ކަނޑައަޅާ ބަޖެޓުން ކަންކަން ކުރިއަށްގެންދިއުމުގެ މާލީ މިނިވަންކަން ނުލިބޭކަމުގެ ކަންބޮޑުވުން އިލެކްޝަންސް ކޮމިޝަނުން ފާޅުކޮށްފިއެވެ.

އާދީއްތަ ދުވަހު ކުރިއަށްދިޔަ، ބަޖެޓު ދިރާސާކުރާ ކޮމިޓީގެ ބައްދަލުވުމަށް ހާޒިރުވެވަޑައިގެން އިލެކްޝަންސް ކޮމިޝަންގެ ސެކެޓްރީ ޖެނެރަލް ޙަސަން ޒަކަރިއްޔާ ވިދާޅުވީ، މަޖިލީހުން ބަޖެޓު ފާސްކޮށް ނިންމައި، ފިނޭންސް މިނިސްޓްރީން ކޮމިޝަނަށް ދޫކުރާ ބަޖެޓުން ކަންކަން ކުރުމުގެ މާލީ މިނިވަންކަން އެ ކޮމިޝަނަށް ނުލިބޭ ކަމަށެވެ.

ބައެއް ކަންކަން ކުރުމުގެ ހުއްދަ ހޯދުމަށް ފިނޭންސް މިނިސްޓްރީއަށް ސިޓީ ފޮނުވައި، އެކަންކަމުގެ ޖަވާބު ނުލިބޭތީ ކޮމިޝަންގެ ގާނޫނީ ބައެއް ޒިންމާތައް އަދާނުކުރެވި އެކަންކަން ފަސްވަމުންދާކަމަށް އޭނާ ވިދާޅުވިއެވެ.

އެހެންކަމުން މަޖިލީހުގެ ތަޅުމުން ބަޖެޓު ފާސްވެގެން ދިއުމާއެކު، މާލިއްޔަތު ގަވައިދާއި ގާނޫނާ އެއްގޮތްވާގޮތުގެ މަތިން ބަޖެޓުން ޚަރަދު ކުރުމުގެ އިޚްތިޔާރު އިލެކްޝަންސް ކޮމިޝަނަށް ލިބެންޖެހޭނެ ކަމަށް ގަބޫލުކުރައްވާކަމަށް ޒަކަރިއްޔާ ވިދާޅުވިއެވެ. މިކަމުގެ ތެރެއަށް ފިނޭންސް މިނިސްޓްރީގެ ނުފޫޒެއް ވަންނަނަމަ އެ ކޮމިޝަނުގެ މުސްތަޤިއްލުކަމާމެދު ސުވާލު އުފައްދާނެ ހާލަތަށް ހިނގައިދާނެތީ އެކަމުގެ ކަންބޮޑުވުން އެބައޮތް ކަމަށް ޒަކަރިއްޔާ ވިދާޅުވިއެވެ.

މީގެ އިތުރުން ޒަކަރިއްޔާ ވަނީ އިލެކްޝަންސް ކޮމިޝަންގެ މުވައްޒަފުންނަށް ފާއިތުވި 8 އަހަރުގެ ތެރޭގައި އެއްވެސް ވަރަކަށް މުސާރައިގެ ކުރިއެރުމެއް ނާންނަކަން ފާހަގަކުރައްވާފައެވެ. މުސާރައިގެ ކުރިއެރުން ނުލިބި ގިނަ ދުވަސްތަކެއް ވުމުން ކޮމިޝަންގައި ގިނަ ދުވަހު މަސައްކަތްކޮށްފައިވާ މުވައްޒަފުން، ބޮޑު މުސާރަ ދޭ އެހެނިހެން ދުސްތޫރީ ކޮމިޝަންތަކަށް ދާކަމަށް ޒަކަރިއްޔާ ވިދާޅުވިއެވެ.

ޒަކަރިއްޔާ ވިދާޅުވީ މިއީ އެ ކޮމިޝަނަށް ހުރި ވަރަށް ބޮޑު ގޮންޖެހުމެއް ކަމަށެވެ. އެހެންކަމުން މަޖިލިސް މެދުވެރިކޮށް އިލެކްޝަންސް ކޮމިޝަންގެ މުވައްޒަފުންނަށް މުސާރައިގެ ކުރިއެރުން ލިބޭނެ ގޮތެއް ހަމަޖައްސައިދެއްވުމަށް އޭނާ ވަނީ ކޮމިޓީ ބައްދަލުވުމުގައި އެދިވަޑައިގެންފައެވެ.