ބަޖެޓްގެ ޚަރަދު 34 ބިލިއަން ރުފިޔާއިން 34.10އަށް އިތުރުކުރި
މުހައްމަދު ނަޝީދު
އަންނަ އަހަރަށް ދައުލަތުން ލަފާކުރާ ބަޖެޓް ބުދަ ދުވަހުގެ ޖަލްސާގައި ފާސް ކުރުމަށް އަމާޒު ހިފައިފިއެވެ.
މަޖިލިސް ފެށުމުގެ ގޮތުން ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ ބުދަ ދުވަހު ކުރަން އޮތް އެންމެ ބޮޑު މަސައްކަތަކީ ބަޖެޓް ބަހުސް ނިންމައި، ބަޖެޓް މަޖިލީހުން ފާސް ކުރުންކަމަށެވެ. އެ އަމާޒުގައި މަސައްކަތް ކުރައްވާނެ ކަމަށް ވިދާޅުވިއެވެ.
ރައީސް ނަޝީދު ވިދާޅުވީ، މި ދައުރުގައި ކުރުމަށް ނިންމާފައިވާ މަސައްކަތްތައް ނިންމައި، އަންނަ ހަފްތާގެ ހޯމަ ދުވަހު ދައުރު ނިންމެވުމަށް އަމާޒު ހިއްޕަވާފައިވާ ކަމަށެވެ. އެގޮތުން މަދަނީ އިޖުރާއަތުގެ ބިލާއި، ލާމަރުކަޒީ ގާނޫނަށް ގެނައި އިސްލާހުގެ ސަބަބުން ކަނޑު ދަތުރު ފަތުރުގެ ގާނޫނާއި، އެއްގަމު ދަތުރުފަތުރުގެ ގާނޫނަށް ގެނައި އިސްލާހުވެސް މިދައުރުގައި ނިންމުމަށް އަމާޒު ހިއްޕަވާފައިވާ ކަމަށް ވިދާޅުވިއެެވެ. ޖިންސީ ކުށުގެ ގާނޫނަށް ގެނައި ދެ އިސްލާހާއި، އެއްމެދު އިމާރާތުގެ ބިލާއި، ޓްރާންސްޕޯޓް އޮތޯރިޓީ އުވާލުގެ ބިލުގެ މަސައްކަތަކީވެސް މި ދައުުރުގައި ނިންމެވުމަށް އަމާޒު ހިއްޕަވާފައިވާ މަސައްކަތްތައް ކަމަށް ރައީސް ނަޝީދު ވިދާޅުވިއެވެ.
އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށައެޅުއްވީ 36.92 ބިލިއަން ރުފިޔާގެ ބަޖެޓެކެވެ. ބަޖެޓް ދިރާސާކުރާ ކޮމިޓީން ބަޖެޓް ދިރާސާކޮށް ނިންމާލިއިރު ވަނީ ޖުމްލަ އަދަދަށް ބަދަލު ގެނެސްފައެވެ. އެގޮތުން ބައެއް ކަންކަމަށާއި، ބައެއް މަސައްކަތްތައް ނިންމުމަށް ބަޖެޓްވަނީ އިތުރުކޮށްފައެވެ.
މިގޮތުން ބަޖެޓްގެ ޚަރަދު 34 ބިލިއަން ރުފިޔާއިން 34.10އަށް އިތުރުކުރުމާއެކު، ބަޖެޓްގެ ޖުމްލަ އަދަދު 36.92އިން 36.99އަށް އިތުރުވެގެން ދިޔައެވެ. މިބަދަލު ފާސްކުރީ ކޮމިޓީގެ މެންބަރުންގެ އިއްތިފާގުންނެވެ.
ފައިސާ އިތުރުކުރި ބައެއް ކަންކަމުގެ ތެރޭގައި، 82 ރަށެއްގެ ޕީއެސްއައިޕީގެ މަޝްރޫއުތަކަށް ޖުމުލަ 57.4 މިލިއަން ރުފިޔާ ވަނީ އިތުރުކޮށްދީފައެވެ. އަދި ރައްޔިތުންގެ މަޖިލީހާއި ފިނޭންސް މިނިސްޓްރީގެ ޚާއްސަ ބަޖެޓާއި 7 މިނިވަން މުއައްސަސާއެއްގެ ބަޖެޓަށް ޖުމުލަ 16.4 މިލިއަން ރުފިޔާ ކޮމިޓީން ވަނީ އިތުރުކޮށްދީފައެވެ.
ބަޖެޓް ދިރާސާ ކުރުމުގެ މަރުހަލާގައި މުއައްސަސާތައް ކޮމިޓީއަށް ހާޒިރުކޮށް އެ މުއައްސަސާތަކުގެ ކަންބޮޑުވުންތަކާ ބެހޭ ގޮތުން ފުޅާ ދާއިރާއެއްގައި މަޝްވަރާ ކުރެވުނެވެ.
