އަފްޣާނިސްތާނުގެ ހުރިހާ ހިސާބެއްގައި އިސްލާމިކް ސްޓޭޓުގެ ބާރު އަންނަނީ ގަދަވަމުން: އދ

ޠާލިބާނުންގެ ބާރުގެ ދަށަށް އަފްޣާނިސްތާން ދިޔަފަހުން އަފްޣާނިސްތާނުގެ މިހާރުގެ ހާލަތާ ގުޅޭގޮތުން އދ.ގެ ޚާއްސަ މަންދޫބު އދ.ގެ ސަލާމަތީ މަޖިލީހަށް މައުލޫމާތު ދެއްވައިފިއެވެ.

އދ.ގެ ޚާއްސަ މަންދޫބު ޑެބޮރަ ލިޔޮންސް ސަލާމަތީ މަޖިލީހުގައި ވާހަކަދައްކަވަމުން ވިދާޅުވީ, އަފްޣާނިސްތާނުގެ 34 ޕްރޮވިންސްގައި އިސްލާމިކް ސްޓޭޓްގެ ބާރު ގަދަވަމުން އަންނަކަމަށެވެ. އަދި ޚުރާސަން ޕްރޮވިންސްގައި އިސްލާމިކް ސްޓޭޓް ފުޅާވެގެންދިޔުމުގައި ޒިންމާ ނަގަންޖެހޭ ބަޔަކީ ޠާލިބާނުންކަމަށްވެސް އދ.ގެ ޚާއްސަ މަންދޫބު ވިދާޅުވިއެވެ. އެސަރަހައްދުގައި އިސްލާމިކް ސްޓޭޓުން އަންނަނީ، އެއްވެސް ޝަރީއަތަކާ ނުލައި މީހުން މަރައި އެމީހުންގެ ބާރު ހިންގަމުންކަމަށް އދ. ގެ މަންދޫބު ސިފަކުރެއްވިއެވެ.

އެސަރަހައްދަށް ބައިނަލްއަގުވާމީ މުޖުތަމައުގެ އެހީތެރިކަމާއި އަޅާލުން މިހާރު ބޭނުންވާކަމަށްވެސް ޑެބޮރާ ވިދާޅުވިއެވެ.

އދގެ ޚާއްސަ މަންދޫބު މިމޭރުމުން ވާހަކަފުޅު ދައްކަވާފައިމިވަނީ، ކާބުލްގައި ޝީޢީން ގިނަ އަދަދަކަށް ދިރިއުޅެމުން އަންނަ ސަރަހައްދަކަށް ދިން ދެ ހަމަލާގެ ޒިންމާ އިސްލާމިކް ސްޓޭޓުން ނެގިތާ ގަޑިއިރުތަކެއް ފަހުންނެވެ. ޚާއްސަ މަންދޫބު ވިދާޅުވީ ޠާލިބާނުން ވަނީ އިސްލާމިކް ސްޓޭޓް އަފްޣާނިސްތާނުގައި ފުޅާ ވަމުންދާ ދިޔުން ހުއްޓުވުމަށް ނުކުޅެދިފައިކަމަށެވެ.

2020 ވަނަ އަހަރު އެޖަމާއަތުން 60 ހަމަލާ ދިންއިރު، މިއަހަރުގެ މިހާތަނަށް އެޖަމާއަތުން އަފްޣާނިސްތާނުގެ އެކި ސަރަހައްދުތަކުގައި ދީފައިވާ ހަމަލާތަކުގެ އަދަދު 334ށް އަރާކަމަށް އދގެ ޚާއްސަ މަންދޫބު ވިދާޅުވިއެވެ.

އަނެއްކޮޅުން ކުރިޔަށް އޮތް ފިނި މޫސުމާ ދިމާކޮށް އަފްޣާނިސްތާނުގެ އެތައް ރައްޔިތުންނެއް ހާލުގައި ޖެހޭނެކަމަށާއި، އެގައުމުގެ އިޤްތިޞާދު އަޑިއަޅާލަމުން އަންނައިރު، ހަނަފަސްކަން އިތުރުވަމުން އަންނަކަމަށް މަންދޫބު ފާހަގަކުރެއްވިއެވެ.

އަނެއްކޮޅުން ޓީޗަރުންނާއި، ސިއްހީ ދާއިރާގައި މަސައްކަތްކުރާ މީހުންނާއި އިންސާނީ ހައްގުތަކަށް މަސައްކަތްކަތްކުރާ މީހުންނަށް މުސާރަ ދިނުމަށްޓަކައި ބައިނަލްއަގުވާމީ މުޖުތަމައުން ދޭ އެހީތެރިކަން އިތުރުކޮށް، އިންސާނީ އެހީތެރިކަން ވީއެންމެ އަވަހަކަށް ފޯރުކޮށްދިނުމަށްވެސް ވަނީ އެދިވަޑައިގަންނަވާފައެވެ.

އަފްޣާނިސްތާނުގެ އިޤްތިޞާދު ފުން ވަޅުގަނޑަކަށް ވެއްޓެމުންދާއިރު، އަދި ޑްރަގްގެ މައްސަލައާއި އިންސާނީ ވަގުފާރީގެ މައްސަލަ އިންތިހާއަށް އިތުރުވަމުން އަންނައިރު، މިއީ ޓެރަރިޒަމަށް މަގުފަހިވާ ކަންކަންކަމަށް މަންދޫބު ވިދާޅުވިއެވެ. މިހުރިހާ ކަމަކާ ގުޅިގެން އަފްޣާނިސްތާނަށް އަސަރުކުރާއިރު، އާޚިރުގައި މުޅި އެސަރަހައްދަށްވެސް މިކަމުގެ އަސަރުކުރާނެކަމަށް އދ.ގެ ޚާއްސަ މަންދޫބު ވިދާޅުވިއެވެ.