އިލެކްޝަންސް ކޮމިޝަން (އީސީ)ން ނިންމައިފިއެވެ.
މިޕާޓީ އުފެއްދުމަށް އެދި މުހައްމަދު ޔާސީން އިލެކްޝަން ކޮމިޝަނަށް ހުށަހަޅާފައިވަނީ ނޮވެމްބަރ 15 ވަނަ ދުވަހުއެވެ.
ނަމަވެސް އީސީން ބުނީ ޕާޓީގެ ނަން ރާއްޖޭގެ ވަކި ސަރަހައްދަކަށް ނިސްބަތް ވާތީ އެއީ ސިޔާސީ ޕާޓީއަކަށް ކިޔުމަށް އެކަށީގެންވާ ނަމެއް ކަމުގައި ނުދެކޭ ކަމަށެވެ. އެހެން ކަމުން އެދިފައިވާ ގޮތަށް ހުއްދަ ދެވެން ނެތްކަމަށް އީސީން ވަނީ ނިންމާފައެވެ.
ސިޔާސީ ޕާޓީގެ ގާނޫނުގެ 14 ވަނަ މާއްދާގެ (ށ) ގައި ވާގޮތުން ސިޔާސީ ޕާޓީއެއްގެ ނަމުގައި މީހެއްގެ އަމިއްލަ ނަން، ވަނަން، ރާއްޖޭގެ ވަކި ސަރަހައްދަކަށް، ވަކި އަތޮޅަކަށް، ވަކި ރަށަކަށް ނުވަތަ ވަކި އަވަށަކަށް ކިޔާ ނަން ހިމަނައިގެން ނުވާނެއެވެ. އަދި މި ގަވައިދުގެ ހަވަނަ މާއްދާގެ (ރ) ގައި ސިޔާސީ ޕާޓީއެއް އުފެއްދުމުގެ ހުއްދައަށް އެދޭ ފަރާތުން އެ ޕާޓީއަށް ކިޔަން ހުށަހަޅާ ނަމަކީ އިލެކްޝަން ކޮމިޝަނުން ގަބޫލުކުރާ ނަމަކަށް ވާންޖެހޭނެއެވެ.
