އަންނަ އަހަރަށް ލަފާކޮށް ރައްޔިތުންގެ މަޖިލީހަށް ސަރުކާރުން ހުށަހެޅި ބަޖެޓަށް 16 ގަޑިއިރު ބަހުސް ކުރުމަށްފަހު, ބަހުސް މަރުހަލާ ނިންމާލައިފިއެވެ.

ބަހުސް ނިންމަވާލައްވަމުން, ރިޔާސަތުގައި އިންނެވި ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވީ، ބަޖެޓް ބަހުސްއަށް ޖުމްލަ 16 ގަޑިއިރާއި 12 މިނެޓް ހޭދަކުރެވިފައިވާ ކަމަށެވެ. މިފަހަރު ބަޖެޓް ބަހުސް ފަށާފައިވަނީ މިދިޔަ ހަފްތާގެ ހޯމަ ދުވަހުއެވެ.

އަންނަ 2022 އަހަރަށް ލަފާކޮށް ހުށައެޅި 36.9 ބިލިއަން ރުފިޔާގެ ބަޖެޓަށް ވާހަކަފުޅު ދެއްކެވުމަށް އެދިވަޑައިގެންނެވި ހުރިހާ މެންބަރުންނަށް ވަނީ ފުރުސަތު ދެއްވާފައެވެ. ޖުމްލަ 87 މެންބަރުން ތިއްބަވާ މަޖިލީހުގައި ބަޖެޓަށް ވާހަކަފުޅު ދެއްކެވީ 70 މެންބަރުންނެވެ. ބަޖެޓަށް ވާހަކަފުޅު ނުދައްކަވާނީ 17 މެންބަރުންނެވެ. ޕީޖީ ލީޑަރުންގެ ތެރެއިން ބަޖެޓަށް ބަހުސް ނުކުރައްވަނީ، ޖޭޕީގެ ލީޑަރު އަދި މާމިގިލި ދާއިރާގެ މެމްބަރު ޤާސިމް އިބްރާހީމެވެ.

ބަޖެޓް ބަހުސް ނިންމާލާފައިވާއިރު، ބަޖެޓް ދިރާސާކުރުމަށް ކަނޑައެޅި ކޮމިޓީން މިހާރުވެސްދަނީ ބަޖެޓް ދިރާސާކުރަމުންނެވެ. އެގޮތުން ބަޖެޓް ކޮމިޓީން ކުރިއަށްގެންދާ ދިރާސާކުރުމުގެ މަރުހަލާގައި، މިނިވަން މުއައްސަސާތަކާއި ކޮމެޓީންދަނީ ބައްދަލުކުރަމުންނެވެ. އެގޮތުން 17 މިނިވަން މުއައްސަސާއަކާއި، އެމްއެމްއޭގެ އިތުރުން އޮޑިޓަރ ޖެނަރަލްގެ އޮފީހާއެކުވެސް ވަނީ މަޝްވަރާތައް ކުރައްވާފައެވެ. މިނިވަން މުއައްސަސާތަކުން ބަޖެޓް އިތުރު ކުރުމަށް އެދެމުންދާތީ، ކޮމިޓީގައި ފިނޭންސް މިނިސްޓަރ އަމީރުވަނީ މިފަހަރުގެ ބަޖެޓުގައި ހިމަނާފައިވާ އަދަދުތަކަށްވުރެ އިތުރަށް އެއްވެސް މުއްސަސާއަކަށް ބަޖެޓަށް އިތުރުކޮށްދެވެންނެތްކަމަށް ވިދާޅުވެފައެވެ.

ބަޖެޓް ކޮމިޓީގެ ދިރާސާއަށްފަހު، އަންނަ ހަފުތާގައި، ބަޖެޓް ރިޕޯޓް މަޖިލީހުގެ ތަޅުމަށް ހުށަހެޅޭނެ ކަމަށް އުންމީދު ކުރައްވާކަމަށް އީވާ ވިދާޅުވިއެވެ. އެއާއެކު އެ ރިޕޯޓަށް ބަހުސްކުރުމަށް ކޮންމެ މެންބަރަކަށްވެސް 7 މިނެޓުގެ ވަގުތުދިނުމަށްވަނީ ހަމަޖެހިފައެވެ.