"ސްޓްރެޓީޖިކް ޕޮލިސިންގ ރިކުއަޔަރމަންޓް"ގެ ސަބަބުން، ފުލުހުން އަމާޒުހިފަން ސަރުކާރުން ބޭނުންވާ މިސްރާބު ސާފުވާނެ: އިމްރާން

ދިވެހި ފުލުހުންގެ ޚިދުމަތަށް މަތިކޮށްފައިވާ އެންމެހާ ޒިންމާތަކާއި މަސްއޫލިއްޔަތުތައް އަދާކުރުމުގެ މަސައްކަތް، ކަނޑައެޅޭ ވަކި ތަރުތީބަކުން ރާވައިގެން ކުރިއަށް ގެންދިޔުމަށްޓަކައި "ސްޓްރެޓީޖިކް ޕޮލިސިންގ ރިކުއަޔަރމަންޓް" ކަނޑައެޅުމުން، ފުލުހުން އަމާޒުހިފަން ސަރުކާރުން ބޭނުންވާ މިސްރާބު ސާފުވާނެކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

ހޯމް މިނިސްޓަރ ވަނީ ސްޓްރެޓީޖިކް ޕޮލިސިންގ ރިކުއަޔަރމަންޓް ބުރާސްފަތި ދުވަހު ކަނޑައަޅުއްވައި، ކޮމިޝަނަރ އޮފް ޕޮލިސް މުހައްމަދު ހަމީދަށް އެކަން އަންގަވާފައެވެ. މިއީ މިނިސްޓަރ އޮފް ހޯމް އެފެއަރޒް ކަނޑައެޅުއްވުމަށް ދިވެހި ފުލުހުންގެ ޚިދުމަތުގެ ގާނޫނުގައި ބަޔާންކުރާ ކަމެކެވެ. މިކަން ކަނޑައަޅައި އެކަން ސީޕީއަށް އެންގެވުމަށްފަހު މިނިސްޓަރ ކުރެއްވި ޓްވީޓެއްގައި ވިދާޅުވީ، ސްޓްރެޓީޖިކް ޕޮލިސިންގ ރިކުއަޔަރމަންޓްގެ ސަބަބުން ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް އިތުރަށް މަގުފަހިވެގެންދާނެކަމަށެވެ.

Advertisement

އަދި މިއީ ފުލުހުންގެ ތަރައްގީއަށް ކުރަމުންދާ ކަންކަމަށް އިތުރުވި ބޮޅެއްކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، މިއީ ދިވެހި ފުލުހުންގެ ޚިދުމަތަށް މަތިކޮށްފައިވާ އެންމެހާ ޒިންމާތަކާއި މަސްއޫލިއްޔަތުތައް އަދާކުރުމުގެ މަސައްކަތް، ކަނޑައެޅޭ ވަކި ތަރުތީބަކުން ރާވައިގެން ކުރިއަށް ގެންދިޔުމަށްޓަކައި، ދިވެހި ފުލުހުންގެ ޚިދުމަތުގެ ގާނޫނުގެ 33 ވަނަ މާއްދާއިން ބާރުލިބިގެން، މިނިސްޓަރ އޮފް ހޯމް އެފެއަރޒްގެ ހައިސިއްޔަތުން ކަނޑައަޅައި، ލިޔުމުން ފުލުހުންނަށް އަންގާ ސްޓްރެޓީޖިކް ޕޮލިސިންގ ރިކުއަޔަރމަންޓްއެކެވެ. މި "ސްޓްރެޓީޖިކް ޕޮލިސިންގ ރިކުއަޔަރމަންޓް" ކަނޑައެޅުމުގައި ރިއާޔަތް ކޮށްފައިވާނީ ދިވެހި ފުލުހުންގެ ޚިދުމަތުގެ ގާނޫނުގެ ރޫހަށާއި، ދިވެހި ފުލުހުންގެ ޚިދުމަތުގެ މިހާރުގެ ހާލަތަށާއި، ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަމަށް މެދުވެރިވަމުން އަންނަ ގޮންޖެހުންތަކަށާއި، ދިވެހިރާއްޖޭގެ ކުށުގެ މާހައުލު ބަދަލުވަމުން އަންނަ ގޮތަށެވެ.

