ޕީއެސްއައިޕީއާއި މިނިވަން މުއައްސަސާތަކަށް 73 މިލިއަން ރުފިޔާ އިތުރުކޮށް، އަންނަ އަހަރަށް ލަފާކުރާ ދައުލަތުގެ ބަޖެޓް، ބަޖެޓް ކޮމިޓީން ފާސްކޮށްފި

އަންނަ އަހަރަށް ލަފާކޮށް ފިނޭންސް މިނިސްޓަރ އިބްރާހީމް އަމީރު ރައްޔިތުންގެ މަޖިލީހަށް ހުށަހެޅުއްވި 36.9 ބިލިއަން ރުފިޔާގެ ބަޖެޓަށް 73 މިލިއަން ރުފިޔާ އިތުރުކުރުމަށްފަހު, ބަޖެޓް ދިރާސާކުރި ބަޖެޓް ކޮމިޓީން އަންނަ އަހަރަށް ލަފާކުރާ ދައުލަތުގެ ބަޖެޓް ފާސްކޮށްފިއެވެ.

އަންނަ އަހަރަށް ލަފާކޮށް ފިނޭންސް މިނިސްޓަރ މަޖިލީހަށް ހުށަހެޅުއްވީ 36,925,424,524 (ތިރީސް ހަ ބިލިއަން، ނުވަ ސަތޭކަ ފަންސަވީސް މިލިއަން، ހަތަރު ސަތޭކަ ސައުވީސް ހާސް، ފަސް ސަތޭކަ ސައުވީސް) ރުފިޔާގެ ބަޖެޓެކެވެ. މިބަޖެޓް, ބަޖެޓް ދިރާސާކުރި ކޮމިޓީން ދިރާސާކުރުމަށްފަހު, ބުރާސްފަތި ދުވަހުގެ ރޭ ފާސްކޮށްފައިވަނީ ޕީއެސްއައިޕީ މަޝްރޫއުތަކަށް 82 ރަށަކަށް 57.42 މިލިއަން އިތުރުކުރުމަށާއި، މިނިވަން މުއައްސަސާތަކާއި އޮފީސްތަކުގެ ބަޖެޓަށް 16 މިލިއަން ރުފިޔާއާއެކު ޖުމްލަ 73،856،026 މިލިއަން ރުފިޔާ އިތުރުކުރުމަށެވެ. މިއާއެކު އަންނަ އަހަރަށް ލަފާކުރާ ދައުލަތުގެ ބަޖެޓްގެ މިހާރުގެ ޖުމްލައަކީ 36،999،280،550 (ތިރީސްހަ ބިލިއަން ނުވަ ސަތޭކަ ނުވަދިހަ ނުވަ މިލިއަން، ދުއިސައްތަ އަށްޑިހަ ހާސް، ފަސް ސަތޭކަ ފަންސާސް) ރުފިޔާއެވެ.

Advertisement

ޕީއެސްއައިޕީ ބަޖެޓު އިތުރުކުރުމަށް ހުށަހެޅުއްވީ މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފެވެ. ޝަރީފްގެ މި ހުށަހެޅުމަށް ތާއީދުކުރެއްވީ ހަނިމާދޫ ދާއިރާގެ އެމްޑީޕީ މެމްބަރު ޢަބްދުލްޣަފޫރު މޫސާއެވެ.

ޝަރީފް ހުށަހެޅުއްވި ހުށަހެޅުމުގައި ވަނީ، ރައްޔިތުންގެ މަޖިލީހުގެ ގިނަ މެމްބަރުން ތަޅުމުގައި ފާޅުކުރެއްވި ޚިޔާލުފުޅުތަކާއި އަދި މެމްބަރުން އެދިވަޑައިގެންނެވި ކަންކަމާއި ރާއްޖޭގެ ތަރައްގީއަށް އެންމެ އިސްކަންދޭ ތަރުތީބުކަމަށް މެމްބަރުންނަށް ފެނިވަޑައިގެންނެވި ކަންކަމަށް ރިޔާއަތްކޮށް، 82 ރަށަކަށް 57،422،608 މިލިއަން ރުފިޔާ އިތުރުކުރުމަށެވެ.

މިނިވަން މުއައްސަސާތަކާއި އޮފީސް ހިންގުމުގެ ބަޖެޓް އިތުރުކުރުމަށް ހުށަހެޅުއްވީ ތިނަދޫ އުތުރު ދާއިރާގެ އެމްޑީޕީ މެމްބަރު ޢަބްދުލް މުޣުނީއެވެ. މުޣުނީގެ ހުށަހެޅުމަށް ތާއީދުކުރެއްވީ ދުވާފަރު ދާއިރާގެ އެމްޑީޕީ މެމްބަރ އިސްމާޢީލް އަޙުމަދެވެ.

