އިނގިރޭސިވިލާތުގެ މެންޗެސްޓާ ސިޓީގައި ދިން ބޮމުގެ ހަމަލާއާ ގުޅިގެން ހޮނިހިރު ދުވަހު އިތުރު ދެމީހުން ހައްުޔަރު ކޮށްފި އެވެ.

ހޮނިހިރު ދުވަހު ހައްޔަރު ކުރީ އުމުރުން 22 އަހަރާއި 20 އަހަރުގެ ދެ ފިރިހެނުން ކަމަށްވާއިރު، ބަލާފާސްކުރުމުގެ އަމުރުގެ ދަށުން އެ ދެމީހުންގެ ގެ ބަލައި ފާސް ކުރުމަށްޓަކައި، ގެ އަަށް ވަންނަން ފުލުހުން ބާރުގެ ބޭނުންވެސް ކުރިއެވެ.

މެންޗެސްޓާ ސިޓީގެ މެންޗެސްޓާ އެރީނާ އަށް ދިން ޖާނުންފިދާވުމުގެ ހަމަލާއާ ގުޅިގެން މިހާތަނަށް، ހޮނިހިރު ދުވަހު ހައްޔަރު ކުރި ދެމީހުންނާ އެކު، ހައްޔަރު ކުރި މީހުންގެ އަދަދު 13 އަށް އެރީއެވެ. ހައްޔަރު ކުރި މީހުންގެ ތެރެއިން މިހާތަނަށް ދެމީހުން ދޫކޮށްލާފައިވާއިރު، ދޫކޮށްލައިފައި ވަނީ 16  އަހަރުގެ ފިރިހެން ކުައްޖަކާއި 34 އަހަރުގެ އަންހެނެކެވެ. އެ ދެމީހުންނަށް ވެސް ދައުވާއެއް އުފުލާފައެއް ނުވެއެވެ. ހައްޔަރުކޮށްފައި ތިބި އެންމެންނަކީ ވެސް އުމުރުން 18 އަހަރާއި 38 އަހަރާ ދެމެދުގެ މީހުންނެވެ.

އިނގިރޭސި ފުލުހުން ގަބޫލުކުރާ ގޮތުން މެންޗެސްޓާ އެރީނާގައި ޖާނުންފިދާވެގެން ހަމަލާ ދިން ސަލްމާން އަބެދީއަކީ ނެޓްވޯކަކަށް ނިސްބަތްވާ ލީބިއާ ދަރިކޮޅުގެ މީހެކެވެ.

ހޯމަ ދުވަހު މެންޗެސްޓަރ އެރީނާގައި ދިން ބޮމުގެ ހަމަލާގައި 22 މީހުން މަރުވެ 116 މީހުން ޒަޚަމްވިއިރު މަރުވި މީހުންގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.

އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯވއަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ވަނީ ނަގައިފައެވެ. ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ، ބޮން ގޮއްވާފައިވަނީ އާރިއާނާ ފަހު ލަވަ ނިންމާލައި "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތު ކަމަށެވެ.  މި ހަމަލާގައި އާރިއާނާއަށް އަނިޔާ ނުވާއިރު، އޭނާ ވަނީ އެކަމާ ގުޅިގެން "ހިތުގައި ޖެހިއްޖެ" ކަމަށް ބުނެ، ޓްވީޓް ކޮށްފައެވެ.