އަންނަ އަހަރަށް ލަފާކުރި 36.9 ބިލިއަން ރުފިޔާގެ ބަޖެޓް މަޖިލީހުން ފާސް ކޮށްފިއެވެ.

ބަޖެޓް ދިރާސާކުރާ ކޮމިޓީން ދިރާސާކޮށް ނިންމި ގޮތަށް ބަޖެޓް ފާސްކުރީ 64 މެމްބަރުންގެ ވޯޓުންނެވެ. ފާސްކުރުމަށް ނުފެންނަ ކަމަށް ވޯޓު ދެއްވީ 8 މެމްބަރުންނެވެ.

ބަޖެޓަށް ވޯޓު ދެއްވުމަށް އެމްޑީޕީގެ ޕީޖީ ގްރޫޕުން ވަނީ ވިޕްލައިނެއްވެސް ނެރެފައެވެ. އެގޮތުން މެމްބަރުން ތަޅުމަށް ވަޑައިގެން ވޯޓުގައި ބައިވެރިވުމަށް ވަނީ އެދިފައެވެ.

ބަޖެޓް ފާސް ކުރަން ނުފެންނަ ކަމަށް ވޯޓު ދެއްވީ އިދިކޮޅު މެމްބަރުންނެވެ.

އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށައެޅުއްވީ 36.92 ބިލިއަން ރުފިޔާގެ ބަޖެޓެކެވެ. ބަޖެޓް ދިރާސާކުރާ ކޮމިޓީން ބަޖެޓް ދިރާސާކޮށް ނިންމާލިއިރު ވަނީ ޖުމްލަ އަދަދަށް ބަދަލު ގެނެސްފައެވެ. އެގޮތުން ބައެއް ކަންކަމަށާއި، ބައެއް މަސައްކަތްތައް ނިންމުމަށް ބަޖެޓްވަނީ އިތުރުކޮށްފައެވެ.

މިގޮތުން ބަޖެޓްގެ ޚަރަދު 34 ބިލިއަން ރުފިޔާއިން 34.10އަށް އިތުރުކުރުމާއެކު، ބަޖެޓްގެ ޖުމްލަ އަދަދު 36.92އިން 36.99އަށް އިތުރުވެގެން ދިޔައެވެ. މިބަދަލު ފާސްކުރީ ކޮމިޓީގެ މެންބަރުންގެ އިއްތިފާގުންނެވެ.

ފައިސާ އިތުރުކުރި ބައެއް ކަންކަމުގެ ތެރޭގައި، 82 ރަށެއްގެ ޕީއެސްއައިޕީގެ މަޝްރޫއުތަކަށް ޖުމުލަ 57.4 މިލިއަން ރުފިޔާ ވަނީ އިތުރުކޮށްދީފައެވެ. އަދި ރައްޔިތުންގެ މަޖިލީހާއި ފިނޭންސް މިނިސްޓްރީގެ ޚާއްސަ ބަޖެޓާއި މިނިވަން 7 މުއައްސަސާއެއްގެ ބަޖެޓަށް ޖުމުލަ 16.4 މިލިއަން ރުފިޔާ ކޮމިޓީން ވަނީ އިތުރުކޮށްދީފައެވެ.

ބަޖެޓް ދިރާސާ ކޮށް ނިންމި ގޮތުގެ ރިޕޯޓުގެ ބަހުސަށް 5 ގަޑިއިރާ 25 މިނެޓް ހޭދަވި އިރު، 43 މެމްބަރުން ވާހަކަދެއްކެވިއެވެ.