ސްޕޯޓްސް ކޯޕަރޭޝަން ވަގުތުން އުވާލަން ޖެހޭ: މަޚްލޫފް
17 ނޮވެމްބަރު 2021 | ބުދަ 13:25ސްޕޯޓްސް ކޯޕަރޭޝަނުން ވުޒާރާގެ އިމާރާތަކަށް ވަދެތިބީ ގަދަކަމުން
ރައްޔިތުންގެ މަޖިލީހުގެ ޖަލްސާގެ ތެރެއިން ކުޅިވަރާ ބެހޭ ވަޒީރު އަޙްމަދު މަޚްލޫފް
ކުޅިވަރު ގާނޫނުގެ ދަށުން އުފައްދާފައިވާ މޯލްޑިވްސް ސްޕޯޓްސް ކޯޕަރޭޝަން ވަގުތުން ވަގުތަށް އުވާލަން ޖެހޭ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.
ސްޕޯޓްސް ކޯޕަރޭޝަން އުވާލުމާ ބެހޭ ގޮތުން މަޚްލޫފް އެންމެ ފުރަތަމަ ވާހަކަދެއްކެވީ މިދިޔަ އަހަރުގެ ޖުލައި މަހު ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގައެވެ. އެ ދުވަހު ވަޒީރު ވިދާޅުވީ މިހާރު އެކުލަވާލާފައިވާ ކުޅިވަރު ގާނޫނަށް އިސްލާހު ގެނެސް، ސްޕޯޓްސް ކޯޕަރޭޝަން އުވާލަން ނިންމާފައިވާ ކަމަށެވެ. އަދި ވިދާޅުވީ ސްޕޯޓްސް ކޯޕަރޭޝަނަކީ އަމިއްލައަށް ކަމެއް ކުރުމުގެ ކެޕޭސިޓީއެއް ނެތް ގެއްލުމުގައި ކުރިއަށްގެންދާ ކުންފުންޏެއް ކަމަށްވެސް ވަނީ ވިދާޅުވެފައެވެ.
އެކަމަކު މިހާތަނަށްވެސް ސްޕޯޓްސް ކޯޕަރޭޝަން އުވާލާފައިނުވާއިރު، ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބުދެއްވަމުން މަޚްލޫފު ވިދާޅުވީ ދުނިޔޭގެ އެއްވެސް ތަނެއްގައި ސްޕޯޓްސް ކޯޕަރޭޝަން ކިޔާ ތަނެއް ނުހުން ކަމަށާއި، އެކަމަކު ކުޅިވަރު ފަންޑުތައް ހަދައިގެން އެހެން ގައުމުތަކުން ކުޅިވަރު ތަރައްގީކުރާ ކަމަށެވެ.
ކުޅިވަރާ ބެހޭ ވުޒާރާއިން މިހާތަނަށް ސްޕޯޓްސް ކޯޕަރޭޝަނާ ހަވާލުކުރި ހަމައެކަނި މަސައްކަތަކީ ރަށްރަށުގައި އެޅުމަށް ނިންމާފައިވާ 61 އައުޓްޑޯ ޖިމްތައް ގެނައުމުގެ މަސައްކަތެވެ. މަޚްލޫފް ވިދާޅުވީ އެ މަސައްކަތް އެ ކޯޕަރޭޝަނާ ހަވާލުކުރީ ތިން މަހުން ނިންމައިދޭން ކަމަށާއި، އެކަމަކު އެކަންތައްވެސް ކޮށްދެވުނީ އެއް އަހަރާ ދެ މަސް ފަހުން ކަމަށެވެ.