މިނިވަން މުއައްސަސާތަކާއި އޮފީސްތަކުގެ ބަޖެޓަށް އިތުރުކުރުމަށް ހުށަހަޅާފައިވާ ގޮތަކީ:

މިއާއެކު މިނިވަން މުއައްސަސާތަކާއި އޮފީސްތަކުގެ ބަޖެޓަށް އިތުރުވެގެންދަނީ 16،433،418 (ސޯޅަ މިލިއަން ހަތަރު ލައްކަ ތިރީސްތިން ރުފިޔާ ހަތަރު ސަތޭކަ އަށާރަ ރުފިޔާ )އެވެ.

ބަޖެޓް ކޮމިޓީން ވަނީ 2022 ވަނަ އަހަރު ޖުމުލަ އާމްދަނީއާއި، ހިލޭ އެހީގެ ގޮތުގައި ދައުލަތަށް ލިބޭނެކަމަށް އަންދާޒާކުރެވޭކަމަށް ފިނޭންސް މިނިސްޓަރ ހުށަހެޅުއްވި 24.3 މިލިއަން ރުފިޔާ އާއި، އާމްދަނީ އިތުރުކުރުމަށް ހުށަހަޅާ އައު ކަންތައްތަކުން 727 މިލިއަން ރުފިޔާ އާމްދަނީގެ ގޮތުގައި ލިބޭނެކަމަށް ފާސްކޮށްފައެވެ.

މީގެއިތުރުން ބަޖެޓް ރިކޮމެންޑޭޝަންގެ ގޮތުގައި 10 ރިކޮމެންޑޭޝަނެއް ކޮމިޓީން ވަނީ ހުށަހަޅާފައެވެ. މި 10 ރިކޮމެންޑޭޝަންވެސް ވަނީ ކޮމިޓީން ފާސްކޮށްފައެވެ.

މީގެއިތުރުން ބަޖެޓް ކޮމިޓީން 2021 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވަނީ 34،922،716،599 (ތިރީސް ހަތަރު ބިލިއަން ނުވަސަތޭކަ ބާވީސް މިލިއަން ހަތް ސަތޭކަ ސޯޅާ ހާސް، ފަސް ސަތޭކަ ނުވަދިހަ ނުވަ) ރުފިޔާ ނަމަވެސް، އަހަރު ނިމޭއިރު ހުންނާނެކަމަށް ބެލެވެނީ 37،167،687،519 (ތިރީސް ހަތް ބިލިއަން، އެއް ސަތޭކަ ފަސްފޮޅަސް ހަތް މިލިއަން، ހަ ސަތޭކަ އަށްޑިހަ ހަތް ހާސް، ފަސް ސަތޭކަ ނަވާރަ) ރުފިޔާ ކަމަށްވާތީ ރިވައިސްކުރި ބަޖެޓްގައި 2021 ވަނަ އަހަރުގެ ބަޖެޓަށް އިތުރުކުރުމަށް ފިނޭންސް މިނިސްޓްރީން ފޮނުވާފައިވާ ޖުމްލަ 2،244،970،920 (ދެ ބިލިއަން، ދުއިސައްތަ ސާޅީސް ހަތަރު މިލިއަން ނުވަސަތޭކަ ހަތްދިހަ ހާސް ނުވަ ސަތޭކަ ވިހި) ރުފިޔާގެ ބަޖެޓްވެސް ބަޖެޓް ކޮމިޓީގެ އިއްތިފާގުން ވަނީ ފާސްކޮށްފައެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް، ބަޖެޓް ކޮމިޓީން ފާސްކޮށްފައިވާއިރު، ދެން އޮންނާނީ ބަޖެޓްގެ ކޮމިޓީ ރިޕޯޓް ތަޅުމަށް ފޮނުވައި ބަޖެޓް ރިޕޯޓަށް މެމްބަރުން ބަހުސްކުރެއްވުމެވެ. އަންނަ ހަފްތާގައި ބަޖެޓް ކޮމިޓީ ރިޕޯޓަށް މެމްބަރުން ބަހުސްކުރެއްވުމަށް ހަމަޖެހިފައިވާއިރު، ކޮންމެ މެމްބަރަކަށްވެސް 7 މިނެޓްގެ ފުރުސަތެއް ލިބިވަޑައިގަންނަވާނެއެވެ. އެއަށްފަހު އޮންނާނީ ބަޖެޓް ފާސްކުރުމެވެ.