މީގެއިތުރުން ދިވެހި ފުލުހުންގެ ޚިދުމަތުގެ އެންމެހާ ކަންކަން ތަރުތީބުކޮށް އިންތިޒާމުކުރުމާއި، ދިވެހި ފުލުހުންގެ ޚިދުމަތުގެ ކަންކަން ޕްލޭންކޮށް ރޭވުމުގައި، ގާނޫނުގައި ބަޔާންކުރާ ގޮތުގެމަތިން، ކޮމިޝަނަރ އޮފް ޕޮލިސް މަސައްކަތްކުރަންވާނީ މި "ސްޓްރެޓީޖިކް ޕޮލިސިންގ ރިކުއަޔަރމަންޓްް"ގައިވާ ކަންކަން ހާސިލުކުރުމަށެވެ. ގާނޫނުއަސާސީގެ 242 ވަނަ މާއްދާގެ ދަށުން ދިވެހި ފުލުހުންގެ ޚިދުމަތަށް ޒިންމާ މަތިކުރެވިފައިވާ ވަޒީރަކު، މި "ސްޓްރެޓީޖިކް ޕޮލިސިންގ ރިކުއަޔަރމަންޓް" މުރާޖައާކުރަންދެން ނުވަތަ މި "ސްޓްރެޓީޖިކް ޕޮލިސިންގ ރިކުއަޔަރމަންޓް"ގެ ބަދަލުގައި މުޅިން އައު "ސްޓްރެޓީޖިކް ޕޮލިސިންގ ރިކުއަޔަރމަންޓް" ތަކެއް ކަނޑައަޅަންދެން، ފުލުހުންގެ މަސައްކަތްތައް ރާވައިގެން ކުރިއަށް ގެންދިއުމުގައާއި ފުލުހުންގެ ޚިދުމަތް ތަރުތީބުކުރުމުގައި ސަރުކާރުންދޭ އަސާސީ އިރުޝާދުކަމުގައި ބަލަންވާނީ މި ސްޓްރެޓީޖިކް ޕޮލިސިންގ ރިކުއަޔަރމަންޓްގައި ބަޔާންކުރާ ކަންކަމެވެ.

މި ސްޓްރެޓީޖިކް ޕޮލިސިންގ ރިކުއަޔަރމަންޓް ކަނޑައަޅާފައިވަނީ މިވަގުތުގެ ހާލަތަށް ރިއާޔަތް ކޮށްގެންކަމަށްވާތީ، ހާލަތު އެހެން ގޮތަކަށް ބަދަލުވުމުން ނުވަތަ އެކަށީގެންވާ މުއްދަތު ފަހަނައަޅައި ދިއުމުން މިސްޓްރެޓީޖިކް ޕޮލިސިންގ ރިކުއަޔަރމަންޓް މުރާޖައާކުރުމަކީ މުހިންމު ކަމެއްކަމަށްވެސް މިނިސްޓަރ ވިދާޅުވިއެވެ.

މިނިސްޓަރގެ ޓްވީޓް ރީޓްވީޓް ކުރައްވަމުން ސީޕީ ވިދާޅުވީ، މީގެ 8 އަހަރު ކުރިން ފުލުހުންގެ ގާނޫނު ޑްރާފްޓް ކުރުމުގެ މަސައްކަތް ހިނގިއިރު ހުށަހެޅި މިހުށަހެޅުުން 2020ގައި އެކުލަވާލެވުނު ގާނޫނުގައި ހިމެނި، ފުލުހުންގެ ކަންކަމަށް ޒިންމާވާ މިނިސްޓަރުގެ އެންމެ މަތީ އިރުޝާދުގެ ގޮތުގައި މިކަރުދާސް އެކުލަވާލެވުން މިއީ ވަރަށް ބޮޑު ކުރިއެރުމެއްކަމަށެވެ.

މި ޕްލޭންގައި މައިގަނޑު 12 ކަމެއް ވަނީ ފާހަގަކޮށް, އެކަންކަން ކުރިޔަށް ގެންދަންވީ ގޮތް ބަޔާންކޮށްފައެވެ. އެގޮތުން ދިވެހި ފުލުހުންގެ ޚިދުމަތް ތަރައްގީކުރުމާއި، ފުރާނައާއި މުދަލާއި ވެށީގެ ރައްކާތެރިކަމާއި، ކުށްމަދުކުރުމާއި ތަހުގީގުކުރުން ހިމެނެއެވެ. އަދި އިންޓެލިޖެންސްއާއި، ޓެރަރިޒަމް ރެސްޕޮންސްއާއި، މަސްތުވާތަކެތީގެ ވަގުފާރިއާއި، ރާވައިގެން ހިންގާ ބޮޑެތި ކުށްތަކާއި، ކުށްކުރާ ޖަމާއަތްތަކާއި، ކްރިޓިކަލް އިންފްރާސްޓްރަކްޗަރއާއި، ކުށުގެ ސަބަބުން އިގުތިސާދަށް ކުރާ އަސަރާއި، ޓެކްނޮލޮޖީ ބޭނުންކުރާ މިންވަރާއި، ސައިބަރ ކްރައިމް އަދި މުޖުތަމައުގައި ހަވާސާވެފައިވާ ފަރާތްތައް ވަނީ ހިމަނާފައެވެ.