މިންތީގެ ތަފާތުކުރުންތައް ދެނެގަނެ އެ ތަފާތުކުރުންތައް ނައްތާލުމަށްޓަކައި، ދެ ޖިންސު ވަކިން ތަފާސްހިސާބު ބެލެހެއްޓޭނެ އުސޫލެއް އެކުލަވާލައި ތަންފީޒުކުރަން ފެށުމަށް ރައްޔިތުންގެ މަޖިލީހުގެ ހިޔުމަން ރައިޓްސް އެންޑް ޖެންޑަރ ކޮމިޓީން ހުށަހަޅައިފިއެވެ.

ކޮމިޓީން މިގޮތަށް ހުށަހެޅީ ދިވެހިރާއްޖޭގައި އަންހެނުންނާމެދު ގެންގުޅޭ ތަފާތުކުރުންތަކާއި، އެކަންކަމަށް ހުއްޓުމެއް ގެނައުމަށްޓަކައި ކުރަންޖެހޭ ކަންކަން ދެނެގަތުމާ ގުޅޭ ޕާލިމަންޓަރީ އިންކުއަރީ ރިޕޯޓުގައެވެ. މިއިންކުއަރީ ރިޕޯޓް ހަދާފައިވަނީ ދިވެހިރާއްޖޭގައި އަންހެނުންނާމެދު ކުރާ ތަފާތުކުރުންތަކަށް ހުއްޓުމެއް ގެނައުމަށްޓަކައި ކަމާގުޅޭ ސިޔާސަތުތަކާއި ނިޒާމާއި ގާނޫނުތަކާއި ގަވާއިދުތަކުގައި ހުރި ހުރަސްތަކާއި ތަފާތުކުރުންތައް ދެނެގަތުމަށްޓަކައި ޕާލިމަންޓަރީ އިންކުއަރީއެއް ހެދުމަށް ގޮވާލައި، ގަލޮޅު އުތުރު ދާއިރާގެ މެންބަރު އީވާ އަބްދުﷲ ހުށަހަޅުއްވާފައިވާ ގަރާރުގެ ދަށުންނެވެ. މިއިންކުއަރީއަށް ބޭނުންވާ ދިރާސާ ހަދާފައިވަނީ ދިވެހިރާއްޖޭގެ ގައުމީ ޔުނިވަރސިޓީގެ އެހީތެރިކަމާއެކުއެވެ.

މި ދިރާސާކުރިޔަށް ގެންގޮސްފައިވަނީ އޮންލައިންކޮށް ސަރވޭ ސުވާލުކޮށް ގެންނާއި މަޝްވަރާ ބައްދަލުވުންތައް ބާއްވައިގެންނެވެ. ދިރާސާގެ ސަރވޭގައި މާލެ ސަރަހައްދުގެ އިތުރުން ދިވެހިރާއްޖޭގެ 6 ސަރަހައްދަކުން ޖުމްލަ 619 ދިވެހިން ބައިވެރިވެފައިވެއެވެ. އެގޮތުން، ސަރވޭގެ 78.9 އިންސައްތައަކީ އަންހެނުން ކަމަށްވާއިރު 21.1 އިންސައްތަ ބައިވެރިންނަކީ ފިރިހެނުންނެވެ.

މި ދިރާސާއިން ހާމަވެފައިވާ ގޮތުގައި މިންތީގެ ތަފާތުކުރުންތަކެއް ރާއްޖޭގައި އޮތްކަމަށް މަޝްވަރާގެ ގިނަ ފިރިހެން ބައިވެރިން ނުދެކެއެވެ. އެގޮތުން ދެޖިންސުގެ ދަރިންނަށް ފޯރުކޮށްދޭ ފުރުސަތުތަކުގައި ތަފާތެއް ނެތްކަމާއި، ކިޔެވުމުގެ ފުރުސަތާއި ވަޒީފާގެ ފުރުސަތުތަކުގައިވެސް ފިރިހެނުންނެކޭ އެއްގޮތަށް އަންހެނުންނަށް ފުރުސަތު އޮތްކަމަށް ފިރިހެނުން ދެކެވެ. ހަމައެކަނި ހުރި ތަފާތަކީ ތަބީއީކަމެއްކަމަށް ފިރިހެނުންދެކެއެވެ.

