މި ސަރުކާރުން އިސްކޮޅު ނުޖެހޭ ފަޅުތަކުގައިވެސް ތަރައްގީގެ މަޝްރޫއު ހިންގާ – ނާއިބުރައީސް

ރައީސް އިބްރާހިމް މުހައްމަދު ސާލިހުގެ ސަރުކާރުން، ތަރައްގީގެ މަޝްރޫއުތައް ހިންގަނީ ހަމައެކަނި ހިކިފަސްތާގައި ނޫން ކަމަށާއި، އިސްކޮޅު ނުޖެހޭ ފަޅުތަކުގައި ވެސް މި ސަރުކާރުން ތަރައްގީގެ މަޝްރޫއު ހިންގަމުންދާ ކަމަށް ނާއިބްރައީސް ފައިސަލް ނަސީމް ވިދާޅުވެއްޖެއެވެ.

ނާއިބްރައީސް ފައިސަލް ނަސީމް މިހެން ވިދާޅުވީ ހއ. ހޯރަފުށީގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު އިފްތިތާހުކޮށްދެއްވާ ވާހަކަފުޅުދައްކަވަމުންނެވެ. ނާއިބްރައީސް ފައިސަލް ވިދާޅުވީ މި ސަރުކާރުން ޕްރޮޖެކްޓްތައް ހިންގަނީ ހަމައެކަނި ހިކިފަސްތާކު ނޫން ކަމަށެވެ. މި ސަރުކާރުން އިސްކޮޅު ނުޖެހޭ ފަޅުތަކުގައި ވެސް ރާއްޖޭގެ އުތުރުން ދެކުނަށް ބޮޑެތި މަޝްރޫއުތައް ހިނގާ މަންޒަރު މިއަދު ފެނަނަމުންދާ ކަމަށެވެ. ނާއިބުރައީސް މިހެން ވިދާޅުވީ ހޯރަފުށީ އެއަރޕޯޓް މިސާލެއްގެ ގޮތުގައި ނަންގަވައިގެންނެވެ.

ނާއިބްރައީސް ވިފާޅުވީ މިއަދު ދިވެހި ރައްޔިތުން ބަލަންވީ ކަމަކީ ޒަމާނުއްސުރެން ފެށިގެން އަޅުގަނޑުމެން ދުށް އެއްކަމެއްގެ ގޮތުގައި އޮތީ ކުދި އާބާދީތައް ކުދި ރަށްތައް ތަންކޮޅެއް އެއްފަރާތަށް ޖައްސާލުން ކަމަށެވެ. ނަމަވެސް މިއަދުގެ ރައީސް އަޅުގަނޑުމެންނަށް ފާހަގަކުރެވޭ ކަމަކީ ތަފާތު ކުރުމެއް ނެތި، ކުދި އާބާދީ ވިޔަސް ބޮޑެތި އާބާދީތައް ވިޔަސް މި ދެންނެވި ގޮތަށް އެންމެ ބޭނުންވާ ކަންތައްތަކަށް އިސްކަން ދެއްވައިގެން މަސައްކަތް ކުރެއްވުން ކަމަށެވެ.

ނާއިބްރައީސް ވިދާޅުވީ މިއަދު އެވާހަކަ ދިގުކޮށް ދައްކާކަށް ނުޖެހޭ ކަމަށެވެ. ތަރައްގީގެ މަޝްރޫއުތައް ގިނަ ކަމަށާއި، ތަރައްގީގެ މަޝްރޫއުތަކުގެ އަދަދު ގިނަކަމުން ހަނދާންކުރަން އުނދަގޫފުޅުކަމަށް ވިދާޅުވިއެވެ. އެމްޓީސީސީއަށް އެކަނި ބެލިނަމަވެސް ނިންމި ޕްރޮޖެކްޓްގެ އަދަދު 50ށް އަރާ ކަމަށާއި، ހިނގަމުންދާ ޕްރޮޖެކްޓްގެ އަދަދު 60ށް އަރާ ކަމަށް ނާއިބްރައީސް ވިފާޅުވިއެވެ. އަދި ކުރަން ހުރި ކަންކަން އެޔަށްވުރެ ގިނަވާނެ ކަމަށާއި، ތަރައްގީއަކީ މަޝްރޫއުތަކަކީ ހެޔޮކަންތައްތަކަކީ ދުވަހަކުވެސް ނިމުމެއް އަންނަކަމެއް ނޫން ކަމަށް ވިދާޅުވިއެވެ.