އަންނަ އަހަރުގެ ބަޖެޓުން ޒިންމާ އަދާކޮށް، ޚިދުމަތް ނުދެވޭނެ - އެލްޖީއޭ

އަންނަ އަހަރަށް ލަފާކުރާ ދައުލަތުގެ ބަޖެޓުން ޒިންމާ އަދާނުކުރެވޭނެ ކަމަށް ލޯކަލް ގަވަރމެންޓް އޮތޯރިޓީން ބުނެފިއެވެ.

ބަޖެޓް ކޮމިޓީގައި ވާހަކަފުޅު ދައްކަވަމުން އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް އަހުމަދު ވިދާޅުވީ ލާމަރުކަޒީ ގާނޫނަށް އެ އިޞްލާހުތައް ގެނައުމުގެކުރިން، އޭރުގެ ކައުންސިލަރުންގެ އަދަދާއި މުވައްޒަފުންގެ އޮނިގަނޑުގެ އިތުރުން ރައްޔިތުންނަށް ދޭ ހިދުމަތްތަކަށް ބަލައި، ޚަރަދުގެ ގޮތުގައި އަންދާޒާ ކޮށްފައިވަނީ އަހަރެއްގެ މައްޗަށް ދައުލަތަށް ލިބޭ އާމްދަނީގެ 2.1 ޕަސަންޓްކަމަށެވެ. ނަމަވެސް ޤާނޫނަށް އިޞްލާހު ގެނެސް ކައުންސިލުތަކަށް ދޭ އަދަދު ފަސް ޕަސަންޓަށް ކަނޑައެޅީ، ރިކަރަންޓް ޚަރަދު ކަނޑައި ބާކީ ބައި ކައުންސިލުތަކުން ޕްރޮގްރާމްތައް ހިންގުމަށް ވިސްނައިގެން ކަމަށެވެ. ނަމަވެސް ލާމަރުކަޒީ ގާނޫނު އިސްލާހު ކުރިއިރު، ރަށްރަށުގައި ހުރި މިސްކިތްތަކާއި ކުޅިވަރު ދަނޑު ފަދަ ތަންތަން ކައުންސިލުތަކުގެ ދަށަށް ބަދަލުކުރެވިފައިވަނީ އެތަންތަނަށް ހިނގާ ޚަރަދު ވެސް ކައުންސިލުތަކުގެ ބަޖެޓުން ހަމަޖައްސަންޖެހޭ ގޮތަށްކަމަށް އޭނާ ވިދާޅުވިއެވެ. އެހެންކަމުން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ބަޖެޓްގެ ތެރެއިން ފޯރުކޮށް ނުދެވޭނެ ކަމުގެ ކަންބޮޑުވުންވަނީ ފާޅުކޮށްފައެވެ.

ލާމަރުކަޒީ ޤާނޫނަށް ގެނައި އިސްލާހުތަކާއެކު ކައުންސިލްތަކަށްވަނީ ބޮޑެތި ބާރުތަކެއް ދީފައެވެ. އެގޮތުން ކައުންސިލްތަކަށް ވަންނަ ފައިސާއަކީ ސީދާ އެ ކައުންސިލަށް ލިބޭ އާމްދަނިއެއެއްގެ ގޮތުގައި ވަނީ ކަނޑައަޅާފައިވެއެވެ. އަދި ދައުލަތުގެ ބަޖެޓުން ބްލޮކް ގްރާންޓުގެ ގޮތުގައި ކައުންސިލްތަކަށް ވަނީ 1.5 ބިލިއަން ކަނޑައަޅާފައެވެ. އަދި ކައުންސިލްތަކުގެ އިހުތިސާސުގައި ހިމެނޭ ބިމާއި ފަޅާއި ފަރުގެ ސަރަހައްދުގެ ކުލީގެ ގޮތުގައި ލިބޭ އާމްދަނީގެ 40 އިންސައްތަވެސް ކައުންސިލްތަކަށް ލިބޭނެއެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީގެމެންބަރުންގެ މުސާރަ ދެގުނަކުރުމަށް ރައީސުލްޖުމްހޫރިއްޔާ ނިންމެވި ނިންމެވުމުގެ ސަބަބުންވެސް ބަޖެޓަށް ބުރަ ބޮޑުވެފައިވާކަންވެސް މެމްބަރުން ފާހަގަކުރެއްވިއެވެ. ބްލޮކް ގްރާންޓުގެ ހުރިހާ ފައިސާއެއް ރިކަރަންޓު ޚަރަދަށް ހޭދަކުރަންޖެހޭނެކަމަށް ލަފާކޮށް މެމްބަރުން ވިދާޅުވީ، އެ ޚަރަތުތަކަށް ފައިސާ ނެގުމަށްފަހު އެހެން ޕްރޮގްރާމްތައް ހިންގުމަށް ފައިސާ ނުހުންނާނެކަމަށެވެ.

މީގެ އިތުރުންވެސް މިއަދުގެ ކޮމިޓީ ބައްދަލުވުމުގައި އެލްޖީއޭގެ ސީއީއޯ އަފްޝަން ލަތީފް ވަނީ ބައެއް ކައުންސިލްތަކުގެ ހާލަތު ވަރަށް ދަށް ކަމަށާއި، އޭގެ ސަބަބުން ޚިދުމަތް ފޯރުކޮށްދިނުމަށް ދަތިތައް ހުރިކަމަށް ވިދާޅުވެފައެވެ. އަފްޝަން ވިދާޅުވީ ހާލަތު ރަނގަޅުކުރުމަށް މައުލޫމާތު އެއްކޮށް 23 ކައުންސިލެއް ފާހަގަކޮށް ބަޖެޓުގައި ފައިސާ ހިމަނަން ހުށައެޅުއްވިކަމަށެވެ. ނަމަވެސް ބަޖެޓުގައި ފައިސާ ހިމަނާފައި އޮތީ ހަމައެކަނި 4 ވަރަކަށް ރަށުގެ ކައުންސިލް ކަމަށެވެ.

އަންނަ އަހަރަށް ލަފާކޮށް ދައުލަތުން ހުށައެޅީ 36.9 ބިލިއަން ރުފިޔާގެ ބަޖެޓެކެވެ.