މީގެއިތުރުން މިންތީގެ ތަފާތުކުރުން ނައްތާލުމަށް ރާއްޖޭގައި ހެދިފައި ހުރި ގާނޫނުތަކާއި ގަވާއިދުތަކަށް މީހުން ހޭލުންތެރިކަން ކުޑަކަން ދިރާސާއިން ވަނީ އެނގިފައެވެ. ވަޒީފާއަށްދާ އަންހެނުންނަށް ދިވެހިރާއްޖޭގައި ދިމާވެފައިވާ އެއް ގޮންޖެހުމަކީ ކުޑަކުދިން ބެލެހެއްޓުމުގެ ނިޒާމެއް ނެތުންކަން ދިރާސާއިން ވަނީ އެނގިފައެވެ.

ދިރާސާގައި ފާހަގަކުރެވުނު ކަންކަމަށް ބަލާ ޕާލަމަންޓްރީ އިންކުއަރީގައި ވަނީ 28 ހުށަހަޅެމެއް ހުށަހަޅާފައެވެ. އޭގެތެރޭގައި ނިޒާމީ އޮނިގަނޑުގެ ތެރެއިން މިންތީގެ ހަމަހަމަކަމަށް ވާސިލުވުމަށާއި، އަންހެނުންގެ ހާލަތާއި ޢިޖުތިމާއީ ކުރިއެރުން ހޯދުމަށް ދައުލަތުގެ އިދާރާތައް ޖެންޑަރ މެއިންސްޓްރީމްކޮށްގެން ހިންގުމަށް ބޭނުންވާ ބަޖެޓާއި، އިންސާނީ ވަސީލަތްތައް އެކަށީގެންވާ މިންވަރަކަށް ފޯރުކޮށްދިނުމަށް ވަނީ ހުށަހަޅާފައެވެ. ކުޑައިރުން ފެށިގެން އަންހެން ކުދިންނާ ފިރިހެން ކުދިންނާމެދު އާއިލާ ތެރޭގައި ގެންގުޅޭ މިންތީގެ ތަފާތުކުރުންތައް ނައްތާލުމަށް ބެލެނިވެރިން އިތުރަށް ހޭލުންތެރިކުރުވުމަށްވެސް ހުށަހަޅާފައިވެއެވެ.

މީގެއިތުރުން ވިހެއުމަށްފަހުވެސް އަންހެނުން މާލީގޮތުން ބާރުވެރިކުރުމަށްޓަކައި ވަޒީފާތަކަށް ދިއުމަށާއި އާމްދަނީ ލިބޭނެ މަސައްކަތްތައް ކުރުމަށް މަގުފަހިކުރުމުގޮތުން ކުދިން ބަލަހައްޓާނެ ޑޭ-ކެއަރ މަރުކަޒުތައް ގާއިމުކުރުމަށް ސަރުކާރުން ކުރަމުންދާ މަސައްކަތް އަވަސްކުރުމަށްވެސް ވަނީ ހުށަހަޅާފައެވެ. މިންތީގެ ހަމަހަމަކަމަށް ކުދިން އަހުލުވެރިކުރުމަށް ތައުލީމީ މަންޙަޖުގައި ހިމަނައިގެން ސްކޫލްތަކުގައި ޕްރޮގްރާމްތައް ހިންގުމަށް ހުށަހަޅާފައިވާއިރު ސިޔާސަތު ކަނޑައެޅުމުގައާއި ގާނޫނުތައް ތަންފީޒުކުރުމުގައި އަންހެނުންގެ ބައިވެރިވުން އިތުރުކުރުމުގެ ގޮތުން ގާނޫނުތައް ތަންފީޒުކުރުމަށް ގާއިމުކޮށްފައިވާ މިނިވަން މުއައްސަސާތަކުގެ މެންބަރުކަމުގެ މަގާމުތަކުގެ ތެރެއިން ވަކި މިންވަރެއް އަންހެނުންނަށް ޚާއްސަކުރުމަށްޓަކައި ގާނޫނުތަކަށް ބޭނުންވާ އިސްލާހުތައް ގެނައުމަށްވެސް ވަނީ ހުށަހަޅާފައެވެ.

