ބަޖެޓަށް މެމްބަރުން ވޯޓު ދެއްވީ ކިހިނެއް؟

ދައުލަތެއް އަމާން ކަމާއެކު ހިންގައި، އެ ދައުލަތަކުން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ފޯރުކޮށްދިނުމަށްޓަކައި، ކަނޑައަޅާ ބަޖެޓަކީ، މުހިއްމު އެއްޗެކެވެ. އެއިރެއްގައި ކުރުމަށް ރާވާފައިވާ ކަންކަމާއި، ކުރަމުން އަންނަ ކަންކަމުގެ ތަފްސީލް ބަޖެޓްގައި ހިމެނެއެވެ. އެއިރެއްގެ އޮންނަ ހާލަތަށް ރިއާޔަތް ކުރުމަށްފަހު، ފިނޭންސް މިނިސްޓްރީން ބަޖެޓް ހުށަހަޅަނީ މަޖިލީހަށެވެ. އެ ބަޖެޓް ދިރާސާކޮށް ބަދަލު ގެންނަން ފެނިއްޖެ ހާލަތެއްގައި ބަދަލު ގެނެސް ފާސް ކުރުމުގެ ބާރު އޮންނަނީ ރައްޔިތުންގެ މަޖިލީހަށެވެ.

އަންނަ އަހަރަށް ލަފާކޮށް ދައުލަތުން މަޖިލީހަށް ހުށަހެޅީ، 36.92 ބިލިއަން ރުފިޔާގެ ބަޖެޓެކެވެ. ބަޖެޓް ދިރާސާކުރާ ކޮމިޓީން ކުރި ދިރާސާތަކަށްފަހު ބަޖެޓްގެ ޖުމްލަ އަދަދު ވަނީ އިތުރު ކޮށްފައެވެ. ޖުމްލަ އަދަދު އިތުރު ކުރުމަށް ނިންމީ މިނިވަން މުއައްސަސާތަކުގެ މަސައްކަތްތައް އަވަސް ކުރުމަށް އިތުރު ބަޖެޓް ބޭނުންވާ ކަމަށް އެ މުއައްސަސާތަކުން ބުނުުމުންނެވެ. އެގޮތުން އެންމެފަހުން ބަޖެޓްގެ ޖުމްލަ އަދަދު ވަނީ 36.99 ބިލިއަނަށް އަރާފައެވެ.

ބަޖެޓް ދިރާސާކޮށް ނިންމި ގޮތުގެ ރިޕޯޓް ތަޅުމަށް ހުށަހެޅީ މި ހަފުތާގެ އާދީއްތަ ދުވަހުއެވެ. އެއާއެކު ކޮންމެ މެމްބަރަކަށްވެސް 7 މިނެޓްގެ ފުރުސަތެއް ދެވިގެން ދިޔައެވެ. މި ލިބުނު ފުރުސަތުގައި 43 މެމްބަރުން ވާހަކަފުޅުދެއްކެވިއެވެ. ޖުމްލަ 5 ގަޑިއިރާއި 25 މިނެޓް މިކަމަށް މަޖިލީހުގެ ތަޅުމުގައި މެމްބަރުން ހޭދަ ކުރެއްވިއެވެ.

ބަހުސް މަރުހަލާގައި، އެމްޑީޕީ މެމްބަރުން ބަޖެޓަށް ތާއީދުކޮށް ވާހަކަފުޅު ދެއްކެވިއިރު، އިދިކޮޅު މެމްބަރުން ވާހަކަދެއްކެވީ، ބަޖެޓާ މުޅިން ދެކޮޅަށެވެ. އެގޮތުން ދަރަނި ބޮޑު ވާހަކައަކީ އިދިކޮޅުން އެންމެ ގިނައިން ދެއްކެވި ވާހަކައެވެ. މި ވާހަކައަށް ރައްދު ދެއްވައި، ސަރުކާރަށް ތާއީދު ކުރައްވާ އެމްޑީޕީ މެމްބަރުން ވިދާޅުވީ، ދަރަނި ނަގާނީ ދަރަނި ދެއްކޭނެ ބައެއް ކަމަށެވެ. މި ސަރުކާރުގައި ދަރަނި އަދާކުރުމުގެ ގާބިލްކަން އެބަހުރިކަމަށާއި، ބަޖެޓްގައި އެކަން ތަފްސީލް ކޮށްދީފައިވާ ކަމަށެވެ. އަންނަ އަހަރަކީ ރާއްޖޭގެ ފަތުރުވެރިކަން ރަނގަޅުވެ އިގްތިސާދު ކުރިއަރާނެ އަހަރެއް ކަމަށް ލަފާކޮށްފައެވެ. އެކަމުން ދައުލަތަށް މަންފާ ލިބޭނެކަން ފިނޭންސް މިނިސްޓަރ ވަނީ ފާހަގަ ކުރައްވާފައެވެ.

