ކުޑަކުދިންނަށް ކުރާ އަނިޔާއާގުޅޭ 127 މައްސަލައެއް ސެޕްޓެމްބަރު މަހު!

ނިމިދިޔަ ސެޕްޓެމްބަރު މަހު މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއަށް ޖުމްލަ 287 މައްސަލަ ރިޕޯޓުކޮށް އެޓެންޑްކޮށްފިއެވެ.

ޖެންޑަރ މިނިސްޓްރީން ބުނީ މި މައްސަލަތަކުގެ ތެރެއިން، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 127 މައްސަލައެއް ރިޕޯޓުކޮށްފައިވާކަމަށެވެ. މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައި ވަނީ އިހުމާލުވުމުގެ މައްސަލަތައް ކަމަށާއި، މި ބާވަތުގެ 40 މައްސަލަ ރިޕޯޓުކޮށްފައިވާ ކަމަށެވެ.

މި ބާވަތުގެ މައްސަލަތަކުގެ އިތުރުން ޖިސްމާނީ ހާނިއްކައިގެ 29 މައްސަލަ، ޖިންސީ ހާނިއްކައިގެ 25 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 12 މައްސަލަ، ނަފްސާނީ ހާނިއްކައިގެ 10 މައްސަލަ، ނަހަމަ ގޮތުގައި ބޭނުންކުރުމުގެ 8 މައްސަލަ، އެހެން ކުދިންގެ ފަރާތުން ގަނާ ލިބުން އަދި ފުރައްސާރައިގެ ޝިކާރައަކަށްވުމުގެ 3 މައްސަލަ، ފުރައްސާރައިގެ ޝިކާރައަކަށްވުމުގެ 2 މައްސަލަ އަދި ކުދިން ދޫކޮށްލާފައި ދިއުމުގެ 1 މައްސަލަ ހުށަހެޅިފައިވެއެވެ.

ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 64 މައްސަލަ ސެޕްޓެމްބަރު މަހު މިނިސްޓްރީއަށް ހުށަހަޅާފައިވެއެވެ. މި ފަދަ މައްސަލަތަކުގެ ތެރެއިން، ޖިސްމާނީ އަނިޔާކުރުމުގެ 27 މައްސަލައެއް ރިޕޯޓުކޮށްފައިވެއެވެ. މިބާވަތުގެ މައްސަލަތަކުގެ އިތުރުން، ނަފްސާނީ އަނިޔާކުރުން ނުވަތަ އަނގަބަހުން ކުރެވޭ އަނިޔާގެ 16 މައްސަލަ، ޖިންސީ ފުރައްސާރަ ކުރުމުގެ 8 މައްސަލަ، ބިރުދެއްކުމުގެ ގޮތުން ކުރެވޭ ކަންކަމުގެ 7 މައްސަލަ، ޖިންސީ ހާނިއްކަކުރުމުގެ 4 މައްސަލަ، މުދާ ހިފެހެއްޓުން ނުވަތަ މުދަލަށް ގެއްލުން ދިނުމުގެ 1 މައްސަލަ އަދި ހިފެހެއްޓުމުގެ 1 މައްސަލަ ހިމެނެއެވެ.

އާއިލީ މައްސަލަތަކުގެ ގޮތުގައި 36 މައްސަލައެއް ވަނީ ހުށަހަޅާފައެވެ. މިފަދަ މައްސަލަތަކުގެ ތެރޭގައި ކުދިން ބެލުމުގައި ޖެހޭ 18 މައްސަލަ، ކުދިންނާ ބައްދަލުކުރުމުގައި ޖެހޭ 16 މައްސަލަ، އަދި ދަރިންގެ ޚަރަދު ދިނުމުގައި ޖެހޭ 2 މައްސަލަ ހިމެނެއެވެ.

ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުނަށް އަޅާލުމާއި އެހީތެރިކަން ބޭނުންވެގެން 18 މައްސަލައެއް ހުށަހަޅާފައިވެއެވެ. އެއީ ނުކުޅެދުންތެރިކަން ހުންނަ މީހުންނަށް އަޅާލުމާއި އެހީތެރިކަން ބޭނުންވެގެން ހުށަހަޅައިފައިވާ 16 މައްސަލައާއި، އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން ހުށަހަޅައިފައިވާ 2 މައްސަލައެވެ.

ކުޑަކުދިންގެ އަޚުލާޤާ ގުޅުން ހުރި 16 މައްސަލައެއް ސެޕްޓެމްބަރު މަހު ހުށަހަޅާފައިވާކަމަށް މިނިސްޓްރީން ބުނެފައިވެއެވެ. މިފަދަ މައްސަލަތަކުގެ ތެރޭގައި ސްކޫލަށް ދާން ބޭނުންނުވުމުގެ 7 މައްސަލަ، އެހެން ކުދިންނަށް ގަނާކުރުމުގެ 4 މައްސަލަ، ގެއިން ނުކުމެގެން ދިއުމުގެ 3 މައްސަލަ އަދި ރުޅި އިސްކުރުން ނުވަތަ ރުޅިގަދަވެގެން އުޅުމުގެ 2 މައްސަލަ ހިމެނެއެވެ.

އަމިއްލަ ނަފުސަށް ގެއްލުންދިނުމާ ގުޅޭ 15 މައްސަލައެއް ހުށަހަޅާފައިވާއިރު، މިފަދަ މައްސަލަތަކުގެ ތެރޭގައި އަމިއްލަ ނަފްސަށް ގެއްލުން ދިނުމުގެ 8 މައްސަލަ، އަމިއްލައަށް މަރުވާން ޚިޔާލު އައުމުގެ 3 މައްސަލަ އަދި އަމިއްލައަށް މަރުވާން މަސައްކަތްކުރުމުގެ 4 މައްސަލަ ހިމެނެއެވެ.

ހައްގުތަކުން ކުޑަކުދިން މަހުރޫމުކުރުމުގެ 6 މައްސަލައެއް ސެޕްޓެމްބަރު މަހު ރިޕޯޓުކޮށްފައިވެއެވެ. އެއީ ކުދިން ސްކޫލަށް ނުފޮނުވުމުގެ 2 މައްސަލަ، އުފަންވުން ރަޖިސްޓްރީ ކުރުމާބެހޭ 2 މައްސަލަ އަދި ސާފުބޯފެނާއި ކަރަންޓުގެ ޚިދުމަތް ކަނޑާލުމުގެ 2 މައްސަލައެވެ.

ގާނޫނާއި ގަވާއިދާ ޚިލާފުވުމުގެ 5 މައްސަލައެއް ސެޕްޓެމްބަރު މަހު ހުށަހަޅާފައިވާއިރު، އެއީ ވައްކަން ކުރުމުގެ 1 މައްސަލަ އަދި އިތުރު 4 މައްސަލައެކެވެ.

މީގެ އިތުރުން ސެޕްޓެމްބަރު މަހު، ދައުލަތުގެ ބެލުމުގެ ދަށުގައި ތިބި 5 ކުދިން ރީއިންޓަގްރޭޓް ކުރެވިފައިވާކަމަށް ޖެންޑަރ މިނިސްޓްރީން ބުނެފައިވެއެވެ. އެގޮތުން 1 ކުއްޖަކު ފޮސްޓަރ ކުރެވި، 1 ކުއްޖަކަށް ވަޒީފާގެ ފުރުސަތު ހޯދައިދެވިފައިވާކަމަށް މިނިސްޓްރީން ބުނެފައިވެއެވެ. ސެޕްޓެމްބަރު މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމުލަ އަދަދަކީ 206 އެވެ.