ހއ.ކެލާއިން 33 ބަންޑާރަ ގޯތި ދޫކުރަން ނިންމައި، ގޯތިތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.

ކެލާ ކައުންސިލުން ހާމަކޮށްފައިވާ ގޮތުގައި މި ގޯތިތައް ދޫކުރުމުގައި ބަލާނީ، އެއްފަރާތަކަށް ދެގޯތި ނުލިބޭނޭ އުސޫލަކުން ގޯތިދޫކުރުމަށް ކަމަށެވެ. އެގޮތުން ގޯތި ދޫކުރުމުގައި އަމަލުކުރާނީ ކެލާ ކައުންސިލް އިދާރާއިން އާންމުކޮށްފައިވާ "ހއ. ކެލާއިން މީގެ ކުރިން ދޫކޮށްފައިވާ ބަންޑާރަ ގޯތިތަކުގެ ތެރެއިން ގޯތި ލިބުނު ފަރާތްތަކުން ދޫކޮށްލައިފައިވާ ގޯތިތައް ދިރިއުޅުމަށްޓަކައި އަލުން ދޫކުރުމާއިބެހޭ އުސޫލު"އާ އެއްގޮތަށްކަމަށެވެ.

ކެލާއިން ގޯއްޗަށް އެދި ހުށަހަޅާއި ފަރާތްތަކަށް ޝަރުތުތަކެއް ކަނޑައެޅިފައިވާއިރު، ގޯއްޗަށް އެދި ފޯމު ހުށަހަޅާ ފަރާތްތަކުގެ ތެރެއިން، ގޯތި ދޫކުރުމަށް ހަމަޖެހިފައިވަނީ ޝަރުތު ފުރިހަމަވާ ފަރާތްތަކުގެ ތެރެއިން އެންމެ މަތީން މާކްސް ލިބޭ ފަރާތްތަކުގެ ތަރުތީބުންނެވެ. އަދި ދެފަރާތެއް ނުވަތަ އެއަށްވުރެން ގިނަ ފަރާތްތަކުގެ މާކްސް އެއްވަރުވެއްޖެނަމަ ދެން ގޯތި ދޫކުރުމަށް ހަމަޖެހިފައިވަނީ  އެފަރާތްތަކުގެ މެދުގައި ގުރުއަތުލައިގެންނެވެ. ގޯތި ދިނުމަށް ހަމަޖެހިފައިވަނީ އެންމެ މަދުވެގެން 50(ފަންސާސް) ޕޮއިންޓް ލިބޭ ފަރާތްތަކަށެވެ.

ބަންޑާރަ ގޯއްޗަށް ކުރިމަތިލުމުގެ ފުރުސަތު މިހާރު ހުޅުވާލާފައިވާއިރުގައި، ގޯއްޗަށް އެދުމުގެ ފޯމް ކެލާ ކައުންސިލް އިދާރާއިންނާއި ފޭސްބުކްޕޭޖާއި ކޮމިޔުނިޓީ ގުރޫޕްއިން ލިބެން ހުންނާނެކަމަށް ކަމަށް ކެލާ ކައުންސިލުން ހާމަކުރެއެވެ. އަދި ފޯމް ފުރިހަމަ ކުރުމަށްފަހު ޑިސެމްބަރ 28 ވާ އަންގާރަ ދުވަހުގެ 14:00ގެ ކުރިން ކެލާ ކައުންސިލް އިދާރާއަށް ހުށަހެޅުމަށްވެސް އެދިފައިވެއެވެ.