ބަޖެޓް ދިރާސާކޮށް ނިންމުމަށްފަހު އެކުލަވާލި ކޮމިޓީ ރިޕޯޓަށް މެމްބަރުން ވާހަކަދެއްކެވުމަށްފަހު ވޯޓަށް އެހީ ބުދަ ދުވަހުގެ ޖަލްސާގައެެވެ. ވޯޓަށް އެހުމަށް ތައްޔާރުވަމުން ދިޔައިރު، ތަޅުމުގައި ނައިފަރު ދާއިރާގެ މެމްބަރު ގެންދެވީ މިއީ ގައުމު ބަނގުރޫޓްކުރާ ބަޖެޓެއް ކަމަށް ވިދާޅުވެ އަޑުގަދަ ކުރައްވަމުންނެވެ. ބަޖެޓަށް ވޯޓް ދެއްވުމަށް އެމްޑީޕީގެ ޕީޖީން ވަނީ ވިޕް ލައިނެއް ނެރެފައެވެ. އަދި މެމްބަރުން ތަޅުމަށް ހާޒިރުވެ ވޯޓުގައި ބައިވެރިވެވަޑައިގަތުމަށްވެސް އެދިފައެވެ. ބަޖެޓް ފާސް ކުރުމަށް 64 މެމްބަރުން ވޯޓު ދެއްވިއިރު، އިދިކޮޅަށް ވޯޓު ދެއްވީ 8 މެމްބަރުންނެވެ. ވޯޓުގައި ބައިވެރިވެ ވަޑައިގެންނެވީ، 72 މެމްބަރުންނެވެ.

ބަޖެޓް ފާސް ނުކުރުމަށް ވޯޓު ދެއްވި 8 މެމްބަރުންނަކީ، ޕީޕީއެމް ޕީއެންސީގެ މެމްބަރުންނެވެ. އެ މެމްބަރުންނަކީ، ނައިފަރު ދާއިރާގެ މެމްބަރު އަހުމަދު ޝިޔާމް، ގުރައިދޫ ދާއިރާގެ މެމްބަރު އިބްރާހިމް ރިޒާ، މަޑުއްވަރީ ދާއިރާގެ މެމްބަރު އާދަމް ޝަރީފް، މަހިބަދޫ ދާއިރާގެ މެމްބަރު އަހުމަދު ތާރިގް، ފެލިދޫ ދާއިރާގެ މެމްބަރު އިބްރާހިމް ފަޒުލް ރަޝީދު، ތ.ގުރައިދޫ ދާއިރާގެ މެމްބަރު ޣައްސާން މައުމޫން، އޭދަފުށި ދާއިރާގެ މެމްބަރު އަހުމަދު ސަލީމް އަދި މާވަށު ދައިރާގެ މެމްބަރު މުހައްދު ސައީދެވެ.

މި މެމްބަރުންނަކީ ގައުމުގެ ތަރައްގީއާއި ރައްޔިތުންގެ ލާބައަށް ކަމަށް ވިދާޅުވެ އެކުލަވަރު ދައްކަވައިގެން އެދި އެންމެ ގިނައިން މަޖިލީހުގައި ވަކާލާތު ކުރައްވާ ބޭފުޅުންނެވެ. އެހެންނަމަވެސް ބޮޑު އާލަމީ ވަބާއެއްގެ ތެރޭގައި ގައުމު އާރާސްތުކުރުމަށް ކުރާ ކަންކަމުގައި ބަހާ އަމަލާ ދިމާވާތަން ނުފެނެއެވެ. މި ހާލަތުން ގައުމު ނަގައި ކޮޅަށް ޖެހުމަށް ކުރެވޭ ގައުމީ މަސައްކަތަށް އެއްބާރުލުން ދިނުމުގެ ވިސްނުންފުޅެއް އަމްދުން ނުގެންގުޅުއްވައެވެ.