މީގެ އިތުރުން މަޚްލޫފް ވަނީ ސްޕޯޓްސް ކޯޕަރޭޝަނުން ކުޅިވަރާ ބެހޭ ވުޒާރާގެ ބެލުމުގެ ދަށުގައި ހުންނަ ގަލޮޅު ދަނޑުގައި އޮފީސް ހަދައިގެން ތިބޭ މައްސަލައިގައި ކަންބޮޑުވުން ފާޅުކުރައްވާފައެވެ. މީގެ ކުރިން އެ އޮފީސް ހުސްކުރުމަށް އެ ވުޒާރާއިން މަސައްކަތްކުރިއިރު، މަޚްލޫފް ވިދާޅުވީ ކުޅިވަރު އެސޯސިއޭޝަންތަކަށް އޮފީސް ހަދަން ދޭނެ ޖާގައެއް ނެތް ނަމަވެސް، ކުޅިވަރާ ބެހޭ ވުޒާރާއާ އެއްވެސް ގުޅުމެއް ނެތް އެ ކޯޕަރޭޝަނުން ވުޒާރާގެ އިމާރާތަކަށް ވަދެތިބީ ގަދަކަމުން ކަމަށެވެ. އެހެންކަމުން އެއީ ވުޒާރާގެ އިމާރާތަކަށް އެމްޓީސީސީ ނުވަތަ އާރްޑީސީސީ ވަދެ ތިބުން ފަދަ ކަމެއް ކަމަށްވެސް ވިދާޅުވިއެވެ.
ސްޕޯޓްސް ކޯޕަރޭޝަން އުވާލަން ޖެހޭ ކަމަށް އެކި ފަހަރު މަތިން މަޚްލޫފް ވިދާޅުވެފައިވާއިރު، މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ސްޕޯޓްސް ކޯޕަރޭޝަންގެ މެނޭޖިން ޑިރެކްޓަރު އަޙްމަދު މައުރޫފް (މާއްޓޭ) ވިދާޅުވީ އެ ކޯޕަރޭޝަނަކީ ކުޅިވަރުގެ އިންފްރާސްޓްރަކްޗާ ގާއިމުކުރުމަށްޓަކައި ވަރަށް މުހިންމު ކޯޕަރޭޝަނެއް ކަމަށާއި، އެ ކޯޕަރޭޝަން ދެމި އޮންނަން ޖެހޭ ކަމަށް ވިދާޅުވެފައެވެ. އަދި ސްޕޯޓްސް ކޯޕަރޭޝަނުން މިހާރުވެސް މަސައްކަތް ކުރަމުން ދަނީ ކުންފުނި އުވާލާނެ ކަމަށް ދެކިގެން ނޫން ކަމަށް ވަނީ ވިދާޅުވެފައެވެ.
ކުޅިވަރުގެ ގާނޫނުގެ ދަށުން އުފައްދާފައިވާ ސްޕޯޓްސް ކޯޕަރޭޝަން އުވާލަން މަސައްކަތް ކުރަމުން އަންނައިރު، އެ ކޯޕަރޭޝަނުގެ މަގުސަދުތަކުގެ ތެރޭގައި ރާއްޖޭގައި ކުޅިވަރުގެ އިންފްރާސްޓްރަކްޗާ ކުރިއެރުވުމާއި، ސްޕޯޓްސް ޗެނަލް ތަރައްގީކުރުމާއި، ކުޅިވަރު ކުޅޭ ފަރާތްތަކުގެ ގާބިލުކަން ކުރިއެރުވޭނެ ޕްރޮގްރާމުތައް ރާވައި ހިންގުމާއި، ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީނު ހޯދާނެ މަގު ފަހިކޮށްދިނުން ހިމެނެއެވެ.
މީގެ އިތުރުން އެ ކުންފުނީގެ ބެލުމުގެ ދަށުފައިވާ ކުޅިވަރު ވަސީލަތްތަކުގެ ބޭނުން ކުލަބުތަކާއި އެސޯސިއޭޝަންތަކަށް ބޭނުން ހިފޭނެ މަގުފަހިކޮށްދީ އެނޫން ފަރާތްތަކަށް އެ މުދަލުން މުއާމަލާތްކޮށް ވިޔަފާރި އުސޫލުން މަންފާ ހޯދުންވެސް ހިމެނެއެވެ.
