މޭ6ގެ ހަމަލައާ ގުޅިގެން ރައީސް ނަޝީދު ދެއްވާ ބަޔާނުގެ ޑްރާފްޓް ފުލުހުންނަށް

މޭ6ގެ ހަމަލައާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވާ ބަޔާނުގެ ޑްރާފްޓް ފުލުހުންނަށް ފޮނުވައިފިއެވެ.

މޭ6ގެ ހަމަލާގެ ތަހުގީގަށާއި ޝަރީއަތަށް ރައީސް ނަޝީދުގެ ބަޔާނެ މުހިއްމު ކަމަށް ފުލުހުންނާއި ޕީޖީންވެސް ބުނުމުން އެ މަނިކުފާނުގެ ފަރާތުން ވަކީލެއްގެ ގޮތުގައި ހަމަޖެއްސެވީ، އެމަނިކުފާނުގެ ކޮއްކޯފުޅު ނާޒިމް އަބްދުއްސައްތާރެވެ. ނާޒިމް ވިދާޅުވީ، ރައީސް ނަޝީދު މާލެ ވަޑައިގެން ރަސްމީ ގޮތުން ބަޔާން ދެއްވާނެ ކަމަށާއި، ބަޔާނުގެ ޑްރާފްޓެއް މިހާރު ފުލުހުންނާއި ހިއްސާ ކޮށްފައިވާނެ ކަމަށެވެ.

Advertisement

ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލައާ ގުޅިގެން 10 މީހަކު ހައްޔަރުކޮށްފައިވާއިރު، އެ މީހުންގެ ޝަރީއަތް މިހާރު ކްރިމިނަލް ކޯޓުގައިވަނީ ފަށާފައެވެ. އަނިޔާތަކަށް ފަރުވާ ހޯއްދެވުމަށް ރާއްޖެއިން ބޭރުގައި ހުންނެވުމަށްފަހު އެމަނިކުފާނު މާލެ ވަޑައިގެންނެވީ، އޮކްޓޫބަރު މަހުގެ 11ވަނަ ދުވަހުއެވެ. ވަޑައިގެން މަޖިލީހުގެ ރިޔާސަތުވެސް ބެލެހެއްޓެވިއެވެ. އެއަށްފަހު އަނެއްކާވެސް ރާއްޖެއިން ބޭރަށް ވަޑައިގެންނެވީ، ކޮޕް26ގައި ބައިވެރިވެވަޑައިގަތުމަށެވެ. އެނބުރި އަނެއްކާ ރާއްޖެ ވަޑައިގަންނަވާނެ ދުވަހެއް އަދި ހާމަކޮށްފައެއް ނުވެއެވެ.

ފުލުހުން މައުލޫމާތު ދީފައިވާ ގޮތުގައި މި ހަމަލާ ދިނުމުގައި އިސްކޮށް އުޅުނީ އިސްހާގުގެ އިތުރުން، ނ. މަނަދޫ ނޫރީގެ އަލީ ހައިޝަމާއި ހއ. ހޯރަފުށީ އަލަނާސިގޭ މުހައްމަދު ތަސްލީމެވެ.

ފުލުހުން ބުނެފައިވަނީ މި ހަމަލާދިނުމަށް 3 ފަހަރު މަތިން މަސައްކަތް ކޮށްފައިވާކަން ތަހުގީގަށް ހޯދުނު ހޯދުންތަކުން އެނގިފައިވާ ކަމަށެވެ. އެގޮތުން އަމިއްލައަށް މަރުވެގެން ހަމަލާދިނުމަށް މަސައްކަތް ކުރި ކަމަށް ނޫސްވެރިންގެ ބައްދަލުވުމުގައި ފާހަގަކޮށްފައިވެއެވެ. އެންމެ ފުރަތަމަ ހަމަލާދިނުމަށް ރާވާފައިވަނީ ޔާގޫތުގެ ހުންނަ ސަރަހައްދުގައެވެ.

ދެވަނަ ފަހަރަށް ހަމަލާ ދިނުމަށް ރޭވީ ރައީސް ނަޝީދު ކަސްރަތަށް ނުކުންނަވާއިރު، މެރީ ބްރައުން ރެސްޓޯރަންޓު ސަރަޙައްދުގައެވެ. ނަމަވެސް އެކަމުގައި ދަތިތަކެއް ހުރުމުން 3 ވަނަ ފަހަރަށް ހަމަލާ ރޭވީކަން އޭސީޕީ މުހައްމަދު ރިޔާޒު ފާހަގަ ކުރެއްވިއެވެ. ރިޔާޒް ވިދާޅުވީ، ހަމަލާ ދިނުމަށް ބޭނުންކުރި ސައިކަލަކީ 2019 ވަނަ އަހަރު ގަނެފައިވާ ސައިކަލެއް ކަމަށެވެ.