"އާސްކް ސްޕީކަރ" ނޮވެމްބަރ 30ގައި، ސުވާލު ފޮނުވުމުގެ ފުރުސަތު ހުޅުވާލައިފި

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ސުވާލުކުރުމަށް ބާއްވާ "އާސްކް ސްޕީކަރ" ޕްރޮގްރާމްގެ ހަތަރު ވަނަ ޕްރޮގްރާމް ނޮވެމްބަރ މަހުގެ 30 ވަނަ ދުވަހުގެ ރޭ އޮންނާނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.

ޓީވީއާއި ސޯޝަލް މީޑިއާ މެދުވެރިކޮށް، ރައްޔިތުންގެ ސުވާލުތަކަށް ޖަވާބު ދެއްވުމަށް ބާއްވާ، "އާސްކް ސްޕީކަރ" ޕްރޮގްރާމް އޮންނާނީ ނޮވެމްބަރ 30 ވަނަ ދުވަހުގެ ރޭ 9 ޖަހާއިރުއެވެ. ސުވާލު ހުށަހެޅުމުގެ ފުރުސަތު ހުޅުވާލާފައިވާއިރު، ސުވާލުތައް އެސްއެމްއެސް، ޓެލެގްރާމް ވައިބަރ އަދި ވަޓްސްއެޕް މެދުވެރިކޮށް ފޮނުވާނީ 7234566އަށެވެ. ސޯޝަލް މީޑިއާ މެދުވެރިކޮށް ސުވާލު ފޮނުވަން ބޭނުންވާ ފަރާތްތައް، ސުވާލު ޕޯސްޓު ކުރާއިރު AskSpeaker# ބޭނުންކުރުމަށް މަޖިލީހުގެ އިދާރާއިން އެދެއެވެ.

މީގެއިތުރުން މިފަހަރުގެ ޕްރޮގްރާމްގައި ކްލަބް ހައުސް މެދުވެރިކޮށް ލައިވްކޮށް ސުވާލުކުރުމުގެ ފުރުސަތު ވަނީ ހުޅުވާލާފައެވެ. އެގޮތުން ކްލަބް ހައުސް މެދުވެރިކޮށް ސުވާލުކުރަން ބޭނުންވާ ފަރާތްތަކުން، ނަމާއި އައިޑީ ނަންބަރާއި އަދި ކްލަބް ހައުސް އައިޑީ 7234566 ފޮނުވުމަށް މަޖިލީހުގެ އިދާރާއިން އެދެއެވެ.

މި ޕްރޮގްރާމުގައި ލައިވްކޮށް ސުވާލުކުރަން ބޭނުންވާ ފަރާތްތަކުން، ނަމާއި، ކުރަން ބޭނުންވާ ސުވާލު، ނޮވެމްބަރ 30 ވަނަ ދުވަހުގެ މެންދުރު 2:00ގެ ކުރިން ރައްޔިތުންގެ މަޖިލީހުގެ އިދާރާގެ މީޑިއާ ސެކްޝަންގެ ހޮޓްލައިން ނަންބަރު 7234566ށް ފޮނުވުމަށް ވަނީ އެދިފައެވެ.

އެންމެފަހުން މި ޕްރޮގްރާމް ބާއްވާފައިވަނީ ކްލަބް ހައުސް މެދުވެރިކޮށެވެ. އެއީ އޭރު މެއި 6ގައި ރައީސް ނަޝީދު އަވަހާރަކޮށްލުމަށް ދިން ބޮމުގެ ހަމަލާގައި ލިބިވަޑައިގެންނެވި އަނިޔާތަކަށް ފަރުވާ ހޯއްދެވުމަށް ރާއްޖެއިން ބޭރުގައި ހުންނެވުމުންނެވެ. މިފަހަރުގެ އާސްކް ސްޕީކަރ ޕްރޮގްރާމް އޮންނާނީ އާންމު ގޮތެއްގައިވެސް މިޕްރޮގްރާމް ބާއްވަމުން އަންނަ ޕީއެސްއެމް ސްޓޫޑިއޯގައެވެ.