މީދާ ހިފުމުގެ މުބާރާތެއް ރ. ވާދޫގައި ބާއްވަނީ، 1 ވަނަ އަށް 3000 ރުފިޔާ
އެއްވަނަ ލިބޭނީ މަދުވެގެން 200 މީދާ ހިފައިގެން
ރ. ވާދޫ
ރ. ވާދޫއިން މީދާ މަދުކުރުމަށްޓަކައި މީދާ ހިފުމުގެ މުބާރާތެއް ބާއްވަން ނިންމައި، އެކަމުގައި ބައިވެރިވާން ފުރުސަތު ހުޅުވާލައިފި އެވެ.
ވާދޫ ކައުންސިލް މައުލޫމާތު ދެއްވިގޮތުގައި، އެ ރަށުގައި ކޮންމެ އަހަރަކު ވެސް މީދާ ހިފުމުގެ ހަރަކާތެއް ކައުންސިލުން ބާއްވަމުން އަންނަ ކަމަށާއި، މިއީ އާދަޔާ ޚިލާފަށް މީދާ ގިނަވެގެން ކުރާ ކަމެއް ނޫން ކަމަށެވެ.
ކައުންސިލުން މައުލޫމާތުދޭގޮތުގައި، އެ ރަށުގައި އެންމެ ކުރިން މީދާ ހިފަމުން އައީ ރަށުގެ އެކި ތަންތަނަށް ބޭސް ލައިގެންނެވެ. ނަމަވެސް އެއީ އެންމެ ރައްކާތެރި ގޮތް ނޫން ކަމަށް ފެންނާތީ މިފަހަރު ބަދަލެއް ގެނައީ ކަމަށް ވިދާޅުވި އެވެ. ކައުންސިލުން ބުނީ މިކަން ކުރުމަށް ރައްޔިތުންގެ ރޫހު އިތުރުކުރުމަށް މުބާރާތެއް ބޭއްވުމަކީ އެންމެ ރަނގަޅު ގޮތް ކަމަށް ކައުންސިލަށް ފެނުނީ އެވެ. މި މުބާރާތުގައި އަމިއްލަ ގޮތުންނާއި، ގްރޫޕް ހަދައިގެންނާއި، އަދި ޖަމްއިއްޔާގެ ފަރާތުން ބައިވެރިވުމުގެ ފުރުސަތު ވެސް ވަނީ ހުޅުވާލާފައެވެ.
ވާދޫގައި ދިރިއުޅޭ މީހުންނަށް އެކަނި ބައިވެރިވެވޭ ގޮތަށް ބާއްވާ މި މުބާރާތް އޮންނާނީ އަންނަ ބުރާސްފަތި ދުވަހުން ފެށިގެން އަންނަމަހުގެ 5 ވަނަ ދުވަހުގެ ނިޔަލަށެވެ. މި މުބާރާތުން އެއްވަނައަށް 3000 ރުފިޔާ ވަނީ ކަނޑައަޅާފައެވެ. އަދި ދެވަނަ އަށް 2000 ރުފިޔާ ކަނޑައަޅާފައިވާއިރު 3 ވަނައަށް ދާ ފަރާތަކަށް 1000 ރުފިޔާ ދިނުމަށް ވަނީ ހަމަޖެހިފައެވެ.
އެރަށު ކައުންސިލުން ހާމަކުރައްވާ ގޮތުގައި އެއް ވަނަ ލިބޭނީ 200 އަށް ވުރެ ގިނަ މީދާ ހިފައިގެންނެވެ. ދެ ވަނަ ލިބެނީ 150 މީދާ ހިފައިގެން ކަމަށާއި، ތިން ވަނަ ލިބޭނީ 100 މީދާ ހިފައިގެން ކަމަށްވެސް ކައުންސިލުން މައުލޫމާތުދެއެވެ. މިފަހަރު، ރައްކާތެރިކަމާއެކު މީދާ ހިފުމުގެ މުބާރާތް ކުރިއަށް ގެންދާއިރު، މި މުބާރާތުގައި ހިފާ މީދާތައް ނައްތާލަން ނިންމާފައި ވަނީ ރަށުގެ ކަނޑައެޅިފައިވާ ވަކި ސަރަހައްދެއްގައި ވަޅުލައިގެންނެވެ. ރާއްޖޭގެ އެކި ރަށްރަށުގަިއ މީގެ ކުރިންވެސް ވަނީ މީދާ ނައްތާލުމުގެ މުބާރާތްތައް ކުރިއަށް ގެންގޮސްފައެވެ.