އަންހެނުންގެ ހައްގުތަކާމެދު މުޖްތަމައުގައި ގެންގުޅޭ ނޭދެވޭ ވިސްނުންތަކާއި ދީނުގައި އޮންނަގޮތް ކަމުގައިބުނެ އަންހެނުންނާމެދު ގެންގުޅޭ ތަފާތުކުރުންތަކާއި ނިކަމެތިކުރުން ނައްތާލުމަށް ގައުމީ ފެންވަރުގައި ހޭލުންތެރިކުރުމުގެ ޕްރޮގްރާމްތައް ކުރިއަށްގެންދިއުމަށްވެސް ހުށަހަޅާފައިވެއެވެ.

ޓޫރިޒަމް ދާއިރާގައި މަސައްކަތްކުރާ އަންހެނުންގެ ނިސްބަތް އިތުރުކުރުމަށާއި ޕްރައިވެޓް ސެކްޓަރގައި އަންހެނުންނާ ރައްޓެހި ވަޒީފާގެ ސިޔާސަތުތައް ގާއިމުކޮށް ތަންފީޒުކުރުމުގެ ނިޒާމެއް އެކުލަވާލުމަށްވެސް ހުށަހަޅާފައިވެއެވެ. އަންހެނުންނަށް ބޭނުންވާ ކައުންސެލިންނާއި އެނޫނުންވެސް ނަފްސާނީ ދުޅަހެޔޮކަމަށް ބޭނުންވާ އެހީތެރިކަން ފަސޭހައިން ލިބޭނެ އިންތިޒާމްތަކެއް ދިވެހިރާއްޖޭގެ ހުރިހާ ރަށެއްގައިވެސް ގާއިމުކުރުމުގެ މަސައްކަތް އަވަސްކުރުމަށް ވަނީ ހުށަހަޅާފައެވެ.

ދިވެހިރާއްޖޭގައި ބައެއް އަންހެނުންނަކީ އާމްދަނީ ހޯދުމަށް އާންމު ގޮތެއްގައި ގޭތެރޭގައި (ނުރަސްމީ) މަސައްކަތްކުރާ ފަރާތްތަކެއްކަމަށް ވުމާއެކު، އެފަރާތްތަކަށް ރަސްމީ ނިޒާމްގެ ތެރެއިން އެހެނިހެން ފަރާތްތަކަށްވެސް ލިބޭ ލުއިތަކާއި، އަދި ރައްކާތެރިކަން ފޯރުކޮށްދެވޭނެ ރަސްމީ ނިޒާމެއް ގާއިމުކުރުމަށްވެސް ހުށަހަޅާފައިވެއެވެ.

އާއިލާ ރޫޅިގެންދާ ހާލަތުގައި ކުދިންގެ ކަންކަން ހަމަޖެއްސުމާއި ކުދިންނަށް ބޭނުންވާ ޚަރަދާއި އަދި އެނޫންވެސް އަންހެނުންނަށް ކުރިމަތިވާ ގޮންޖެހުންތަކަށް ދެމެހެއްޓެނިވި ގޮތެއްގައި ހައްލެއް ގެނައުމަށްޓަކައި އާއިލާއާބެހޭ ގާނޫނު އިސްލާހުކުރުމަށްވެސް ހުށަހަޅާފައިވެއެވެ.

އަދި ޖިނާޢީ އަދުލުގެ ނިޒާމުގައި ހިމެނޭ އަންހެނުންގެ ހާލަތު ދެނެގަތުމަށް ދިރާސާއެއްކުރުމަށްވެސް ހުށަހަޅާފައިވެއެވެ.

މިރިޕޯޓަށް މެމްބަރުން ބަހުސްކޮށްފައިވާއިރު ދެން އޮންނާނީ ރިޕޯޓް ފާސްކުރުމަށް ވޯޓަށް އެހުމެވެ.